اية :انت مقلوب عليا ليه
احمد :مقلوب عليكى..دى كلمة واحدة تقولها لخطيبها خاطب واحد صاحبى انا
اية :والله انا قبل ما اكون خطيبتك انا بنت خالتك ومتربين سوا وده اسلوبى ومش جديد عليك
احمد :واسلوبك ده مش مريحنى
اية :ايووووه مربط الفرس هو مش مريحنى دى جد ايه خلا اسلوبي مش مريحك حصل ايه خلانى كلى على بعضى كده مش عجباك وكل كلامك ليا انتقاد احمد انت..انت فى فى حياتك واحدة غيرى
احمد :ايه اللى انتى بتقوليه ده
اية :ده التفسير لكل تصرفاتك وكلامك ليا انت دخلت حياتك واحدة مميزاتها خليتك تركز مع عيوبى صح
احمد :لا..طبعا لا بس انا مش مرتاح يا اية
اية :مش مرتاح..احنا مخطوبين من ست شهور مقرى فتحتنا من خمس سنين فرحنا كمان تلت شهور وجاى دلوقتى تقولى مش مرتاح حصل ايه بقى قل راحتك
احمد :محصلش
اية وهى بتقلع الدبلة :وانا ميرضنيش تكون مش مرتاح يا ابن خالتى ولا اقبلها على نفسي اكون مع واحد مش مرتاح معايا وبيتمنالى الرضا
احمد :انا..
اية قاطعته :مش هيفرق معايا حاجة هتقولها هى خلاص خلصت كده
بعد يومين
رامز :صباح الخير يا اية
اية :صباح النور
رامز :ايه ده امال فين دبلتك
اية بانفعال :قلعتها الخطوبة اتفسخت ربنا ريحه منى اه الخطوبة اتفسخت قبل الفرح بتلت شهور ها جاوبت سؤالك ولا لسه عندك سؤال تانى تساله تتحشر بيه فى اللى ملكش فيه
وسيبته ومشيت انا عارفة انى ممكن اكون زودتها بكلامى هو مش ممكن هو اكيد انا زودتها بس اصل بصراحة انا كنت تعبت من كتر مانا بتكلم فى الموضوع مع اهلى واصحابي واى حد بيعرف ان خطوبتى اتفسخت
هو ملوش ذنب بس انا كنت على اخرى وادينى انفجرت فيه وسيبته ومشيت رجعت بيتنا دخلت اوضتى فضلت اعيط
انا مش فاهمة ازاى احمد يعمل كده حلم سنين يهده فى لحظة احمد يبقي ابن خالتى اكبر منى بتلت سنين امى وخالتى روحهم فى بعض ومعندهمش اخوات غير بعض ومن صغرنا وهما بيقولو احمد لاية واية لاحمد انا كبرت على كلامهم ده وبالتالى بقي قناعة عندى ثابت من الثوابت فى الدنيا زى ان الشمس بتطلع بالنهار والقمر بيطلع باليل
مجرد مدخلت جامعة قرينا الفاتحة علشان محدش يتقدملى علشان ابقى محجوزاله ولما خلصت الجامعة اتخطبنا
احمد عنده اخت واحدة وانا عندى تلت اخوات رجالة اكبر منى لانى اخر العنقود يمكن علشان كده تعاملى ناشف شوية ومنيش بنت رقيقة ومسهوكة بس انا طول عمرى كده واحمد عارف ومكنش عنده مشكلة فى ده بس من شهرين بقا عنده مشكلة دايما بينتقدنى انتى ازاى تقولى كده انتى ازاى تعملى كده انا حاسس انى خاطب واحد صاحبي الكلمة دى بيقولهالى اكتر من صباح الخير
انا حسا انى مش عارفة افكر عارفة ان انا اللى قلعت الدبلة ومش ناوية البسها تانى حتى لو جه واعتذرلى انا معنديش اغلى من كرامتى واحمد جه على كرامتى جه عليها اوى
انا بس مش متخيلة انى هتجوز حد غيره انا كبرت على فكرة انى مراته وان جوازنا تحصيل حاصل مش مستوعبة انى هكمل مع حد غيره حياتى
مش مصدقة ان احمد عمل فيا كده
بعد اسبوعين بعد ما خلصت شغلى لقيت احمد مستنينى كنت همشي وكأنى مشوفتوش
احمد :اية استنى
اية :نعم عايز ايه حضرتك
احمد :انا محتاج اتكلم معاكى
اية :مبقاش بنا كلام يا احمد خلاص
احمد :ارجوكى يا اية انا فعلا محتاج اتكلم معاكى
اية :اتفضل
