يارا :طيب شعرى اللى انت فكيته ده هيبقى حلو لما تلاقى شعراية منه عايمة على وش الشوربة ولا ملفوفة حوالين حتة طماطم فى طبق السلطة يعنى انا لماه علشان ميقعش فى الاكل وانا بعمله تفكه ليه
فريد :بحبه مفرود
يارا :وانا بحبه ملموم يبقى يفضل ملموم هو شعر مين فينا
فريد :شعرك بس لو انا عايزة مفرود يبقى هيتفرد
يارا :مش انك تقولى انه شكله احلى وهو مفرود دى صيغة احسن تعبر بيها
فريد :لا هو علشان انا عايزه يتفرد
يارا :حمدلله على سلامتك روح غير وخد شاور على ما اكون خلصت الاكل وحطيته على السفرة
فريد وهو بيلعب بايده فى شعرها :ماشى
يارا بغيظ :طب اعمل فى ايه ده بس يا ربى ادب السكينة فى كرشه واخلص
فريد وهو بيضحك :معنديش كرش تدبى السكينة فيه جوزك رشيق وبطلى تبرطمى بصوت عالى
يارا بغيظ اكبر :يا رب رحمتك مانا كده يا هقتله يا هقتل نفسى
فريد وهو بيضحك من بره المطبخ :سمعتك برضه
بالليل
يارا :هو انت هتفضل قاعد على موبايلك كده
فريد :اه فى حاجة
يارا :كنت عايزة اكلمك فى موضوع
فريد :اتكلمى
يارا :يعنى هكلمك فى موضوع مهم بالنسبالى ابسط حقوقى انك تسمعنى باهتمام وتسيب موبايلك وتبصلى
فريد :وادينى سيبت الموبايل ها عايزة تتكلمى معايا فى ايه
يارا :انا عايزة اشتغل
فريد :ليه الفلوس اللى بديهالك مش كفاية ازودهالك
يارا :هو انا لازم اكون عايزة اشتغل علشان الفلوس
فريد بسخرية :وهو انتو بيهمكم غيرها ثم احنا متفقين من قبل ما نتجوز مفيش شغل ولا نسيتى
يارا وهى بتطلع من الدولاب غطا :لا منستش
فريد :انتى بتعملى ايه
يارا :هروح انام فى اوضة الاطفال اعتقد اننا متفقناش قبل ما نتجوز انى لازم كل يوم انام جمبك فى اوضتنا تصبح على خير
تانى يوم
على الفطار
فريد :مش هتفطرى
يارا :لا مش جعانة هشرب النسكافية بس
ايه مش عارف تاكل من غيرى مثلا
فريد وهو بياكل :لا طبعا باكل عادى ..نمتى كويس امبارح
يارا :ومنمش كويس ليه
فريد :علشان غيرتى السرير مثلا
يارا :لا اطمن انا نمت كويس اوى وانت نمت كويس
فريد :اه جدا نايم براحتى لوحدى فى السرير
يارا :والله حيث كده بقى فانا هنام النهاردة كمان فى اوضة الاطفال وهسيبك تنام براحتك لوحدك فى السرير
فريد :يكون افضل انا نازل الشغل عايزة حاجة اجبها وانا راجع
يارا :لا شكرا
بعد تلت ايام
فريد :هو انتى خلاص نقلتى اقامتك لاوضة الاطفال
يارا :عندك مشكلة فى نومى هنا
فريد وهو بيخرج من الاوضة :لا معنديش
يارا وهى بتخرج وراه :ليه معندكش مشكلة
فريد :علشان معنديش مشكلة هو انتى عايزة نتخانق وخلاص
يارا بانفعال :ايوه عايزة نتخانق عايزة يحصل بنا حاجة اى حاجة مش مهم حلوة ولا وحشة احنا ليه مبنتخانقش ليه مبنتصالحش ليه مبنتكلمش سوا ونهزر ونضحك احنا ليه الحياة بنا ساكتة كده ليه البرود اللى بنا ده
فريد :والله احنا قبل ما نتجوز اتفقنا على البيت وسعره وعلى العفش وسعره اتفقنا على المستوى اللى هتعيشى معايا فيه بس متفقناش على اللى بتقوليه ده
يارا :وهى الحاجات دى بتبقى بالاتفاق دى بديهيات حياة بتكون بين اى اتنين متجوزين بين اى اتنين عايشين سوا حتى لو انت وواحد صاحبك فمبالك بقى بانت ومراتك
فريد :انتى ليه محسسانى اننا واخدين بعض عن حب
يارا :لا انا عارفة كويس اننا مش واخدين بعض عن حب بس ده مش معناه ان التعامل بنا يبقى عامل كده
فريد :وليه لا
يارا :علشان انت اتجوزتنى يا فريد اتجوزتنى مش اشترتنى انا انسانة وعندى مشاعر وانت المفروض تراعى مشاعرى دى
فريد :وانا قصرت فى ايه عايشة فى احسن شقة بتلبسى احسن لبس وبتاكلى احسن اكل بتاخدى مصروف كبير يخليكى تجيبى اى حاجة عايزاها انتى عمرك طلبتى منى حاجة وانا قولتلك لا
يارا :وهو انا مش هعوز منك غير فلوس مليش عليك حقوق غيرها مليش حق فى وقتك وفى اهتمامك مليش حق فى مشاعرك
فريد :وانتى من امتى بيفرقلك كل ده
يارا :من مدة كبيرة يا فريد عارفة انى فى الاول مكنش فارقلى غير ان كل طلباتى تكون مجابة بس ده غلط وانا عرفت غلطى وحاولت اصلحه انت ليه مش شايف ده ليه مش شايف انى بحاول ليه مش مقدر محاولاتى
فريد :علشان مش شايف ان وضعنا فى الاول كان غلط
يارا :لا غلط انت جوزى مش خزنة فلوسى وانا مراتك شريكة حياتك مش مجرد ديكور فى حياتك زيى زى البيت او العربية بتوعك
احنا بدءنا غلط وانا عايزة نصلح الغلط ده
فريد :والمفروض مجرد ما تعوزى الوضع يتغير بكل بساطة وسهولة صح
يارا :مش بسهولة بس..
فريد قاطعها :انا عايز انام تصبحى على خير
