اسماء:انا فرحانة اوى يا ادم انا حامل في تؤام زي ما اتمنيت مش مصدقة نفسي الحمد لله
ادم :الحمد لله يا حبيبتي تعالى نقعد عالكورنيش بقي ونضرب حمص شام بقالنا كتير معملنهاش
اسماء :موافقة جدا
عالكورنيش
اسماء :بص شكلهم حلو ازاي الولاد والبنات اللي حوالينا
الحب ده حاجة حلوة اوى يا ادم
ادم :هو الحب حلو بس لما يكون قدام اهل الي بحبها مش من وراهم كده اللي بيحب حد بيخاف عليه مش يخليه يخون ثقة ربنا فيه وثقة اهله
الحب اللي بجد يبقي في النور قدام الناس كلها واولهم اهل اللي بحبها مش في الضلمة وبعيد عن عين اي حد نعرفه
اسماء:معاك حق بس حلوة هحب في النور قدام اهل اللي بحبها دي عجبتني
قلي بقي انت حبتني ازاي انا لما اتقدمتلي اتفاجات بقالي سنين قدامك ومكنتش بتقولي صباح الخير حتي
ادم :بسبب نهى اختي
اسماء :نعععععم لا سمعنى تانى كده علشان شكلي هيتم ولادى من قبل ما يجو وارميك في الميا واخلص
ادم :يا بنتي اهدى واسمعيني
علاقتك بنهي اختي هي السبب صداقتكم القوية هي البداية
نهى طول الوقت بتتكلم عنك اسماء عملت اسماء قالت
ولما بتكون تعبانة دايما الاقيكى تانى يوم عندنا
وقت مظهرت نتيجة الثانوية العامة نهي كانت حالتها وحشة خصوصا ان بابا وماما لاموها كتير علي مجموعها واتهموها بالاهمال هي بقي كانت بتسمعهم وساكتة مبكتش معملتش حاجة حاولت اكلمها اهون عليها مقدرتش برضه
الساعة تلاتة الفجر يومها لقيتها بتكلمك وهي بتبكى وبتقولك انها تعبت وعملت اللي عليها وان كلام بابا وماما ضايقها وكل ما تتكلم اكتر بكاها يزيد فضلت ربع ساعة تبكي وبعدين لقيتها بتحمد ربنا وبتقولك انها عارفة انك معاها مهما حصل وانها هتقوم تصلي الفجر وتنام زي ما قلتلها
وتاني يوم لما رجعت من الشغل لقيتها احسن كتير ومعاها شيكولاتة كتير بتاكلها قالت انك جبتيهالها هي وعروسة كيتي كانت فرحانة بيها وقالتلي وهي مبسوطة انك اتكلمتى مع ماما وفكرتيها بان نهي تعبت وذاكرت وان المجموع ده رزق من عند ربنا وان اهم حاجة نهي بخير وهزرتي معاها لحد ما ماما بقيت تمام
انا عارف ان ماما وبابا بيحبوكى علشان كده بيسيبو نهي تجيلك البيت وعمرهم ما حاولو يبعدوها عنك
اسماء :طيب ده كان وقت الثانوية العامة وانت اتقدمتلي بعدها باربع سنين وبرضه انت في الوقت ده مكنتش بتتعامل معايا غير اذيك الحمد لله ده لو قلتها اساسا
ادم :انا في الوقت ده انتى كنتى بالنسبالي صاحبة اختي وخلاص محترمة وكويسة وزي الفل بس ده ميخصنيش
لحد ما كنت بتكلم في مرة مع واحد صاحبي
علي :تعبت يا ادم زهقونى والله خطيببتي مش طايقة اختي واختي مش قابلة خطيبتي واقفين لبعض عالواحدة وقارفني
ادم :انت مش قلتلي انهم قريبين من بعض في السن متخليهم يتصاحبو يا علي
علي :يتصاحبو ايه بس بقولك مش طايقين بعض
ادم :طيب انت اتكلم مع خطيبتك خليها تقرب من اختك تصاحبها وتقرب من اهلك كمان وتعتبرهم اهلها
ساعتها اختك هتحبها وتطمن انها مش عايزة تاخدك منهم ولا حاجة وترتاح انت من الهم ده
علي :نيرمين تعمل اللي انت بتقوله ده يبنى هي عارفة تقرب منى علشان تعرف تقرب من اختي وكمان عايزها تقرب من اهلي دى متعرفش اسم امى لحد دلوقتى ومقضياها يا طنط
ادم :وانت ازاي تقبل بيها وهي كده
علي :يا باشا كله كده اللي انت بتتكلم فيه ده مش موجود في مصر مين بتعمل اللي انت بتقوله ده دلوقتى مفيش يابا
ادم :لا في اكيد مش كلهم زى خطيبتك يعني
علي :والله لو تعرف واحدة كده عرفنى عليها وانا الصبح اكون سايب نيرمين وخاطبها
يا ادم انت لسه مخطبتش متعليش سقف احلامك كده لا يقع فوق راسك يا حبيبى استهدى بالله كده وفكر بالعقل وكفاية احلام الله يباركلك متقلبش عليا المواجع
يلا هقوم انا اكمل شغل بدل ما المدير يجي يخصملي وتبقي كده كملت بجد
وفضلت افكر انا في كلام على وجيتى في بالي ساعتها يا اسماء علاقتك بنهى وباهلي الي بدءت من المدرسة ومستمرة لحد دلوقتي بس مخدتش قرار فضلت بفكر ومتردد شوية
لحد ما سمعت نهي بتتكلم في الموبايل
نهي :اخيرا يبنتي لقد هرمنا من اجل هذه اللحظة هتتخطبي واجي بقي خطوبتك اكل جاتوه واشرب حاجة ساقعة ببلاش
مليون مبروك يا قلبي فرحتلك والله ماشي ابعتيلي صور الفساتين وهختار معاكى ماشي هقفل وابعتيهم علي طول سلام
ادم بتوتر :هي مين اللي هتتخطب دى يا نهى
نهى :واحدة صاحبتي
ادم :ايوه مين يعني اسمها ايه
نهي :اسمها امل
ادم بابتسامة :امل
نهي :اه امل كمان انت من امتى بتسال عن صحابي يعني
ادم :عادى يبنتي يلا مبروك لامل ربنا يتمملها علي خير
حمدت ربنا انها مش انتى واستخرت ربنا وحسيت انى مرتاح
ولما قلت لاهلي انى عايز اخطبك
بابا قالي يا زين ما اخترت
وماما قالتلي لو مكنتش قلت انا اللي كنت هقولك تخطبها اسماء بنت مفيش زيها حرام تضيع من ايدنا
ونهي فتحلتي فيش وتشبيه ليه وازاى وكان ناقص تقولي استني لما اسال عليك واتطمن علي اخلاقك الاول كأنى مش اخوها الجذمة
واتقدمتلك بقي انت وافقتي ساعتها ليه طيب
اسماء :لما اتقدمتلي واتكلمنا انا وانت بصراحة مكنتش قادرة اخد قرار استخرت بس مكنتش حاسة بحاجة لا مقبوضة ولا فرحانة فقلت نتخطب ويمكن مع الوقت ارتاح خصوصا انى اعرفك واعرف اهلك دى كانت حاجة مطمنانى ولما اتخطبنا عرفتك اكتر وحبيتك بأة ولما اتجوزنا حبيتك اكتر
ادم :انا اتحب اصلا
اسماء :حسبى الله ونعم الوكيل
ادم يا ابن ام ادم راعي انى حامل والزعل والعصبية غلط عليا خاف عليا بلاش عليا خاف علي ولادك طيب ومتشلنيش بردودك دي
ادم :ايه يا سو بهزر معاكى
يا ستى انا بقي مش حبيتك لا انا عشقتك وكل ما الوقت بيعدى بتاكد انك احلي وافضل اختيار اخترته في حياتى
وانك كتير عليا والله ومهما قلت مش هوفيكي حقك
علي اللي بتعمليه معايا ومع اهلي ومع اهلك انتي كمان انتى مش مقصرة في حق اي حد فينا
انا بجد مش عارف انا عملت ايه في حياتى استاهل عليه حاجة حلوة كده زيك بس الحمد لله والله علي نعمة وجودك يا اسماء
اسماء ببكاء :يعنى انت يتشلنى بردودك يتخليني ابكى وانا حامل وهرمونات الحمل مبهدلانى اصلا
طب اقلك ايه انا طيب بعد اللي انت قلته ده مش لاقية حاجة تعبر والله
تسلملي يا ادم تسلملي وتسلم لولادنا اللي حاين دول ومنتحرمش منك ابدا يا رب
ادم:ولا انا اتحرم منك ابدا يا رب يا اسماء💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
