رحاب وهى ماسكة رجلها وبتتوجع :ااااه يا رجلى
تامر ببرود :احسن
رحاب :استنى هنا يا متخلف انت هو ايه اللى احسن
تامر :انتى بتكلمينى انا كده
رحاب :وانت شايف غيرك هنا اه بكلمك انت كده
زى ما انت سمحت لنفسك تتجاهلنى فى كل مرة تشوفنى فيها ومتردش عليا لما اغلط واقولك صباح الخير لو شوفتك وتخرج من بلكونتك لمجرد انى خرجت بلكونتى انا قولت عادى عندك توحد انما تقولى احسن لانى وقعت وانا فعلا معملتلكش اى حاجة علشان تتشفى فيا بالشكل ده تبقى انسان مش طبيعى وماشى توزع كره على خلق الله والحياة لوحدها صعبة ومش ناقصة امثالك يصعبوها اكتر ما هى صعبة فياريت تبطل توزع كرهك على خلق الله اللى متعرفهمش ومتعاملتش معاهم
ده انت حتى متعرفش اسمى وسمحت لنفسك تعاملنى بالشكل ده وتشوفنى واقعة وحتى مفكرتش تمدلى ايدك تقومنى ولو من باب الانسانية واننا جيران
تامر :
رحاب وهى بتقوم تقف لوحدها :واضح انك مش بس مبتحسش لا مبتسمعش كمان كل اللى قولته ده ومرديتش عليا بكلمة واحدة هى شكلها هتبقى جيرة زى الزفت
تانى يوم
فى البلكونة
تامر :احم احم..يالله نا اسف خارج علشان اتأسفلك على اللى عملته خضيتك فوقعتى المج بتاعك كسرتيه طيب انا ادخل تانى ولا اعمل ايه باللى بنيله ده
رحاب :مبتنيلش ولا حاجة انا مش مضايقة على المج
تامر :ليه
رحاب :ذكرى ملهاش لازمة وادينى خلصت منها
تامر :طيب انتى رايحة فين
رحاب :داخلة اوضتى ولا انت بس اللى مسمحولك انك لما تشوف وشى تدخل اوضتك كأنك شوفت شبح
تامر بحرج :ااا..انا اسف
رحاب :على ايه
تامر :على كل حاجة عملتها خصوصا اللى عملته امبارح انا فعلا اسف واتمنى تسامحينى
رحاب :تمام اسفك مقبول بعد اذنك
تامر :هى رجلك كويسة
رحاب :مش محتاج تتصرف بلطف خلاص انا قبلت اسفك
تامر :لا انا فعلا عايز اعرف
رحاب :اه رجلى كويسة انا لويتها بس حاجة بسيطة يعنى بعد اذنك
تامر :اتفضلى
تانى يوم
تامر :مساء الخير
رحاب :مساء النور
تامر :رايحة فين
رحاب :داخلة علشان اسيبك براحتك فى البلكونة
تامر :لا خليكى..قصدى يعنى اتفضلى
رحاب وهى بتفتح البوكس :ايه ده مج..جبت بداله ليه قولتلك انى مش مضايقة انه اتكسر
تامر :بس انا مضايق لانه اتكسر بسببى وكان لازم اجبلك غيره
رحاب :تمام شكرا
تامر :هو انتى ليه مش مضايقة انه اتكسر وليه بتقولى عنه ذكرى ملهاش لازمة
رحاب :مش ملاحظ انك بتسأل اسئلة شخصية وكأننا عشرة عمر فى حين انك حتى متعرفش اسمى ناهيك عن المعاملة الزبالة اللى كنت بتعاملنى بيها قبل كده
تامر :اتأسفت عن معاملتى دى وانتى قبلتى اسفى ولو على انى معرفش اسمك بسيطة اسمك ايه
رحاب :نعم
تامر :اسمك نعم
رحاب :لا اسمى رحاب
تامر بابتسامة :تشرفنا يا رحاب وانا تامر
رحاب :عارفة بسمع اهلك بينادوك بيه
تامر :مجاوبتيش سؤالى ليه مش مضايقة على المج اللى اتكسر
رحاب :وانا اجاوبك ليه
تامر :لانى عايز اعرف
رحاب :تصدق اقنعتنى
تامر :لا بجد عايز اعرف طيب جاوبى وانا هقولك ليه كنت بعاملك بالطريقة اللى كنت بعاملك بيها قبل كده
رحاب :ومين قالك انى عايزة اعرف انا مش فضولية
تامر :اكيد عايزة تعرفى ومفيش بنت مش فضولية
رحاب وهى بتضحك :تصدق اقنعتنى فعلا المرة دى
تامر :يبقى جاوبى
رحاب :طيب ما تقول انت الاول
تامر :لا انا اللى سألت الاول كمان Ladies First ولا ايه
رحاب :ماشى مش مضايقة عليه لانه ذكرى من شخص كان فى حياتى خرج منها ومفضلش غير المج ده منه
تامر :وانتى اى حد بيخرج من حياتك بتتخلصى من ذكرياتك معاه
رحاب :لما يكون خرج بطريقة وحشة يبقى اه المفروض اعمل كده
تامر :خرج منها بطريقة وحشة يعنى عمل ايه
رحاب :لا اكيد مش هحكيلك تفاصيل خاصة اوى زى دى انت لسه عارف اسمى من خمس دقايق
دورك جاوب
تامر :كنت بعاملك بالطريقة دى بسبب واحدة كنت بحبها
رحاب وهى بتفكر :وانا شبهها بفكرك بيها يعنى
تامر :لا بس انتى سكنتى مكانها
رحاب :كانت جارتك
تامر :اينعم
رحاب :ودى كانت اوضتها
تامر :ده حقيقى
رحاب :حبيتو بعض كام سنة وسيبتو بعض ليه
تامر وهو بيضحك :too much اسئلة واكيد مش هحكيلك تفاصيل خاصة زى دى انتى لسه عارفة اسمى من سبع دقايق
رحاب وهى بتضحك :بتردهالى يعنى ماشى
