على بتوتر :اااا..عايزة حاجة يا حبيبتى
فرحة :طيب خبيته فى جيبك علشان مشوفوش خوفت من انى اشوفك طب وربنا اللى دايما شايفك مخوفتش منه يا على
على :خبيت ايه انا مخبيتش حاجة
فرحة :لا يا على خبيت الحشيش اللى كنت هتلفه فى سجارتك يا على انا عارفة انك بقيت بتحشش زى ما انا عارفة انك مبقتش بتصلى ولا بتصوم وزى ما انا عارفة ان جوزى اللى حبيته واتجوزته وانا لسه فى الكلية رغم رفض اهلى جوزى معلم الاجيال القدوة بيتفرج على افلام زبالة
على :انا..
فرحة قاطعته :انا مش عارفة اعمل ايه انا بصلى الفرض كل يوم مرتين مرة ليك ومرة ليا وبدعى ربنا يهديك ويردك ليه مبقاش عندى غير الدعوة دى ادعيها
هى بنتك لوحدك اللى ماتت يا على هى مش بنتى مش حتة من قلبى تفتكر اللى بتعمله ده هيرجعها بنتنا فى الجنة يا على بس انت لو كملت فى اللى انت فيه ده يبقى عمرك ما هتكون معاها
على بحزن :هو ليه خدها منى ما كل الناس ولادهم معاهم اشمعنا انا اللى اتحرمت من بنتى
فرحة :ربنا رايد كده يا على اكيد ده الخير احنا لازم نرضى او على الاقل نصبر انا مش عارفة اعمل كده بسببك انتى بتأذينى وبتأذى نفسك انا مش هينفع اكمل معاك ونخلف وانت كده هربى ولادى منك على ايه اجيبهم علشان يعملو زيك احنا اصلا عمرنا ما هنخلف لو كملت كده
انت كده لا زوج ليا ولا تنفع اب لولادى
على :مش قولتى بتدعيه يهدينى وهو مستجابش زى ما مستجابش دعايا ليها انها تفضل معايا وخدها منى وحرمنى منها
فرحة وهى بتعيط :بنتنا كانت مريضة كلى يا على طفلة عمرها خمس سنين مريضة كلى بتتحمل وجع انا وانت منتحملوش ربنا رحمها هو احن عليها منى ومنك الرسول عليه الصلاة والسلام قال كده قال ان ربنا احن علينا من امهاتنا
عند ربنا هى اكيد مرتاحة ومبسوطة
على وهو بيعيط :وانا حزين وموجوع على فراقها هو عمل فيا كده ليه كان سبهالى
فرحة وهى بتعيط وبتبوس ايده :ابوس ايدك يا على علشان خاطرى متقولش كده اللى بتتكلم عنه ده ربنا اللى خلقنى وخلقك احنا ملناش غيره تعالى نروح لشيوخ يكلموك فى الدين هما هيفهمو اكتر منى ونروح لدكتور نفسى كمان اكيد هيساعدك تتجاوز حزنك وتتقبل اللى حصل
انا بموت يا على حسا انى خسرت بنتى وجوزى مع بعض حسا انى لوحدى علشان خاطرى خليك معايا ومتسبنيش لوحدى ارجعلى يا على انا عايزة على جوزى ارجعلى علشان نخلف تانى ونبنى عيلة من جديد
على :نخلف تانى بنت علشان ياخدها منى
فرحة وهى بتعيط اكتر :حرام عليك يا على والله حرام عليك
بعد شهر
على بخضة :ايه اللى انتى عملتيه ده ازاى تكسرى الاب توب بتاعى وازاى تدخلى من غير ما تخبطى
فرحة بجمود :خبطت يا على خبطت كتير بس انت مسمعتش ودخلت بس انت محستش مدريتش بيا غير لما مسكت لابك كسرته ورجعتك من العالم القذر اللى كنت فيه
بس عارف حاجة انا اسفة لانى كسرت لابك اللى مش ملكى مش بس الاب اللى مش ملكى انا مفيش حاجة فى البيت ده ملكى واولهم انت طلقنى يا على
على :ايه
فرحة :طلقنى بهدوء ومن غير شوشرة لانى هطلق هطلق ولو رفضت هرفع قضايا واحكى كل حاجة للقاضى ولكل الناس وافضحك وانا مش عايزة افضحك فمتجبرنيش اعمل كده انا مش هعيش معاك يوم كمان يا على كل حاجة ليك جوايا خلصت حبى ليك صبرى عليك حتى دموعى خلصت مبقاش فاضل حاجة خالص
وعلشان كده بقولك طلقنى يا على
