مى :مودة قومى مودة ورانا مذاكرة كتير
مودة بصوت نايم :انا مذاكرة كويس
مى :مودة انا لما سالتك امبارح مجاوبتيش ولا سؤال
مودة :الدكتور مش هيجيب فى الامتحان من اللى انتى سالتينى فيه
مى :ده على كده الدكتور مش هيمتحنا فى مادته بقي وهيمتحنا فى رواية ذلنى وكسرنى واغتصبنى ولكن احببته اصل انا مهزقة الرواية العقيمة اللي كنتى بتقريها امبارح وخليتك قفلتيها بالعافية
مودة :مسمهاش كده الرواية اسمها مرمط بكرامتى الارض ولكن احببته ده اولا ثانيا انا مسمحلكيش تغلطى فى الروايات اللى بقراها
مى وهى بتضحك :احلى حاجة انك بتدافعى عنها بكل قوتك
طيب بلاش تقومى نذاكر قومى نعمل برشام طيب علشان منشلش المادة
مودة وهى بتضحك :انتى بتشجعينى على الفساد لا يا ستى الغش حرام انا اشيل المادة احسن وسبينى انام بقي
مى بصوت خايف :خلاص يا ابيه بشير هى هتقوم خلاص اهيه
مودة وهى بتقوم من السرير بسرعة :خلاص يا ابيه انا صحيت اهو مش عايزة انام اصلا..ايه ده هو فين بتشتغلينى يا مى
مى وهى بتضحك :ما انتى اللي هبلة وهو ابيه بشير ايه اللى هيجيبه اوضتى يا اذكى اخواتك
مودة :وانا اعرف بقي انا اتلبشت وخلاص هتنيل اغسل وشى واتوضى واصلى الضحا على ما تكونى عملتلنا سندويتشات مبذاكرش على معدة فاضية انا
مى :ماشي يا ستى انجزى بس
بعد اسبوع
مى بغيظ :طيب يفصل عنكم الواى فاى هو حر في بيته وفى اهل بيته انما يقنع ماما تفصل الواى فاى عنى انا كمان ليه اخوكى البارد ده
بشير :هو مين ده اللى بارد
مى بخوف :ده ..انا قصدى يزيد ايوه انا قصدى يزيد
يزيد بصوت واطى :وانا مالى انا يا لمبى بتلسيها فيا ليه
مى بصوت واطى :شحن باقة المكالمات بتاعتك الشهر ده عليا بس استر عليا الهى يستر عليك
يزيد :ايوه يا بشير هى بتقولى انا يا بارد اصلى رخمت عليها هى ومودة علشان لسه بيمتحنو وانا اتخرجت خلاص فهى قالتلى يا بارد
بشير :حتى لو رخمت عليها متقولكش كده
مى :ده هزار عادى
بشير :نعم سمعينى تانى كده
مى :قصدى انك معاك حق طبعا ده اسلوب غلط مش هنكلم بعض بيه تانى مينفعش التسيب ده
يزيد بصوت واطى :جبتى ورا فى ثانية
مى بصوت واطى :وهو اخوك ده يتعمل معاه غير كده انت فاكرنى مستغنية عن عمرى
مودة بصوت واطى :معاكى حق يا بنتى
بشير :انتو بتقولو ايه
مودة :مبنقولش يا ابيه حمد لله على سلامتك نحط الغدا
بشير :حطوه اه انا جعان
مودة :تعالى نحط الغدا يا مى
مى :لا انا هرجع شقتنا
بشير :ايه
مى :بقولك يا مودة يلا نحط الغدا بلاش لكاعة انا جعانة جدا
بعد شهر
مودة :جددنا اشتراك الواى فاى والنت بطئ بطء السلحفاة الحامل مى كلمى خدمة العملا
مى :ماشى
بعد ربع ساعة
مى وهى بتضحك :شوفتى الادب والزوق فى اخر المكالمة قال تسلميلى يا فندم ابن ناس ومتربي
مودة وهى بتضحك :وهو علشان قالك تسلميلى يا فندم بقي ابن ناس ومتربى
يزيد وهو بيضحك :اوفر انتى اوى يا مى
مى وهى بتضحك :انتو اللي مش فاهمين حاجة مدام قال تسلميلى يا فندم يبقي ابن ناس ومتربى معروفة يعنى
بشير :مين ده اللى قال تسلميلى يا فندم وقالها لمين
يزيد بصوت واطى :اوعى مخك يوزك تقولى ليا انا ميتقاليش تسلميلي لا انا راجل اوى
مودة بصوت واطى:لبستى يا مى استلقى وعدك
بشير:بطلو ودودة واخلصو قولو مين اللى قال كده وقالها لمين
يزيد ومودة وهما بيشاورو على مى :قالها لمى
بشير :وده مين ده بقي ان شاء الله اللى قالك تسلميلي
مى بخوف :ده ..ده..
بشير :اخلصى قولى مين
مى :ده موظف خدمة العملا
بشير :وانتى كلمتى خدمة العملا ليه
مى :الواى فاى كان فيه مشكلة كلمتهم يحلوها
بشير :وتكلميهم انتى ليه
مى :مودة مبتحبش تتكلم معاهم
بشير :لا انا كلامى مش ليكى انا كلامى ليزيد بيه انت يا راجل البيت فى غيابى مكلمتش زفت خدمة العملا ليه
يزيد :بزهق من رغيهم يا بشير كمان بيلطعو اللي بيتصل بيهم كتير على التليفون وانا ماليش خلق
بشير :نعم يا اخويا من هنا ورايح خدمة العملا يا اكلمهم انا يتكلمهم انت واعصر على نفسك ليمون واستحملهم
وده مش للواى فاى هنا بس برضه للى عندكم يا مى لو حصل فيه حاجة انا او يزيد اللي نكلم خدمة العملا مش انتى مفهوم
مى بخوف :مفهوم حاضر
