انا امل اتنين وعشرين سنة
رايحة الكلية وانا بجرى لان عندى دكتور كامل جادالحق ومع انى عارفة انى هطرد كالعادة
الا انى بعمل اللي عليا اهوه وبحاول الحق المحاضرة
وانا ماشية في الكلية متلهوجة خبطت في واحد
وممسكش ايدى علشان مقعش واشتغلت ربابيه في الخلفية
لا اتخبطت في الحيطة عادى جدا وجبينى ورم
يوسف :انا اسف جدا
امل وهى بتفرك جبينها بايدها:ولا يهمك محصلش حاجة عن اذنك
ايوه هو ده اللي كان ناقص جريت علشان ادخل المحاضرة ولقيت دكتور كامل طبعا دخل قبلي
كامل :علي فين يا آنسة هو مش في ميعاد للمحاضرة ولا هى وكالة من غير بواب
امل:انا اسفة يا دكتور والله انا...
كامل قاطعها :اتفضلي بره وبعد كده تحترمى ميعاد المحاضرة
وخرجت وانا زى الجذمة
انا مش عارفة دي المرة الكام اللي يطردنى فيها من محاضرة ليه
هو بيدينى من اول سنة بقالي اربع سنين بطرد
تقريبا بحضر محاضرة واحدة كاملة وبطرد محاضرتين تلاتة
والاسباب متنوعة بصراحة
اتأخرت موبايلي رن لانى نسيت اعمله صامت
البنت اللي جنبي سالتنى علي حاجة ورديت
سالنى سؤال في اول محاضرة خدناها في اول السنة ومجاوبتش
ده مرة طردنى علشان نسيت كشكول المحاضرات بتاعي ومكنتش بكتب وراه وهو اصلا مانعنا نكتب وراه
قالي ان ده اهمال وكالعادة طردنى
انا مش عارفة هو مش طايقنى ليه كده كانى قتلتله قتيل
المهم قلت هروح الكافيتريا افطر بما ان المحاضرة خلاص كده بح زي كل مرة
لسه هركب الاسانسير الباب اتقفل واتخبط تانى
اللي جوه فتح الباب وقالى
يوسف :انا اسف مرة تانية مخدتش بالى انك عايزة تدخلي
امل:حرام كده انا خبطة كمان وهفقد الذاكرة
اه يا دماغى يانا ياما
يوسف :انا اسف والله مكنش قصدى
امل:لا ولا يهمك هو اليوم باين من اوله بعد اذنك
يوسف :مش هتستخدمى الاسانسير
امل:لا هنزل عالسلم اضمن
ونزلت فطرت ورجعت حضرت المحاضرة التانية وخلصت ورجعت البيت
بعد شهر كنت كنت داخلة الجامعة وكان في عربية هتخبطنى بس انا لحقت نفسى واللي سايق مخدش باله تقريبا
مش عارفة ليه يوم محاضرة دكتور كامل بيبقي يوم حوادث كده
سمعت حد ورايا بينده
يوسف :يا انسة لو سمحتى
امل :حضرتك بتكلمنى انا
يوسف :ايوه انا اسف كنت هخبطك بالعربية مخدتش بالى
امل وهى بتشبه :ولايهمك انا حسا انى شفتك قبل كده
فين .. فين اه افتكرت انا اتخبطت بسببك مرتين في يوم واحد
يوسف باحراج:هو غير انهم كانو هيبقو تلاتة اهو بس انا اسف حقك عليا
امل بابتسامة :مجراش حاجة
يوسف : هو انتى معيدة هنا في الكلية ولا طالبة
امل :معيدة كان نفسي والله بس دكتور كامل مشهينولهالى لا انا طالبة بكالريوس في اخر سنة
يوسف : دكتور كامل مين
امل :دكتور كامل دكتور عندى في الكلية
يوسف :ايوه اسمه دكتور كامل ايه
امل :دكتور كامل جادالحق
يوسف :وبتتكلمى عنه ليه كده
امل :اصله مش بيطقنى لله في لله
يوسف: لا اكيد عملتى حاجة بابا مبيظلمش حد ولا بيعامل حد وحش من غير سبب
امل :ابدا والله انا... ثانية واحدة انت قلت بابا
يوسف :اه بابا دكتور كامل يبقي والدى
امل :ينهار ابيض يا مستقبلك اللي ضاع اكتر ما هو ضايع يا امل بص يا استاذ..
يوسف :يوسف
امل : عاشت الاسامى والله
بص يا استاذ يوسف انا مقلتش حاجة وحضرتك متعرفنيش ولا اتكلمت معايا ربنا يسترها عليك وما يوقعك في ضيقة انا كلها شهرين واخلص واخد افراج من هنا وعايزة اخلص بقي من غير مشاكل
يوسف وهو بيضحك :خلاص اهدى انا مش فاهم انتى خايفة كده ليه من بابا ده حتى كل تلامذته بيحبوه
امل بصوت واطى :اه ما هو اللي ميعرفش يقول عدس
يوسف بابتسامة :عدس انا بقول عدس
امل بسرعة :لا خالص انا اللي عدس وستين عدس
هي الكلية فيها غير دكتور كامل
والله انا لو احضر افهم منه ده صحابي بيشكرو في شرحه جدا
يوسف : وانتى مبتحضريش ليه
امل :هو انا باجى بس دكتور كامل بيطردنى من المحاضرة
يوسف باستغراب :كل محاضرة
امل :لا الشهادة لله محاضرة بحضر ومحاضرتين بطرد وبيسبنى امتحن معاهم الميدتيرم والفاينال الحمد لله
يوسف :هو انا مش مكدبك بس مش متخيل ان بابا يعمل كده ده بيحب مهنته جدا وشايف ان رسالته اللي بياديها هنا رسالة عظيمة ده رفض يشتغل بره الجامعة مع ان الاجر اعلي بكتير من هنا بس هو بيقول ان اللي بيقدر يفدهم هنا اكتر بكتير من اللي هيستفادو من شغله بره الجامعة
امل :هو دكتور محترم وكل الطلبة بتحبه وبتشكر فيه
بس انا مش عارفة بيعمل معايا كده
يوسف :تحبي اتكلم معاه
امل:علشان اشيل المادة لا طبعا متعملش كده انا خلاص الحمد لله شهرين واتخرج وامشي من هنا خالص
وصلنا كليتى بعد اذنك
يوسف :انا داخل معاكى كليتك انا طالع مكتب بابا
امل :تمام اتفضل
يوسف :فرصة سعيدة يا امل
امل :انا اسعد
يوسف :بجد اسعد ولا بتجاملينى
امل بحرج :لا والله هي فعلا فرصة سعيدة
بعد اذنك هلحق المحاضرة
يوسف بابتسامة :اتفضلى
بعد شهرين الحمد لله خلصت امتحانات الفاينال
اخر فاينال ليا في الكلية احساس جميل انى اكون عارفة انى خلاص مش هاجى هنا تانى
غير في حفلة التخرج بقي
وحضرت الحفلة واتخرجت وظبطت السي في بتاعي بقي علشان ادور على شغل
انا تقديرى العام جيد جدا وواخدة كورسات انجليزى وكمبيوتر بالمناسبة انا كلية تجارة
قدمت في شركات وبنوك كتيييييييير
وفضلت بتاع ست سبع شهور بدور علي شغل
والحمد لله بنك من الي قدمت فيهم اتصلو بيا وقالولي ان اروح اعمل انترفيو معاهم
روحت كنت خايفة ومتوترة بس هديت نفسي وتوكلت علي الله ودخلت رديت بثقة علي اسئلتهم مع ان ركبى كانت بتخبط فى بعض من الخوف بس مبينتش
ومشيت ودعيت ربنا كتير انى اتقبل
بعد اسبوع اتصلو عليا وقالو انهم قبلونى معاهم
في اول يوم شغل ليا وانا راكبة الاسانسير ولسه هيقفل سمعت حد بيقول ثانية واحدة فدوست على زرار الفتح
يوسف :متشكر جدا
امل :العفو
ونزلت في الدور اللي المفروض انزل فيه والاسانسير طلع بالي باقين فيه ومن ضمنهم يوسف افتكرته اول مشوفته
بس ايه ده هو شغال هنا ولا جاى يودع فلوس او يسحب
