يا كل الحكاية يا اصل الجمال
انتى نصى التانى انتى ام العيال
قربى منك فرض وبعدى عنك محال
قريتها تلت اربع عشر مرات كده لحد ما حفظتها
وبعدين دخلتله عالماسينجر
جميلة :ام العيال خلاص خلتني ام العيال انا يا ياسين ده انا لسه فى الشهر التالت واحنا مبقلناش سنة متجوزين
ده الكلام اللي لما قريته حسيت انه بيعبر عني فعملتلي منشن
ياسين :ايه رايك جامد صح
يا ستى هيجو العيال وهتبقى امهم وهبقي ابوهم متقاطعيش انتى بس وبعدين مانا عملت منشن بس ومكتبتش حاجة وانتي عملتى احببته كالعادة وداخلة تقوليلي رايك هنا ومش قدام الناس علشان دى مشاعرنا وخاصة بينا ومش المفروض نعبر عنها قدام الناس كده صح كده حفظتها اهوه
جميلة :وكمان علشان محدش يقرا حاجة كتبنها فنقلب عليه مواجع
ولا نتنش عين انا وانت
برافو يا حبيبي بتتعلم بسرعة
بس والله انا حتى لو حبيت ارد عليك في التعليق مكنت هلاقي حاجة اقولها بكلمك بامانة
ياسين :من حلاوة الكلام صح انا قلت انه هيعجبك
بصي انا لازم اقفل دلوقتي نتكلم بعدين
جميلة :ماشي خلي بالك من نفسك
انا جميلة اربعة وعشرين سنة متجوزة من عشر شهور
انا رومانسية اوى قرءت روايات بعدد شعر راسي كل بيدجات احتواء واحتياج والحاجات دى عملالها سي فرست بقرء شعر كتير وبحب الشعر جدا صحابي مسمينى جولييت من كتر ما شايفنى بافور في مشاعرى وفي كلامى عن الحب
انا كان نفسي اتجوز واحد رومانسي كده زيى ويا سلام بقي لو يكون كاتب يكتب فيا شعر يقولي بحبك بمليون طريقة ويعبر عن احساسه بيا طول الوقت
روميو كنت مستنية روميو اللي هيحبنى اول ميشوفنى ويتحدى اهله واهلي علشان خاطر حبنا
ياسين قريبي والده يبقي ابن عم بابا يعنى يعتبر ابن عمى علاقتنا كانت عادية بصراحة مكنتش شايفة ياسين اكتر من ابن عمى كان بعيد خالص عن روميو اللي انا مستنياه ومكنتش متخيلة اننا نتجوز انا وهو لما كنت بتخيل مين ممكن اتجوزه من الناس اللي اعرفهم طبعا كنت بلاقى كلهم مش مناسبين بس ياسين بقي مكنش بيجى في دماغي اصلا لانه بالظبط عكس روميو احلامى ياسين عملي جدا مش رومانسي خالص كلامه ياما في الهندسة يا في الكورة ياما هزار مقراش رواية في حياته وطبعا ميعرفش اي حاجة عن بحور الشعر
بعد ما كنت رفضت بتاع اتناشر عريس اتقدمولي علشان محدش فيهم نص روميو احلامى حتى
يأست وقررت اسيب روميو لجوليت بقي وخلينى انا في الواقع البائس بتاعي اتقدم واحد وقعدت معاه وانا مش مستنية اشوف فيه روميو ولا حاجة بس مرتاحتش فرفضته وبعدها بقي اتقدم ياسين اكبر منى بست سنين ابن عمى واخلاقه الكل بيحلف بيها راجل وشايل مسئولية نفسه شاطر في شغله علاقته باهله كويسة جدا طلعت روميو من حساباتى وانا بفكر في ياسين لقيته ميترفضش فقبلت واتخطبنا تمن شهور وبعدين اتجوزنا
ياسين واحنا مخطوبين كان بيجبلي روايات كتير ودواوين شعر هدية مكنش بيقراهم وفي الغالب كان بيسال نيفين اخته يجبلي ايه بس المهم انه قدر حبي ليهم وكان بيجبهم
انا بقي لما عرفت قد ايه هو بيحب البلايستيشن خليت الواد سيف اخويا يعلمهالي ولما اتجوزنا فجأته انى جبت بلايستيشن نلعب عليها سوا كنت بلعب معاه كورة وسباق عربيات ومصارعة والعاب قتالية علشان هو بيحبها
انا كجميلة ايام ما كنت بلعب كنت بلعب العاب باربي والمطبخ وتلبيس الموديلز دى
ياسين بعد جوازنا بقي بيعملى منشن لما يقرء حاجة عالنت وتفكره بيا او يحس انها هتعجبني طبعا الحاجات اللي بيعملي فيها منشن مش بتبقي زوقي في اوقات كتير بس بحبهم كفاية انه عملي فيها منشن
انا بقى مع انه مليش في الكورة واخر معلوماتى عنها انها مستطيلة بقيت بتفرج معاه عالماتشات ومتابعة معاه الدورى الانجليزى والاوربي
وعرفت ان كريستيانو ورونالدو شخص واحد مش شخصين زى ما كنت مفكرة
بتفرج مع ياسين بس انما وهو مش موجود مبتفرجش انا مبحبش الكورة انا بتفرج معاه علشان هو بيحبها
ياسين مبيقوليش بحبك كتير مش زى الروايات
اللي هو يصحي صباح الخير بحبك يرجع من الشغل حطيلنا لقمة ناكلها بحبك
لا خالص بحبك ياسين بيقولها لما يكون حاسس بحاجة متعبرش عنها غير كلمة بحبك في مواقف مهمة الكلمة عنده ليها قيمتها كده
لما بيرجع من الشغل بعد غياب بالمناسبة ياسين مهندس بترول بيقضي في شغله تلت اسابيع وبيقضى معايا اسبوع
لما بوحشه مبيبعتليش رسالة" يقولي لا بارك الله في الدنيا اذا انقطعت اسباب دنياك من اسباب دنيايا "انا بحب الجملة دى جدا وياسين تقريبا ميعرفهاش من اصله
بس بيكلمنى يطمن عليا ولما يرجع البيت بيقولي وحشتيني احساسه وصدقه وهو بيقولها عندى احلي الف مرة من كل كلام الاشتياق اللي قريته في حياتى
ياسين مبيقوليش انا مقدرش اعيش من غيرك ولا بيقولي حياتى من غيرك ملهاش قيمة
بس في مرة اختى سارة كانت بايتة عندنا في بيت بابا يومين استأذنت ياسين ابات معاها وهو وافق بس الساعة حداشر باليل كلمنى
ياسين : جميلة هو انتي لازم تباتى عندك اوى يعنى
جميلة بفرحة :لا مش لازم تعالي خدنى
ياسين :مسافة السكة هكون عندك
وجه وخدنى ومشينا واحنا مروحين
ياسين :لما رجعت البيت لقيتك مش فيه قلت هخرج مع اصحابي وارجع عالنوم وبعدين اروح لاهلي اتغدى معاهم وبعدين اعدى عليكى عند اهلك وعادى الوقت هيعدى مجتش من ليلة يعنى
بس بصراحة فضلت قاعد افكر انى لو رجعت البيت مش هلاقيكى فيه ومكنتش مركز مع اصحابي خالص قمت مشيت روحت البيت دخلته حسيته رخم من غيرك وبعد عشر دقايق كنت مكلمك هى سارة زعلت انك مشيتى
جميلة بابتسامة :لا انا قلتلها اننا هنيجى بكرة من بدرى نقضي اليوم معاهم ايه رايك
ياسين :تمام وبعدين نروح لاهلي سوا
مع ياسين اتعلمت اقرء الحب من الافعال
ياسين مبيقوليش بحبك بمليون طريقة بس بيعبر عنها بمليون فعل
مبيتكلمش عنى كتير بس مبيعملش حاجة من غيرى
بنروح لاهله سوا ونروح لاهلي سوا حتى اصحابه بيحاول مينساش نفسه معاهم علشان مفضلش لوحدى بس انا قلتله براحته انا كفاية عليا انه بيراعينى اوى كده بس مهما كان يعنى هو ليه صحاب وحقو يقعد معاهم ويرفه عن نفسه
بنتخانق عادى ولو زعلني مبيعرفش يجى يقولي اسف حقك عليا بيفضل يلف حوالين منى اعملى شاي اكويلي القميص الابيض فردة الشراب الكحلي مش لاقيها دورى عليها وانا بعمل اللي هو عايزه من سكات يقوم ضاربني علي راسي من ورا ويقولي خلاص بقي ميبقاش قلبك اسود فكى المية وحداشر دى واضحكي بقي وبضحك وانسي
ولما انا ازعله بجيب سى دى لعبة بلايستيشن من اللى هو بيحبها فيصالحنى في ظرف عشر ثوانى
ياسين روميو بجد روميو الواقع مش الاحلام
روميو الافعال مش الكلام
كفاية انه مقدرنى وعمره مغلط في حقي غلط مقدرش اسامحه عليه
ولا زعلنى زعل كبير منساهوش مجرد ميقولي عديها وفكى المية وحداشر دى واضحكى
ياسين مبيتكلمش بحب بس بيتصرف بحب وده المهم وده اللي بيدوم وبيعمر البيوت
انا بحب ياسين وبحب حب ياسين ليا وبحب افعاله اللي كلها حب
وبحب المرات اللي بيعبر فيها عن حبه بكلام وبستناهم وبيدخلو قلبى مبيطلعوش منه
بحبه زى ما هو كده بالنسبالي هو روميو واحلي واغلي عندى من روميو كمان
اما اعملو منشن انا كمان ايدى بتاكلنى وحسا انى عايزة اقوله بحبك ايوه هي دى همنشنله فيها
هدور علي نفسي جواك
هتبقي حقيقتى واحلامى
واقولك تالت وعاشر بهواك
واعيدها وازيدها من تانى💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
