اربعة وتسعين في المية يا عالم اربعة وتسعين في المية يا هوووو صرخت سلمى وهي بتتنطط من الفرحة
بابا سجد شكر لله وماما اتهورت وعملتلى الحمام اللي طلباه منها من شهر احتفالا بمجموعي
انا عارفة انى مش من اوائل الجمهورية يعني علشان الفرحة دي كلها بس اصل اللي حصل ده يكاد يكون معجزة ليه بقي
لانى بكرة المذاكرة بجد ربنا خلقني شخص مبعرفش اذاكر
انا وبابا وماما استخدمنا كل الطرق اللي استخدموها اللي في ثانوية عامة منذ بدء الخليقة علشان المجموع ده كده انا هدخل هندسة علي الحركرك يعني مش اعلي منها بكتير بس برضه المهم اني هدخل هندسة
بابا مش معلق عليا امال جامدة بصراحة انا عارفة انى استاهل بس الحمد لله الفراغ الدراسي اللي انا عملاه اختي ليلى بتعوضه البنت بتحب المذاكرة يومها مبيكملش غير بالمذاكرة دخلت طب وهي حاطة رجل علي رجل مجموعها كان حاجة عادية ومتوقعة تسعة وتسعين ونص هي اكبر مني بسنتين
المهم انى هخش هندسة وبابا فرحان وماما كمان الحمد لله
بعد شهر من الدراسة كنت رايحة الكلية لقيت السكة الحديد مقفولة لان في قطر جاي بصيت لقيته بعيد شوية هلحق اعدى
ولسه هخطي برجلي معرفتش ببص ورايا لقيت حد ماسك شنطة الضهر اللي انا لبساها بصتله علشان ازعق بقي واتخانق بس طلع عبقرينو جارنا
علي :رايحة فين انتي خافي علي نفسك ولا تلقو بايديكم الي التهلكة يعني
سلمي :طب التهلكة عدت قصدى القطر ممكن بقي تسيب الشنطة الناس تقول ايه وانت عافقني منها كده
علي :اه مخدتش بالي انى لسه ماسكها بعد كده خلي بالك واستني مش هيجرى حاجة لو وقفتي دقيقة
مشي عبقرينو جارنا اخر سنة هندسة السنة دي الاول علي محافظتنا ثانوية عامة داخل هندسة بمجموع تسعة وتسعين في المية خمسة في المية فرق مش كبير بينا صح بابا بيتكلم عنه كتير الصراحة بابا والمدرسين والجيران دايما يقارنو بينه وبين طلاب العلم في كل بقاع الارض علشان كده سميته عبقرينو هو ميعرفنيش اوي ويمكن ميعرفنيش اصلا
خلصت اول سنة في الكلية بالعافية وحبا اوجه كل الشكر للانسان المحترم اللي اقترح وضع درجات الرافة في الكلية ساعدني كتير بصراحة لولاه كان زمان مسيرتي التعليمية وقفت ووقت مكنت انا بحارب علشان انجح في اول سنة
عبقرينو كان طلع التاني عالدفعة واتعين معيد بعد معرفت تقديراته وشفت مشروع التخرج بتاعه في الكلية حسيت انه كان المفروض يبقي عميد الكلية بامانة
كان معيد بيدى اول سنة
عدت تاني سنة وتالت سنة ليا في الكلية وحبا اكرر شكرى تاني لدرجات الرأفة واقفة جنبي وقفت رجالة بصراحة
طلعت رابع سنة لقيت عبقرينو معيد عندى في مادة
ابن الذينا عبقرينو بجد مش بس ذكى وبيحب المذاكرة لا كمان شرحه تحفة انا فهمت منه انا واغلب الدفعة بيشرح بثقة كده تحس انه بيدرسلنا قوانين ونظريات هو الي اخترعها من كتر ما هو شاطر فيها وبيشرحها بمنتهي السهولة
انا مبحبش المذاكرة بس بكرة الغياب فعلا مبحبش اغيب لا من مدرسة ودروس قبل كده ولا من محاضرات وسكاشن في الكلية وده اللي بيعوض مذاكرتي النص كم اه كمان كنت بروح تدريبات في الاجازة بالمناسبة انا دخلت قسم اتصالات لانى حسيته اكتر قسم محتاج فهم وتفتيح مخ درجات الرافة كانت بتنفعني في اي مادة ليها نظرى او قوانين لازم تكون محفوظة
المهم خلصت سنة رابعة كمان وكده باقيلي سنة التخرج واخد افراج بقي
عبدالله :سلمي انتي صاحية
سلمى :ايوه يا بابا اتفضل
عبدالله :اخبارك ايه
سلمي :تمام الحمد لله
عبدالله :جهزى نفسك كمان يومين في عريس هيجي تشوفيه
سلمي :اسمه ايه وانا اعرفه
عبدالله :اه تعرفيه على سالم جارنا ومعيد عندك في الكلية
سلمي :متقدم لمين بقي
عبدالله :ما قلت ليكي
سلمي :بابا اكيد انت متلغبط يمكن كان قصده ليلى
عبدالله :لا هو قال انتي
خرج بابا وفضلت انا افكر عبقرينو متقدملي ازاي يعني فضلت مستغربة ومستنية اليومين يعدو علشان افهم منه
عدو اليومين وجه ميعاد عبقرينو
دخلت لما بابا نداني كان جاي لوحده لانها اول مرة
بابا خرج البلكونة يتكلم في التليفون وسبنا نتكلم
علي :اخبارك ايه يا سلمي
سلمى :الحمد لله تمام
علي :طبعا انتي عارفة انا جاي ليه النهاردة تحبي تبداي انتي ولا ابدء انا
سلمى :هبدء انا هو انت جاي تتقدملي بجد يعني جاي تطلب ايدى بحق وحقيقي
علي :ايوه طبعا هي الحاجات دى فيها هزار
سلمي :انت عارفني شفت تقديرى العام عن السنين الي فاتت في الكلية طيب
علي :تقدير عام ايه هو انا بعملك انترفيو في شركة انا مالي ومال تقديرك العام
انا شفت انك مناسبة بالنسبالى واهلك طبعا لا غبار عليهم فتقدمت
سلمي :مناسبة ليك من حيث ايه معلش
علي : اخلاقك وتربيتك ما شاء الله كمان في الكلية مبتخطلتيش مع الولاد غير في حدود الدراسة بس
وبتساعدى اي حد يطلب منك مساعدة لبسك تمام جدا ومبتحطيش مكياج خالص شفتك كتير خارجة من الجامع في اوقات الصلاة سنا الفرق بينا تمام وشكلك انا مرتضيه جدا ومن الكلية لما درستلك كمان فكريا انتي ما شاء الله مداركك واسعة بتناقشينى وبتسالي في حاجات مهمة وبتفهمى بسرعة
انا بقالي تلت شهور بفكر في الموضوع ومركز معاكي ومع تصرفاتك واستخرت والحمد لله ارتحت وبعدها كلمت عمي عبدالله طلبت منه ميعاد وطبعا لو حصل نصيب فترة الخطوبة هتكون فرصة اعرفك اكتر وتعرفيني انتي كمان
ده بالنسبالي انتي بقي مش عايزة تساليني في اي حاجة عني
سلمي :بصراحة انا مكنتش مستوعبة اللي حصل فمجهزتش اي اسئلة ولا في دماغي دلوقتي اي سؤال ممكن ناجل بقية كلامنا بكرة
علي ضحك:للدرجة دى الموضوع غريب بالنسبالك
تمام انا همشي دلوقتي وهستاذن عمى انى اجي تانى بكرة
سلمى :متشكرة جدا بعد اذنك
دخلت اوضتي وافتكرت كل اللي قاله عبقرينو قال عني كل ده واستخار ربنا فيا وارتاح كمان ده انا طلعت جامدة جدا بقي ومش هينة
قررت اعمل زيه واستخير ربنا فيه حسيت براحة شوية ومكنتش خايفة ولا مقبوضة
فكرت كتير في اللي ممكن اسالهوله ونمت وانا بفكر
قمت من النوم مرتاحة ومتحمسة اوى لاننا نكمل كلامنا
جه عبقرينو وبابا للمرة التانية خرج يعمل مكالمة في البلكونة
علي :اظن عندك اسئلة بقي دلوقتي
سلمي :اه اول سؤال انا اول حد تتقدمله
علي :لا كان فيه واحدة قريبتنا ماما قالتلي عليها بس متفقناش لما شفتها واتكلمت معاها حسيت دماغنا مش راكبة مع بعضها ومكنتش مرتاح وبابا كان كلمنى عن بنت صاحبه بس دى مشفتهاش حتي انا اكبر منها بكتير البنت لسه ثانوية عامة صغيرة علي موضوع الخطوبة ده
سلمى :الجواز ايه من وجهة نظرك
علي :سنة الحياة وسكن ومودة ورحمة كمان صداقة صداقة قوية انا معنديش صحاب حبي للدراسة والوقت الطويل اللي بقضيه في المذاكرة خلي الولاد اللي مقضينها ميشفونيش انفع صاحب ليهم واللي ليهم في المزاكرة ياما مبيطقونيش اصلا يبيكلموني علشان مصلحتهم يعني برضه مش صحاب عايز انا ومراتي نكون اعز اصحاب بالنسبة لبعض
سلمى :وانت شايف اننا ممكن نكون صحاب
علي :جداااااا انتي الكلام معاكي سهل بالنسبالي مش محتاج تفكير كتير ولا حاسس بملل ودى حاجة انا محستهاش مع اي بنت اتكلمت معاها قبل كده واتمني يكون ده احساسك
سؤال انا بقي هو ده مش احساسك قالها علي بتوتر هو انتي شايفاني ازاي
سلمي لنفسها عبقرينو متوتر وهو بيسالني عن رايي فيه مش مصدقة نفسي يا جدعان
بعدين قالتله بصراحة طول عمرى شايفاك عبقرينو
علي باستغراب :عبقرينو ؟!!
سلمي :اه عبقرينو ذكي ومخك يتاقل بالذهب كل المدرسين بيحبوك وفخورين بيك ابويا نفسه بيحبك وفخور بيك يمكن اكتر مني لما دخلت الكلية اتاكدت بنفسي انك عبقرينو وانك بتعمل حاجة انت مش بس شاطر فيها لا انت كمان بتحبها احترمتك اوي ساعتها والجانب اللي اكتشفته فيك امبارح والنهاردة عرفني انك معندكش عقلين ونص قلب بس ولا حاجة زي ما كنت مفكرة وانك بتفكر في حاجات تانية غير الدراسة والشغل وانك كمان عايز تعمل حاجات تانية غيرهم
علي :وبتساليني اذا كنت شايف اننا ممكن نبقي اصحاب ده سؤال برضه
سلمي :بابا تقريبا نسينا هروح اندهله
علي :ليه بس ما احنا بنتكلم
سلمي بابتسامة :الجايات كتير الجايات كتير اوى
