حمزة :صباح الخير
وسام :بسم الله الرحمن الرحيم ..حرام عليك يا حمزة خضتنى المج وقع من ايدى واتفشفش مية حته اهو
حمزة :خلاص هاتى غيره
وسام :المج ده معايا بقاله ست سنين اه يانى اجيب مج بداله ازاى بس والست سنين اللى عدو دول خلاص كده ارميهم فى الزبالة
حمزة :محسسانى انه بنى ادم من لحم ودم مش مج
وسام باحباط :لان ليا معاه ذكريات لانى بحبه
حمزة باستغراب :بتحبى المج
وسام :اه بحبه مش مجى انا بحب حاجتى وبتعلق بيها
حمزة :وهتعملى ايه دلوقتى هتجيبي واحد شبهه بداله
وسام :حتى لو جبت واحد نسخة منه مش هياخد مكانه بس اكيد انا هجيب مج بداله غصب عنى لانه اتكسر لولا كده انا مكنتش هجيب غيره
حمزة :عاجبنى وفاءك ده حتى لو كان لمجرد مج
وسام :انت شايفه مجرد مج وانا شايفاه صاحب وشريك ليا فى الست سنين اللى فاتو من عمرى يلا قدر الله وما شاء فعل المهم انا هروح احضر الفطار بما انك صحيت
حمزة :ماشى
تانى يوم
حمزة :اتفضلى
وسام :انت جايبلى تلت مجات ليه
حمزة :تعويض عن اللى اتكسر بسببى
وسام :انا مبقبلش العوض كمان انت مكنش قصدك تخضنى فاكسره يعنى
حمزة :شكلك كان هيعيط وانتى بتبصى عليه وهو مكسور فى الارض
وسام :لانى بحبه وانا مبحبش اخسر حاجة بحبها
بعد يومين
حمزة :واخد بالى انك مبتشربيش حاجة سخنة من ساعة ما مجك اتكسر المجات اللي جبتهالك معحبتكيش
وسام :لا هما التلاتة احلى من بعض انا بس اللى مش قادرة اشرب فى مج غير بتاعى صعبة عليا بعد ست سنين متعودة اشرب فيه بس متقلقش هستسلم للامر الواقع واشرب فيهم هتعود مع الوقت هتعود
حمزة :الوقت بيعود
وسام :الوقت بيعمل كل حاجة بيعود وبينسي وبيفرح وبيعوض كمان
حمزة :بس فى ناس مبتتنسيش
وسام :فى ناس متستاهلش ننساها وفى ناس تستاهل النسيان صدقنى اللى عايز ينسي بجد هينسى
حمزة :والواحد ياخد وقت قد ايه علشان ينسي
وسام :حسب الحاجة اللى عايز ينساها حسب اهميتها وغلاوتها عليه
حمزة :يعنى مثلا مثلا يعنى انتى لو كنتى بتحبى واحد ومرتبطة بيه واتقدملك واهلك رفضو تاخدى وقت قد ايه علشان تنسيه
وسام :يمكن عمرى كله ميكفيش
حمزة بسخرية:عمرك كله ميكفيش يعنى ميمشيش معاكى تلت شهور وتنسيه وتتخطبي وتتجوزى غيره
وسام :على حسب علاقتى بيه كانت عاملة ازاى كمان انا مبنساش بسهولة وهيبقي صعب عليا انسا واعيش كل اللى خططت اعيشه معاه مع حد تانى ويبقالى شريك غيره فى احلامى هيبقي صعب عليا اصلا اتخلى عنه
حمزة :انتى لو اتخيرتى بينه وبين اهلك هتختارى مين
وسام :هختار اهلى طبعا بس هيبقي اختيار صعب اختيار علشانه هدوس على قلبى وهعذب روحى وهكسر قلب واحد غالى عليا
عارف علشان كده انا عمرى ما ارتبطت غير ان فكرة الارتباط دى حرام شرعا
كمان فكرة انى اتحط فى اختيار بين واحد بحبه وبين اهلى لو رفضوه خلتنى مش عايزة الموضوع مش عايزة يجى عليا وقت اختار بين اهلى وبين واحد بحبه ومهما اخترت هخسر
لو اختارت اهلى هخسر قلبي ولو اختارته هو هخسر راحتى واحترامى لنفسي
حمزة :والسنين اللى بينك وبينه عادى هترميها فى الزبالة
وسام :السنين اللى بينى وبين اهلى اكتر
كمان السنين اللى بينى وبينه دى هى اللى هتعذب وانا بنساها هى اللى هتخلينى لمدة طويلة مبوافقش على عريس ومبرتبطش بحد غيره
حمزة:مش هتتجوزى ولا حتى علشان اهلك
وسام :وقتها هظلم اللى هتجوزه لانى قلبى وعقلى هيكونو معاه هظلمه وهظلم نفسي انا برا باهلى ممكن ابعد عن حد بحبه انما اتجوز واحد عارفة انى هظلمه لانى مبقاش عندى حاجة اديهاله ده كده مش بر بيهم ده كده ظلم ليا وللانسان اللى هرتبط بيه
حمزة :يعنى هتترهبنى من بعده
وسام :لا هتجوز طبعا بس بعد ما انسي بعد ما ارجع تانى بتاعت نفسي ويبقي عندى استعداد اشارك حد تانى حياتى انا ممكن اخد وقت طويل فى النسيان بس فى الاخر مسيرى انسي هى دى سنة الحياة
وزى مقولتلك انا اساسا علشان فكرة انى متحطش فى اختيار بين اهلى وبين اى حد عمرى ما ارتبطت لان الارتباط وعد وانا مقدرش اوعد حد وعد مضمنش انى اقدر اوفى بيه غير انه اصلا حرام
حمزة :وهيجرى ايه يعنى لو وعدتى بوعد وموفتيش بيه
وسام :هخسر احترامى لنفسي واكيد ربنا هيعاقبنى كسر القلوب مش حاجة سهلة يعنى
كمان انا لو مش قد الوعد مبوعدش
بس ليه كل الاسئلة دى
حمزة :لا عادى ادينا بنرغى حضرى العشا طيب لحسن جوعت
وسام :وانا كمان جوعت حاضر هقوم احضر العشا
