هناء :عارفة انه انانى وملوش كلمة ومش راجل اصلا بس...
هند قاطعتها :بس ايه لما هو فيه العبر كده بقالك نص ساعة بتكلمينى عنه ليه
هناء بدموع فى عينيها :لانه وحشنى
هند بصدمة :ايه بعد كل اللى عمله ده
هناء وهى بتعيط :بعد كل اللى عمله ده وحشنى داس على قلبى بالجذمة وعمل كرامتى سيجادة وراح وجه عليها برجله وعلشان كده سيبته بس غصب عنى بيوحشنى مستحيل ارجعله مستحيل اعرف ابص فى وشه او اسمع صوته تانى بس وحشنى ولانى مش هقدر اقول ده لحد من اهلى لانهم هيبستفونى بكلامهم قولت اتكلم معاكى بدل ما انا حاسة انى هموت من وجعى اللى مش عارفة اتكلم عنه مع حد ده
هند :حقك عليا متزعليش منى
هناء وهى بتعيط بحرقة :كلهم بيقولولى مش سيبتيه وارتاحتى خلاص بقى الموضوع انتهى مين قال انى سيبته علشان ارتاح انا سيبته وانا عارفة انى هتعب بس قولت لنفسى تعب شهر ولا حتى سنة ارحم من تعبى معاه العمر كله قولت متبقيش انانية وفكرى فى ولادك ده مش هيكون اب كويس ليهم ذنبهم ايه تختاريلهم اب زيه
انا تعبانة من غيره يا هند بس ما انا كنت تعبانة وانا معاه على الاقل كده فى امل ارتاح بعدين هيجى يوم وانساه واحب تانى حد يستاهل حبى حد ينفع زوج ليا واب لولادى انا عملت الصح مش كده
هند وهى بتحضنها وبطبطب عليها :انتى عملتى الصح يا هناء واللى عملتيه ده صعب ومش اى حد يقدر يعمله بس انتى قدرتى عارفة ليه لانك قوية
هناء بحزن :قوية ايه بس انا حاسة انى اضعف خلق الله
هند :لا والله انتى قوية جدا وقدوة كمان انتى عارفة بنات كتير اوى تتمنى تعمل زيك ومش قادرين وبنات تانية معملوش زيك وندمو خصوصا بعد ما جابو ولاد انما هناء عملت الصح
هناء :بجد..بجد انا عملت الصح
هند :اه يا حبيتى والله العظيم انتى عملتى الصح
متزعليش منى على رد فعلى الغبى ده انا اصلى لسه قارية كتاب ازاى تبقى حلوفة وتخسرى البيست فريند فى تلاتين ثانية وتقريبا كنت بطبق عليكى اللى قريته
هناء وهى بتضحك :هو فى كتاب اسمه كده
هند وهى بتضحك :لا هو مفيش بس علشان خاطر عيون هنوش اكتبه علشان مزعلهاش منى تانى
هناء بابتسامة :مش زعلانة منك كفاية انك حضنتينى اسوء حاجة انى دايما حاسة انى عايزة اتحضن طول الوقت واعيط طول الوقت
هند :ومش حاسة انك عايزة تاكلى طول الوقت انا قررت ابعزق الميتين جنيه اللى حيلتى واعزمك ها تاكلى ايه
هناء :جمبرى
هند وهى بتضحك :ايه يا هنوش بقولك ابعزق الميتين جنيه مش الالف جنيه اللى مش معايا احترمى الميتين جنيه اللى معايا واطلبى حاجة اعرف اعزمك عليها
هناء :خلاص نخليها بيتزا بالجمبرى
هند :قشطا يبقى بيتزا بالجمبرى وايس كريم مانجا علشان خاطر هنوش هانم حبيبة قلبى
بعد ساعة
هناء وهى بتاكل الايس كريم :عارفة ايه اسوء حاجة عملها فيا
هند :انه خانك
هناء :لا تخيلى مش دى اسوء حاجة عملها فيا مش انه خانى ولا انه اهملنى وجه عليا كتير
هند :اومال ايه اسوء حاجة عملها فيكى
هناء :انه شككنى فى نفسى فريد كان محترف قلب ترابيزة استاذ فى قلب الادوار وانه يخلى الحق والغلط عليا
ميجبليش هدية فى عيد ميلادى لانه ببساطة مش مهتم ولما اعاتبه يقولى انه مكنش معاه فلوس وانه فاكر طبعا بس كان مستنى يبقى معاه فلوس علشان يجبلى هدية تليق بيا
هند :طيب ما يمكن ده حقيقى
هناء :لا كالعادة بيكدب لانه بعدها بيومين جاب لنفسه موبايل جديد وهدية عيد ميلادى عمرها ما جت ما هو اصله مجابش لانه ناسى ومش مهتم
يمسك موبايلى ويفتش فيه وياخد باسورد الاكونت بتاعى ده لانه غيران عليا هو قالى كده واهلى قالولى كده
يعرف بنات وهو خاطبنى عادى ده كلام وبس هو اخره يتكلم معاهم انما ميقدرش يعمل اكتر من كده لانه بيحبنى وانه غصب عنه بيدور فيهم على حاجة مش عندى وهو اصلا خاطبنى لانى محترمة يعنى يخطبنى لانه محترمة ويروح يعرف عليا بنات مش محترمة علشان يدلعوه والمصيبة انى حتى مش مصدقاه فى كلامه ويمكن بيعمل الاكتر من الكلام واهلى يبرروله بانه شاب وطايش وبعد الجواز هيعقل وانتى شاطرة بقى بعد الجواز تخليه ميشوفش غيرك
هو انا بعد الجواز هعمل ايه بالظبط هبقى ست بيت ومسئولة عن بيتى وجوزى وولادى ولا هخليه ميشوفش غيرى وميخونيش ويهتم بيا واعمل ده ازاى وهما قالولى انى مينفعش اتكلم معاه كتير لانه كده هيتخنق وهيشوفنى نكدية
هو محسسنى انه مهما يعمل انا اللى غلطانة وانا اللى مقصرة واهلى محسسنى انه كل الرجالة زيه وان الست ساحرة بتغير كل حاجة على مزاجها
كلامه وكلامهم خلانى اشك فى نفسى اشك فى افكارى ومشاعرى وحتى احلامى وطبعا فكرة انى بحبه خلتنى مستحملة برضه
لحد ما جبت اخرى
هند :نمتى صحيتى حاسة انك مش عايزاه فى حياتك
هناء :مش فى يوم وليلة فى ايام كتير اوى من كتر ما كانت صعبة عدت عليا كأنها سنين بقيت شاكة فى نفسى مش فيه حاولت اعمل اللى يرضيه بس هو مكنش بيرضى واللى زاد بقى انى مبقتش عارفة اتعامل معاه مش عايزاه فى حياتى مبقتش قادرة اتحمل وجوده فيها ولا قادرة اتحمل تعبى وحزنى وانى شايفانى انسانة وحشة بسببه
كان نفسى يحاول يطلعنى من الحالة دى بس لا هو زودها عليا ده كان بيلومنى ليه انا مش مبسوطة معاه وليه بقيت كئيبة كده ده بقى مبرر جديد يبرر بيه اى غلط بيعمله فى حقى
واهلى بدل ما يقفو جمبى يدافعو عنى قدامه او حتى يهونو عليا بكلامهم هما كمان لامونى
قالولى ليه مش مبسوطة ليه حزينة وكئيبة ليه مش فارق معايا اى حاجة بتحصل
وقتها قررت ان خلاص حكايتى معاه خلصت على كده لا هو ولا اى حد فى الدنيا يستاهل اكمل فى الحالة دى علشانه اذا كان بيعمل كده فى الخطوبة اللى المفروض انه بيطلع فيها احلى ما عنده لما ده احلى ما عنده اومال اسوء ما عنده بقى شكله ايه
هند :طيب لما ده الوضع بيوحشك ليه
هناء :لانى مش بياعة ده مش طبعى لا ببيع ولا بنسى بسهولة
الوحش اللى عمله معايا خلانى سيبته ومستحيل ارجعله والحلو اللى عمله معايا مخليه بيوحشنى
مشاعر معقدة نتيجتها انى عمرى ما هكون معاه واكيد فى يوم هنساه واحب تانى بس احب حد يستاهل حبى لانه ميستاهلش لانه كرهنى فى نفسى ومستحيل حد كرهنى فى نفسى وخلانى زهدت الحياة يكون يستاهل حبى او يستاهل يكون فى حياتى باى شكل من الاشكال
هند :اللى انتى فيه ده فترة وهتعدى زى بالظبط ما اللى بيعمل عملية بيفضل فترة بعدها تعبان وبيتالم بسبب العملية بس مع الوقت الالم بيقل وبيرجع احسن من الاول لان العملية اللى وجعته دى خلت صحته بقت احسن لانها عالجته
هناء :العلاج بيكون مر وطعمه وحش بس لازم ناخده علشان نخف
وانا هتحمل اللى انا فيه ده لحد ما اخف وارجع زى الاول
هند بابتسامة :هتبقى احسن من الاول كمان..استنى ده اياد بيرن عليا..الو يا اياد
اياد :هند انتى فين
هند :ايه الدخلة دى
اياد :اخلصى انتى فين
هند :انا بره مع واحدة صاحبتى
اياد :مطولة معاها
هند :لا شوية وهرجع
اياد :لا مترجعيش انا هستاذن عمى انك هتخرجى معايا عايز اتكلم معاكى
هند :خلاص يا حبيبى قوله ونتقابل
اياد :تمام سلام
هناء :شكله عايزك فى حاجة مهمة خلاص انا هروح
هند :لا ليه خلينا سوا شوية كمان
هناء :ملوش لزوم انا كمان اتاخرت اهلى مخنقينها عليا شوية كنوع من انواع العقاب علشان فسخت خطوبتى من فريد ميعرفوش انهم مش لو خنقو عليا فى الطلوع والخروج وبس لا كمان لو قطعو من لحمى وباعوه بالكيلو كده انا مستحيل ارجعله
هروح انا بدل ما يقولولى اتاخرتى ويقلبوها خناقة
هند :ماشى يا حبيبتى خلى بالك من نفسك
هناء :وانتى كمان
