ابراهيم وهو بيصفر :هايل يا فنانة ده ايه الجمال ده
نجاة وهى بتضحك :يا دى الكسفة اللى انت فيها يا حازم انت هنا من امتى
ابراهيم وهو بيضحك :من زمان من اول الاستعراض تقريبا وانتى مندمجة اوى ومش حسا بيا توقعت اطلع الاقيكى متعصبة متضايقة ضاربة بوز بتعيطى حتى بس اخر حاجة كنت اتخيلها اطلع الاقيكى بترقصى واصورك وانتى ولا شيفانى ولا حسا بيا
نجاة :بجد صورتنى ورينى طيب
ابراهيم :اتفرجى يا ستى على الابداع كأنك فى دنيا تانية على خشبة مسرح مش فى اوضتنا
نجاة بابتسامة :تصدق حلو مفكرتش اصورنى قبل كده
ابراهيم :قبل كده هى دى مش اول مرة
نجاة :اول مرة دى ممكن تكون اكتر من المرة المية مثلا انا لما بحس بحزن برقص بحس باحباط برقص حسيت بزهق برقص طول الوقت برقص اصلا
ابراهيم :ولو حسيتى بخوف
نجاة :بصلى مفيش حاجة ممكن تطمنى اكتر من الصلاة
ابراهيم :ويا ترى بقى كنتى حسا بايه المرة دى وعلشان كده رقصتى
نجاة :غيظ من بنت خالتك كمان كنت محتاجة احس انى بنت وحلوة
ابراهيم بابتسامة :الحق يتقال انتى حلوة اوى يا نوجا
نجاة :بس بص شعرى بقى شبه زعافة السقف ازاى تحسه متكهرب من كتر ما هو هايش
ابراهيم وهو بيضحك :لا حلو وعاجبنى بس اللى عملته ميرنا محسسكيش بغيرة
نجاة :بينى وبينك غيرت انت بتاعى مش من حق اى واحدة تانية تتكلم عنك او تتمناك
ابراهيم :بتاعك
نجاة :متبصلهاش كأنها تملك انت جوزى يعنى بتاعى وانا مراتك يعنى بتاعتك احنا على اسم بعض
ابراهيم :مش تملك انا مستغرب احنا متجوزناش عن حب علشان الطريقة اللى بتتكلمى بيها دى
نجاة :حتى لو وايه يعنى ما مسيرنا نحب بعض انت خلاص بقيت جوزى يعنى حبى غيرتى تفكيرى واى حلم هحلمه لازم يكون عنك وليك وانت كمان احنا خلاص اتجوزنا وبالتالى محدش فينا عنده اختيار غير التانى اومال انا وافقت عليك ليه
ابراهيم :ليه
نجاة :علشان حسيت انى هيجى يوم واحبك انى ينفع احبك
ابراهيم :ينفع تحبينى
نجاة :اه اصل فى رجالة متتحبش مينفعش تتحب زى القاسى مثلا او البخيل سواء فى مشاعره او فى الفلوس او بتاع البنات اللى تتقطع ايده او رجله بس متتقطعش علاقته بالبنات اللى يعرفهم او زى الانانى المتملك او اللى ميعرفش ربنا ومبيتقيش ربنا فى اهل بيته كل دول ميتحبوش والحمد لله انت ولا واحد فى دول وده معناه انى هيجى يوم واحبك واقع فى غرام تفاصيلك
ابراهيم :كلامك حلو
نجاة :انت تستاهله
ابراهيم :بس انتى مصدقتيش ميرنا صح هو اه كان فى نية انى اخطبها بس محصلش هى خلت خطيبها الاولانى يتقدملها قبلى لانها كانت بتحبه
نجاة :من غير ما تقول انا مصدقتهاش لما قالتلى انك كنت هتخطبها بس لولا انها اتخطبت عرفت انها بتكدب
ابراهيم :عرفتى ازاى
نجاة :سألتها خطوبتها اتفسخت امتى لقيت انها اتفسخت قبل ما انت تتقدملى باربع شهور يعنى لو كنت عايز تتقدملها كنت اتقدمتلها هى متعرفكش بس انا عارفاك وعارفة انها مدام اختارت غيرك انت مستحيل تقبل تكون اختيار تانى بعد ما فشلت مع اختيارها الاول
ابراهيم بابتسامة :صح
نجاة :عارفة انه صح وفاهمة انها بتحاول تغظنى وتحرق دمى وتوهمنى انك جواك مشاعر ليها وعلشان متحاولش تلعب عليا اللعبة الخايبة دى تانى قولتلها ان الجواز ده قسمة ونصيب وروحت مدخلة مامتك وخالتك فى الحوار وسألتهم عن رايهم فى ان انت اتجوزتنى انا مش ميرنا علشان ده قسمة ونصيب
ابراهيم وهو بيضحك :حركة صايعة منك الصراحة مصدقتش لما ليلى اختى حكتلى انك عملتى كده
نجاة وهى بتضحك :انا مش بس كنت بحاول اعلم عليها انا كمان كنت عايزة مامتك وخالتك يعرفو اللى هى بتعمله علشان لو اضطرتنى هى فى يوم اخد رد فعل اقوى من ده يبقو فى الصورة ميتفاجأوش ويغلطونى ولو انى معتقدش انها هتجيب اسمك فى جملة مفيدة بعد الحرجة السودا اللى حرجتهالها دى
ابراهيم وهو بيضحك :انا كمان معتقدش تعملها ضربة معلم منك الصراحة يا نوجا انا قولت هتتغاظى وتقومى وتسيبيهم وتغيرى ويتحرق دمك انما انك تعلمى عليها وتخرصيها بالشكل ده متوقعتهاش بجد فجأتينى فجأتينى وعجبتينى
نجاة بابتسامة :مراتك مش سهلة برضه
ابراهيم وهو بيضحك :مش سهلة خالص الحقيقة
