امل :ياسمين يا حبيبتي مالك بقالك اسبوع بتيجي من دروسك تحبسي نفسك في اوضتك متخرجيش منها غير علي المدرسة الصبح مبتقعديش معانا خالص
ياسمين :مفيش يا ماما انا كويسة
امل :هتخبي علي ماما حبيبتك برضه مش احنا اتفقنا اننا صحاب والصحاب مبيخبوش علي بعض حاجة
ياسمين :انا زاكرت كتير علشان امتحان الفيزيا بس برضه منة قفلت الامتحان وانا لا مع انى والله مسبتش حاجة مذاكرتهاش كويس يا ماما بس برضه غلطت في الامتحان
امل :حبيبتي انتي عملتي اللي عليكى وده المهم التوفيق بقي من عند ربنا ولازم ترضى وتقولي الحمد لله
ياسمين :الحمد لله يا ماما والله
بس انا مهما حاولت منة بتقفل وانا لا
حتي حاولت اصلي السنن مش بس الفروض علشان عائشة صاحبتي قلتلي ان فضلها كبير بس مقدرتش التزم بيهم اوقات بصليهم واوقات بصلي الفرض بس
وصلاة الفجر كل يوم اظبط المنبه علشان اقوم اصليه بس مبسمعوش غير قليل مرة اه وتلاتة لا
مهما حاولت منة وعائشة احسن منى
امل :انتى بتغيرى من صحابك يا ياسمين
ياسمين وهي بتبكى :انا بحبهم يا ماما دول اعز اصحابي بس مش قادرة اتحمل انهم احسن مني بقيت مش عارفة اتعامل معاهم زى الاول هو انا وحشة يا ماما
امل وهى بتحضنها:لا يا حبيبة ماما انتى مش وحشة بس مينفعش تقارنى نفسك بيهم وتاخديهم مقياس للنجاح وتركزى علي مميزاتهم وتنسي مميزاتك
ياسمين :مميزاتى الي هي ايه يا ماما منة اشطر منى وعائشة علاقتها بربنا احسن مني
امل :مش انتى قلتيلي انك دايما لما بتطلعي اذاعة في المدرسة هما مبيكونوش معاكي علشان بيتحرجو وان دايما عائشة بتقولك يا ريت كنت جريئة زيك وبعرف اتكلم
وان منة دايما بتخليكي تشرحيلها العربي خصوصا النصوص لانها مبتفهموش بسهولة عكسك
ياسمين :ايوه يا ماما
امل بابتسامة:يبقي ياسمينة ماما شاطرة اهي وبتعرف تعمل حاجات هما مبيعرفوش يعملوها زي ما في حاجات هما اشطر منك فيها كمان عائشة اخوتها كانو ازهر وربوها علي الالتزام انما انتى احنا محدش فينا ازهر يعني البيئة اللي هي عايشة فيها مختلفة عن اللي انتى عايشة فيها ومع ذلك انتى بمجرد معرفتي فضل السنن وصلاة الفجر بقيتي بتحاولي تلتزمى بيهم يعني عايزة تقربي من ربنا
ربنا يا حبيبتي مبيقارناش بحد هيحاسبنا عن نفسنا
هيقارنا بنفسنا
ياسمين بتساؤل :يقارنا بنفسنا ازاي يعني
امل :يعني احنا كل واحد فينا يقدر يعمل الخير ويقدر يعمل الشر يقدر يشتغل علي نفسه ويتعب علشان يبقي احسن نسخة منه احسن شخصية ممكن يكونها برغم الظروف وبرغم شيطانه ونفسه الامارة بالسوء
وبرضه يقدر يبقي اسوء نسخة منه اسوء شخصية ممكن يكونها ويستسلم بقي لنفسه ولشيطانه ولظروفه ولصحابه لو كانو مش كويسين
ربنا هيكافئك بالجنة طول ما انتى بتقاومى وبتحاولي تبقي احسن وتتصرفي صح مش هيقارنك بحد يا ياسمين او هيبقي بعد الشر مصيرك النار لو بطلتي تقاومى بطلتي تحاولي تعملي اللي يرضيه سبحانه وتعالي
ياسمين :خلاص يا ماما انا مش هقارنى بحد انا هقارنى بنفسي وهتحدى نفسي ياسمين هتنافس ياسمين
امل :بالظبط كده يا ياسمينتى الحلوة
افضلي بتزاكرى وافضلي بتظبطى المنبه علشان تصحي للفجر وافضلي بتحاولي تلتزمى بالسنن
وحبي اصحابك يا حبيبتي ومتقارنيش نفسك بيهم بالطريقة دى لان كل واحدة فيكم ليها مميزاتها وليها عيوبها ليها شخصيتها المستقلة والمقارنة بينكم هتكون مش عادلة واخرتها هتبقي انك هتبعدى عنهم او هتكرهيهم
ياسمين :حاضر يا ماما
امل: كمان بعد كده انا هصحي معاكى نصلي الفجر سوا اتفقنا
ياسمين بسعادة:اتفقنا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى بدون حساب ولا سابقة عذاب هو وموتى المسلمين جميعا خصوصا من زال اثره فلم يذره زائر ولم يذكره ذاكر
