شهد :يعنى انت طلبت منى تشوفنى علشان تحكيلى اللى مضايقك بس
نادر :اه اومال هطلب اشوفك ليه
شهد باحباط :انا فكرت انك..اقولك مش مهم تعالى نروح ام حسن نضرب طاجن بامية باللحمة انت بتحبه
نادر بابتسامة :احلى حاجة فيكى انك بتفهمينى يلا بينا نروح نتغدى
شهد :اوحش حاجة ان انا وبس اللى بفهمك
نادر :انتى خطيبتى ازاى انك الوحيدة اللى بتفهمينى حاجة وحشة هو المفروض واحدة غيرك تفهمنى
شهد :لا
نادر :لما هو لا بتقولى كده ليه
شهد :متاخدش فى بالك يلا نروح ناكل
نادر :يلا انا جعان اوى
بعد تلت شهور
نادر بصدمة :انتى عملتى ايه
شهد :قلعت الدبلة اتفضل دبلتك اهيه وشبكتك كمان كان نفسى اجبلك هداياك بس للاسف انت مجبتليش ولا هدية واحدة بس حتى مع انى جبتلك فى عيد ميلادك ولما اترقيت فى شغلك كنت بستغل اى فرصة تحصل علشان اهاديك وانت عمرك ما فكرت تهادينى انت بخيل اوى على فكرة
نادر :انا مش بخيل يا شهد انا جبت الشبكة اللى اتفقنا عليها واكتر كمان ولما بنخرج بوديكى اماكن غالية ولما..
شهد :مش بخيل فى فلوسك يا نادر انت بخيل فى مشاعرك بخيل فى اهتمامك لسانك بخيل فى الكلام الحلو البخل مش بخل فلوس بس بخل القلوب اصعب من بخل الفلوس وانت قلبك بخيل اوى
وانا مش هقدر اتحمل اكتر من كده تسع شهور مخطوبين تسع شهور وانا بهتم بكل حاجة تخصك بتقول انى بفهمك لا انا بهتم باى حاجة ليها علاقة بيك وعلشان كده بقيت عارفاك وفهماك بس انت معملتش زيى لا اهتميت بحاجة تخصنى ولا اهتميت بيا تسع شهور وانا بزرع فى ارض بور وخلاص كفاية كده انا تعبت
نادر :تعبتى منى انا ليه انا عملتلك ايه انا لا خونتك ولا عرفت عليكى واحدة وانا خاطبك
شهد :المشكلة انك معملتليش اى حاجة يا نادر مع انى عملت علشانك كتير اوى
انا دايما بكون جمبك لما تكون مضايق انت عمرك كنت معايا وانا مضايقة كام مرة اكلمك وانا مخنوقة وتقفل بسرعة علشان وراك شغل او فى خروجة مع اصحابك
انا دايما بضحكك لما تكون قافش او مزاجك وحش كام مرة انت ضحكتنى وفرقلك انى مزاجى يتحسن
خلاص كفاية كده
نادر :مش هتعرفى تبعدى عنى انتى بتحبينى
شهد :اه هو ده اللى كان مخليك بتتصرف معايا كده بقلب جامد علشان مطمن انى بحبك مطمن ومعتمد على حبى اللى انت مقدرتوش ومفكر انه هيفضل ويستمر فى حين انك مقدرتوش مفيش حاجة بتستمر لو متقدرتش يا نادر
وحبى اللى انت معتمد عليه ده مش كفاية يخلينى اكمل معاك وادينى هسيبك اهو
نادر :هتتوجعى
شهد :هتوجع قد ايه شهر اتنين سنة حتى اهى ارحم من وجع العمر كله مع انسان قلبه بخيل وانانى زيك
نادر :هتندمى
شهد :لا بالعكس انت اللى هتندم
هتندم انك مقدرتنيش وخسرتنى اصلى معملتش معاك غير كل خير قدمتلك كل حاجة حلوة علشان كده انت هتندم عليا انما انا مش هندم عليك لانك معملتش علشانى اى حاجة حلوة انت كنت بتاخد منى بس بتستغلنى يعنى واكيد مش هندم علشان سيبت واحد بيستغلنى
انا حتى وانا بسيبك بسيبك بهدوء واحترام علشان متلاقيش اى ذكرى وحشة ليك معايا تفتكرها بالعكس تبقى ذكرياتك معايا كلها ذكريات حلوة وكويسة علشان تندم اكتر
التقدير اللى مقدرتهوليش وانا معاك هتقدرهولى بعد ما اسيبك لما متلاقيش واحدة زيى
نادر :مكنتش اعرف انك بالغرور ده كله
شهد :انا مش مغرورة انا بس عارفة قيمة نفسى انت اللى معرفتش قيمتى بس معلش بكرة الايام تربيك وتعرفك قيمتى وتاخدلى حقى منك
نادر :انتى ازاى تكلمينى كده
شهد :انا مش عايزة اتكلم معاك اصلا يا نادر كفاية عليك كده انا همشى اتمنى مشوفكش تانى فى حياتى
