شروق :ما شاء الله على اخواتى كل واحدة فيهم عندها عيب مختلف تماما عن التانية واحدة جوزها مخنوق من كتر اهتمامها والتانية خطيبها هيتشل من قلة اهتمامها ومسيره يزهق واخدة بالك انتى يا ضحى مسيره يزهق
ضحى :لا مؤيد بيحبنى ومستحيل يزهق منى انتى نسيتى هو عمل ايه علشان يخلى ماما توافق يخطبنى واتخطب قبلك وانتى اكبر منى
شروق :انا مش ناسية بس انتى اللى فاهمة غلط مؤيد بيحبك وبيتمنالك الرضا بس الحب اللى مش هتقدريه هتخسريه زى العصافير اللى كنتى بتجيبها وتنسي تأكليها فتموت فاكرة بابا الله يرحمه قالك عنها ايه قالك دى روح ومتقدرش تقول جعانة او عطشانة انتى المفروض تهتمى بيهم ولو مش هتقدرى يبقى خلاص مش هشتريلك تانى ومن ساعتها مشترالكيش عصافير كناريا تانى انتى مفهمتيش الدرس يا ضحى مستنية لما حبك فى قلب مؤيد يموت زى ما عصافيرك ماتو من اهمالك ليهم
ضحى بتوتر :لا..لا مؤيد بيحبنى مستحيل يقدر يبطل يحبنى
شروق :كل حاجة فى الدنيا ليها اخر يا ضحى حتى الحب واللى مش هتقدريه وتتعبى علشانه هتخسريه
ضحى :يالهوى اخسر مؤيد لا مقدرش انا هقوم اكلمه فى الموبايل حلو ده صح
شروق بابتسامة :حلو يا حبيبتى بس داومى عليه خلى الاهتمام رايح جاى بينكم مش جاى بس زى ما بيهتم بيكى وبيقدرك وبيحبك اهتمى بيه وقدريه وحبيه
ضحى وهى بتبوسها من خدها :تسلميلى يا احلى شوشو فى الدنيا
فجر :يا ست الحكيمة ياللى شكلك كنتى بتدرسى علم نفس فى كلية العلاج الطبيعى اللى كنتى فيها انا بقى غلطانة فى ايه
شروق :انتى هنا ليه يا فجر علشان كريم اتخانق معاكى ليه لانك خنقاه متجوز امين شرطة كل شوية يفتحله محضر سين وجيم كنت فين عملت ايه ومع مين ودى بصتلك ليه ودى ابتسمتلها ليه وبنت عمك بتسلم عليك بقلب جامد ليه كده وبنت خالتك بتطول معاك فى الكلام واخرتها مسكتى موبايله تفتشى فيه ولما شافك وزعق جيالنا هنا غضبانة والحقيقة ان انتى اللى غلطانة لما انتى بتشكى فيه اتجوزتيه ليه لما انتى مش واثقة فيه اتجوزتيه ليه
فجر :مش شك وقلة ثقة دى غيرة وحب خايفة اخسره خايفة غيرى تاخده منى
شروق :وهو كده انتى مش هتخسريه ده انتى كده بتلفيه لفة هدايا وبتديه لاى واحدة هتقرب منه وتقوله كلمتين يهونو عليه القرف اللى شايفه معاكى مبتلحقيش توحشينا الصراحة تروحى بيتك شهر تنكدى عليه وتجلنا اسبوع ويجى ويراضيكى وترجعى معاه وشهر وترجعلنا تانى
فجر بحزن :بقالى عشر ايام ومجاش ياخدنى
شروق :علشان زهق وتعب لامتى هيراضى فيكى ويعديلك ويقول بكرة تعقل وتثق فيا وتفهم انى محتاج زوجة مش امين شرطة مش مخبر بيراقب كل تحركاته
فجر :بس انا بحبه يا شروق وبعمل كل ده من حبى فيه
شروق :انتى كده بتخنقيه وبتكرهيه فيكى وفى بيتكم بكتر خناقك معاه وبتعوديه على غيابك بكتر مجيك هنا
فجر :ايه يتعود على غيابى
شروق :اه مش بيقولو كتر الخصام يعلم الجفا
فجر :صح..تصدقى صح..يا نهار ابيض كريم اتعود على غيابى وعلشان كده مجاش يصالحنى
شروق :كمان علشان مكنش صح انك تفتشى فى موبايله
فجر :خلاص والله مش هفتش فى موبايله تانى وهرجع من بكرة البيت مش هسيبه يتعود على غيابى انا بحبه يا شروق بحبه وخايفة يحب غيرى كل اللى محتاجاه انه يطمنى انه مش ممكن يحب غيرى لو طمنى مش هعمل اى حاجة فى كل اللى بعمله ده تانى
شروق :قوليله كل ده يا حبيبتى اتكلمى معاه واخدة بالك اتكلمى مش اتخانقى كمان مش عايزة يحب غيرك متديلوش فرصة يشوف غيرك اهتمى بشكلك وغرقيه كلام حلو وحب اهتمى بيه اهتمام زوجة وحبيبة مش اهتمام امين شرطة بيحقق معاه
فجر :ماشى هحاول..على فكرة يا بخت حمزة بيكى وبعقلك ده
