هاجر :نهلة بطلى فرك بقى واقعدى خيلتينى
نهلة :مش عاجبك اتجوزى
هاجر :هيحصل كلها كام شهر واسيبلك الاوضة تبرتعى فيها لوحدك ولحد الوقت ده ارجوكى عاملينى بطريقة احسن من كده واترزعى بقى
نهلة وهى بتقعد جمبها على السرير :تلميحات خالتك زايدة النهاردة حستها خلاص هتفاتح بابا ولا ماما فى موضوع انها عايزانى لاحمد ده
هاجر :طيب وايه المشكلة احمد دكتور وفرق السن بينكم خمس سنين يعنى فرق مناسب وشكلا هو تمام جدا ومبيشربش سجاير واخلاقه كويسه
نهلة :وساكت وهادى
هاجر :ودى مشكلة
نهلة :انا واحدة كلامها قليل ومبتعرفش تعبر عن مشاعرها واغلب الوقت ساكتة اتجوز واحد ساكت وهادى علشان نخلف عيال خارصة بقى
هاجر وهى بتضحك :والعيال ذنبها ايه
نهلة :هيطلعو بيتكلمو لمين اذا كان ابوهم وامهم ملهمش فى الكلام
هاجر :طيب مش ده ترتاحى معاه علشان هادى زيك
نهلة :مين قالك انى هرتاح معاه ومين قالك انى سكوتى مريحنى انا الكلام اللى مبقولوش وبيفضل جوايا ده حمل على قلبى بدل ما اتجوز واحد يعلمنى ازاى اتكلم واطلع اللى جوايا واحس قلبى خفيف اروح اتجوز واحد يزود حمل قلبى لانه زيه زيى بالظبط
هاجر :ولو خالتك كلمت ماما وبابا هترفضى
نهلة :مش عايزاها تكلمهم مش عايزة يبقي المفروض اخد قرار اى حد يختارلى انا مش عايزة اختار
هاجر :حتى لو حد اختارلك انتى اللى هتتحملى نتيجة اختياره لان دى حياتك وانتى اللى هتعيشيها
نهلة :الكلام ده سهل ليكى واحدة مبتفكرش كتير وداخلة فى الدنيا بقلب جامد انما انا بفكر كتير والتفكير بيخوفنى اكتر واكتر وانا جبانة ايوه انا جبانة وخوافة ومش عايزة اختار
هاجر :عموما شكلها كده مش هيبقى لازم تختارى تقولى اه او لا اصلا
نهلة :ليه
هاجر :عمرو خطيبى قالى ان احمد سأله عن سمر بنت عمته اذا كانت مخطوبة ولا لا وشكله كده حاطط عينه عليها
نهلة :الحمد لله ريحتينى..بس ثانية واحدة سمر دى اللى كانت بتضحك وتهزر طول الخطوبة اللى كانت بتتحرك فى كل حتة ومقعدتش دقيقة واحدة ام فستان كشمير صح
هاجر :اه هى
نهلة :شوفتى بقى ان نظريتى صح حتى احمد بيدور على واحدة عكسه واحدة تملا بصوتها السكوت اللى هو عايش فيه
هاجر :ما يمكن عينيه عليها علشان شكلها حلو
نهلة :نيرة بنت خالتك لمياء احلى منها وبيضا وعينيها ملونة لو احمد كان بيحسبها بالشكل كان زمانه خطب نيرة
هو عايز سمر لانها شدته بطبيعتها اللى عكس طبيعته طبيعتها اللى هو محتاجها فى حياته
سمر مش مخطوبة صح
هاجر :مش مخطوبة لا
نهلة بابتسامة :حلو ده ربنا يتمملهم على خير
هاجر :يا رب ويرزقك باللى يستاهلك يا نهول
نهلة :اللهم امين
اللى بيعرفو يتكلمو ويعبرو عن اللى جواهم بسهولة زى هاجر مبيفهموش قد ايه الكلام صعب على اللى مبيعرفوش يتكلمو زيى اللى الكلام بيفضل واقف على طرف لسانهم ومش عارفين يقولو اللى جوا قلوبهم كلام كتير ومشاعر اكتر مش قادرين يعبرو عنها
قد ايه صعب يكون حد انت بتحبه مفكر انه مش مهم عندك مع انه بالنسبالك ممكن يكون الدنيا وما فيها بس انت مش عارف تقوله كده مش عارف تعبرله عن اللى جواك
انا طول الوقت حسا انى تقيلة لانى جوايا حاجات كتير مبتطلعش
عكس هاجر هاجر خفيفة اللى فى قلبها على لسانها بتخرج اللى جواها اول باول مبتسيبش حاجة تفضل جواها
عمرو خطيبها زيها بالظبط هو جارنا وهاجر تبقى صاحبة اخته وهو حب هاجر واتقدملها بدل المرة اتنين لانه اول مرة اتقدم بابا قاله لسه بدرى
استنى سنة ونص ورجع اتقدم تانى يا ترى عمرو كان ممكن يعمل كده علشانى يستنانى سنة ونص ويتقدم بدل المرة اتنين يا ترى اى حد فى الدنيا ممكن يعمل كده علشانى شخصيتى الهادية روحى اللى مبتلمعش شكلى العادى اللى مش مميز ده كل الحاجات دى ممكن تجذب اى حد ليا
طيب يا ترى هى انانية منى انى عايزة شخص يكون بيعرف يتكلم ويعبر عن مشاعره علشان لو مبقتش زيه واتغيرت بسببه وفضلت زى ما انا على الاقل صوته يملا السكوت اللى انا عايشة فيه كلامه يعبر عن اللى جوايا
هو ده مش من حقى كونى نفسي فى واحد يقدملى حاجة مش هقدر اقدمهاله لانى مش هعرف
عدى تمن شهور احمد خطب سمر وهاجر وعمرو اتجوزو وروحنا نباركلهم انا وبابا وماما فى الصباحية دخلت معاها المطبخ نجيب عصير وحلويات اول ما دخلنا المطبخ لقتنى بحضن هاجر وبعيط
