سارة :سيف متجننيش فين المشكلة مش فاهمة
سيف :بقولك فضلت بتاع نص ساعة ابص عليها وهى نايمة وماسكة الموبايل قاعد اتأمل فيها ومش عارف انزل عينى من عليها وحاسس ان شكلها كده حلو اوى ليه بتعمل ايه ماسكة الموبايل ونايمة حاجة عادية جدا بتعملها حتى الكائنات وحيدة الخلية
سارة وهى بتضحك :هى الكائنات وحيدة الخلية بتمسك الموبايل
سيف :الكائنات وحيدة الخلية بتنام يا سارة ومعتقدش ان فى كائن وحيد الخلية بيقعد يراقب كائنة وحيدة الخلية وهى نايمة وبتلعب فى موبايلها يعنى الجنان اللى انا فيه ده حتى الكائنات وحيدة الخلية مبتعملوش
سارة :انت ليه محسسنى انك واقع فى مصيبة
سيف :لانى واقع فى مصيبة
سارة :انت مش واقع فى مصيبة انت واقع فى الحب انت بتحب مراتك
سيف :لا..لا انا مبحبهاش
سارة :مبتحبهاش قولتلى اومال بتفضل باصصلها ومش قادر تنزل عينك من عليها ليه من كام يوم لما كانت بتبعت لصاحبتها على الواتس وبتضحك خدت منها الموبايل ليه
سيف :علشان كنت جعان وعايزها تحضرلى اكل
سارة :لا الكلام ده تقولهولها هى متقولهوش ليا انا انت غيرت من صاحبتها
سيف :مغيرتش من صاحبتها بس غيرت انها بتضحك بسببها ومش بسببى هى عمرها ما ضحكت بسببى حسيت انى مضايق خدت الموبايل من ايديها من غير ما احس ولما سألتنى عملت كده ليه قولتلها تحضرلى اكل واحنا اصلا كنا متغديين مبقلناش ساعتين
روان خطر عليا انا هبعتها لاهلها كام يوم اقعد فيهم لوحدى مع نفسى اعقلنى
سارة :هى مبتعترضش على فكرة انك بتبعتها لاهلها كل كام شهر مبتضايقش
سيف :لا انا بقولها لو واحشينها تقدر تروحلهم خصوصا انى هيبقى عندى شغل كتير وهرجع متأخر فلو تحب تروحلهم يعنى براحتها وهى بتقولى تروحلهم احسن علشان متقعدش لوحدها كتير بتروحلهم يومين تلاتة وبترجع بكون انا سيطرت على الهبل اللى انا فيه ده
سارة :ده مش هبل ده حقك مراتك وحقك تحبها يا سيف للمرة المليون هقولهالك نورا ماتت بس انت لسه عايش مموتش حرام عليك اللى بتعمله فى نفسك ده
سيف :مش قادر يا سارة حاسس انى بخونها
سارة :مبتخونهاش يا سيف مبتخونهاش افهم بقى نورا ماتت لكن انت لسه عايش متدفنش نفسك بالحيا وسط ذكريات الماضى افهم يا سيف نورا هى الماضى لكن روان هى الحاضر والمستقبل
سيف :سيبك منى طمنينى مريم وسيف عاملين ايه حبايب خالو واحشنى اوى
سارة :كويسين وانت كمان واحشهم اوى خلى عندك دم وتعالى شوفهم وشوفنى ده انا اختك التوأم يا ندل انت يعنى احنا روح واحدة
سيف :ما هو علشان كده انا مبيعديش يوم غير لما اكلمك يا سارة واحكيلك كل حاجة علشان انتى توأمى
سارة :يا حبيبى تعالى طيب علشان اشوفك واحكيلى وش لوش
سيف :خلاص قريب اوى هجيلك
سارة :اما نشوف
فى شقة سيف
سيف :تقبل الله
روان :منا ومنكم يا رب
سيف :غريبة مرفعتيش ايدك ودعيتى بعد الصلاة زى عوايدك ايه معندكيش دعوة تطلبيها من ربنا
روان :مش عارفة ادعيه بايه بس هو عالم بيا واكيد هيريحنى
سيف :انتى تعبانة
روان :لا انا كويسة هقوم احط الغدا على ما تغير
