فى احد العيادات النفسية
مازن : منى خلصنا كده ولا فى حالات تاني النهاردة
منى : مش باقى غير حالة واحدة بس
ده حاجز في الاول وهنا من بدرى بس من اول ما جه دوره وهو بيقولى ادخل اللى عليه الدور بعده قبله لحد ما الحالات كلها خلصت ومش باقي غيره
مازن :ده شكله كده حالته حالة طيب دخليه
منى :حاضر يا دكتور
منى :يا استاذ اتفضل حضرتك مش باقي غيرك
احمد بتوتر :ها... مش باقى غيرى تمام هدخل
ودخل احمد لدكتور مازن
وبعد ربع ساعة قضوها في صمت
مازن : لا ما انت اكيد مش جاى تسمعنى سكوتك
احمد: طيب اقول ايه
مازن : قول اى حاجة حاسس انك عايز تقولها وجاى بسببها هنا قول اول حاجة تيجى فى بالك
احمد : انا قابلت حنان مراتى فى معرض لوحات كنت هناك مجاملة للفنان صاحب المعرض انما انا مليش في اللوحات والفن والجو ده
شفتها هناك لوحة فنية ماشية على رجلين
جمالها الهادى اللي خطفنى من اول مرة شفتها فيها
صوتها الحنين اللي رشق فى قلبى من اول ما سمعته
هى مديرة المعرض ده اللى عرفته لما سالت عنها
اتعرفت عليها وعرفتها بنفسى احمد نورالدين صاحب شركة استيراد وتصدير وهى عرفتنى بنفسها حنان الالفى مديرة المعرض
اديتها الكارت بتاعى
واتقابلنا صدفة كتير صدف كنت انا اللي برتبلها
خلال شهرين كنا مخطوبين وبعد الخطوبة بشهر اتجوزنا
بعد ما قضينا شهر العسل فى اوربا وتقرييا ده كان الشهر الحلو الوحيد في حياة حنان من ساعة متجوزتنى
رجعنا مصر واول حاجة عملتها منعتها من الشغل وهى سمعت كلامى ووافقت مع انها كانت بتحب شغلها
بس لما قلتلها كده قالتلي انها بتحبنى اكتر منه
ومع انى كنت بقضى فى الشركة وقت طويل وايام كتير برجع عالنوم وهى بتقضى اليوم كله لوحدها الا انها مشتكتش ولا طلبت منى ترجع تشتغل تانى
حتى يوم الاجازة اوقات كتير كان بيبقى عندى شغل فيه او بجيب ورق اخلصه في البيت يعنى حتى وانا معاها فى البيت كانت بتقعد لوحدها وبرضه مشتكتش
خروجات كتير كانت بتطلب منى تخرجها مع اصحابها ورفضت قليل اوى لما كنت بقبل واسيبها تخرج
مناسبات كتير في عيلتها لا سبتها تروحها لوحدها ولا قبلت اروحها معاها
علاقتها بصحابها قلت كتير وفى ناس منهم اتقطعت علاقتها بيهم خالص
دايما كانت بتقولى ان انا اغلى عندها من اي حاجة في الدنيا وانها عمرها في يوم مهتبعد عنى لانها مش هتقدر تعيش من غيرى
دى اتعلمت الطبخ علشانى حنان اسم علي مسمى مفيش حد فى حنيتها فى الدنيا كلها
كانت بتعمل علشانى كل ده وانا معملتش علشانها اى حاجة مكنتش فاهم هى بتعمل كده ليه وهتفضل تعمل كده لحد امتى
فضلنا سنة مع بعض ومخلفناش خدتها ورحنا كشفنا
طلعت هى تمام تقدر تخلف بس انا عندى مشاكل ومحتاج اتعالج سنة او اتنين ويمكن اكتر
لما روحنا البيت بعد ما فضلنا ساكتين طول الطريق
هى مسكت ايدى وقالتلي انى ان شاء الله هبقي بخير وهنخلف انا وهى قريب وانى مقلقش واسيبها على ربنا
وانها جنبى ومش ممكن تسبنى مهما حصل
ساعتها سبتها ومشيت من غير ما ارد عليها بكلمة واحدة
وخرجت وانا متضايق
مازن :متضايق من ايه من انك متقدرش تخلف بسهولة
احمد : لا متضايق انها هى اللي تقدر وانا لا لو كان العكس كان بقى انها تفضل معايا حاجة عادية وبالعكس كنت هبقي انا اللي بضحى علشانها ومستحمل
انما لا هي تقدر تخلف هى اللي بتضحى علشانى وهي اللي مستحملة
متضايق من كلامها انها مش هتسبنى مهما حصل
هى بتكدب هى اكيد هتمشي كل اللى حواليا مشيو ومحدش فيهم فضل اشمعنا هى هتفضل جنبى
مازن :وقت الجلسة خلص نكمل الاسبوع الجاى
احمد : ممكن نخليها بكرة انا بجد تعبان ومش هتحمل افضل للاسبوع الجاى
مازن :تمام هاجى بدرى ساعة علشانك بس هتدخل على طول مش هتدخل حد قبلك اساسا مش هيكون فى غيرك
احمد :حاضر بعد اذنك
تانى يوم فى عيادة دكتور مازن
احمد :اكمل
مازن :كمل يا احمد انا سامعك
احمد :انا عمر ما حد فضل معايا
ابويا وامى انفصلو وانا في تانية ثانوى ومهمهمش انها سنة مهمة في حياتى ولا فرق معاهم
هما اصلا كانو بيتخانقو كل يوم من يوم ما وعيت عالدنيا وهما بيتخانقو مفتكرش انى شفتهم في مرة بيتكلو بهدوء او بيتكلموا اصلا حياتهم مع بعض كانت خناق بس
بعد ما انفصلو امى بعد شهور العدة علي طول اتجوزت
هى اتطلقت من بابا اصلا علشان تتجوز الإنسان الى اتجوزته ده وبابا بعدها بشهر كان متجوز هو كمان
ومحدش فيهم فكر فيا كل واحد فيهم هامه نفسه وبس
انا عشت مع جدى
جدى كان طيب وحنين عليا يمكن لو فضل عايش معايا كنت بقيت مختلف عن اللي انا عليه دلوقتى
مازن :وجدك مفضلش عايش معاك ليه
احمد:علشان مات وانا في اول سنة ليا في الجامعة جدى مات وسابنى لوحدى رجعت من تانى لوحدى ومليش حد
ابويا عرض عليا اعيش معاه بس انا رفضت
كنت عارف انى هعيش غريب فى بيته وانى برضه هبقى لوحدى فقلت اخليها وحدة بمزاجى احسن
وماما معرضتش عليا حتى جوزها مكنش هيوافق فهى مفكرتش حتى في الموضوع
عشت لوحدى مكنش ليا غير صاحب عرفته فى الكلية اسمه كريم عرفته في اول سنة كان بيجى يبات معايا فى بيت جدى كتير علاقته بوالده كانت وحشة فكان كتير بيطردو من البيت او يتخانقو وصاحبى نفسه هو اللى يسبله البيت ويجى يقعد معايا يومين وبعدين والدته تكلمه تترجاه يرجع البيت ويرجع
فى حفلة التخرج بتاعتى كنت لوحدى لا بابا ولا ماما حد فيهم جه
بعد الكلية اشتغلت فى بنك مع ان بابا طلب منى كتير اروح اشتغل معاه في الشركة بتاعته بس انا رفضت
فى البنك اتعرفت على نهال وحبيتها وخطبتها
كنت فرحان اوى وعملت علشانها كتير وكان نفسي تكون عوضى عن اللى شفته فى حياتى
بس نهال من بين كل الناس اللى في الدنيا حبت كريم صاحبى
وهى مخطوبالى وهو حبها واعتبرو ان خطوبتها منى غلطة ولازم تتصلح هى مبتحبنيش ومش ممكن تحبنى وبتحب صاحبى ومتقدرش تعيش من غيره
وهو بيحبها وعايزها ولو اتجوزنا انا وهى هنعيش تعسا كلنا وهما مش عايزين يظلمونى
ساعتها قلعت دبلتى ورمتها فى وشها وقلتلها انى ندمان انى عرفت واحدة زيها وضربت اللى كان صاحبى بوكسين فى وشه ومشيت
رحت بعدها اشتغلت مع بابا بس علاقتى بيه فضلت باردة وفيها جفا هو كان بيحاول يقربلى بس السنين اللى فاتت كان صعب اوى يتمحى اثرها من جوايا بسهولة
وهو مفضلش يحاول كتير بعد ما اشتغلت في الشركة بسنة بابا مات وكان كاتب الشركة باسمى والفيلا كمان والست اللي اتجوزها سابلها فلوس في البنك وهو مكنش خلف منها ومكانش ليه وريث غيرى بابا كان وحيد زيى وملوش اخوات
انا كنت فهمت الشغل مكنش صعب عليا امسك للشركة خصوصا ان اللي شغالين فيها كانو بيحبو بابا وعايزين
يردو جمايله عليهم فيا
ماما ماتت بعد بابا بسنتين بس انا محستش بفرق
حياتى مختلفتش فى اى شئ
فى ظرف خمس سنين كنت نقلت الشركة في حتة تانية اسمها في السوق بقي معروف
وشركات كتير بقت بتخاف مننا وبتعملنا الف حساب
انا دفنت نفسى في الشغل مكنتش بعمل حاجة غيره ولا كان في حياتى حاجة غيره
وفضلت كده لحد ما شفت حنان
حسيت انها مينفعش تبقي لحد غيرى
وفضلت وراها لحد متجوزتها
مازن :انت مقلتش الحياة بينكم بقت عاملة ازاى بعد ما عرفت ان موضوع الخلفة صعب من ناحيتك
احمد :تعاملى معاهابقى اقسى من الاول وهى راضية وساكتة وكل ما صبرها يزيد قسوتى عليها كانت بتزيد واهمالى ليها كان بيزيد
وهى مكنتش بتشتكى كانت بتخس وتحت عنيها يبقي اسود اكتر واكتر كنت بسمعها باليل بتصلى وتعيط
كمان كنت بشوف دموع نازلة من عنيها وهى نايمة
بس مشتكتش لحد ولا لامتنى
وكانت بتهتم بيا وبكل حاجة تخصنى زى ما هى مكنتش بتتغير
فضلنا عالحال ده سنتين وهى صابرة ومتحملة جفايا وقسوتى زاد عليهم شك فيها لو شفتها بتتكلم في التليفون أخده من ايدها اشوف بتكلم مين مفيش خروج غير معايا او مع سواق جبتهولها علشان ينقلى تحركاتها
وهى قبلت وسكتت وكالعادة مشتكتش
لحد ما فى يوم رجعت ملقتهاش في البيت وخرجت من غير متاخد العربية ولا السواق
فضلت مستنيها وانا بغلى من جوا راحت فين ومع مين
لحد ما جت وكانت مبسوطة
فكرت انها اكيد كانت بتخونى السعادة اللي علي وشها دى انا مش سببها بقالى تلت سنين وانا كل يوم بقتل فرحتها بايدى
سالتها كانت فين وقبل ما ترد عليا حتى كنت ضاربها بالقلم على وشها والقلم بقو اتنين وتلاتة واربعة وخمسة وشدتها من شعرها لدرجة ان حجابها اتخلع في ايدى
مدتهاش فرصة تدافع عن نفسها كنت بضربها وبشتمها ومش شايف وجعها ولا سامع هى بتقول ايه
بعدين سبتها وخرجت الجنينة ولما دخلت الفيلا تانى لقيتها نازلة ومعاها شنطة هدومها وعينيها فيها نظرة خيبة امل منى ووجع وكسرة مشوفتهاش في عينيها قبل كده بالرغم من كل اللي عملته قبل كده
وبهدوء فتحت الباب وخرجت
كنت عايز امنعها مكنتش عايزها تمشي انا عملت كده لانى كنت خايف تمشي
كنت عارف انها هتمشي مكنتش مصدق انها هتفضل معايا ومش هتسبنى
احمد وهو بيبكى
انا طول الوقت كنت خايف
خايف اصدقها اتوجع لما تسبنى وتمشى
خايف تسبنى وتمشي وارجع تانى لوحدى
خايف تتعب من اللي بعمله ومتبقاش قادرة تتحمله
خايف تلاقي راحتها مع حد تانى
خايف وبتوجع ودفعتها هى تمن كل اللي حصلى قبلها
انا بحبها والله العظيم بحبها يمكن عمرى مقلتهالها بس والله بحبها وحياتى من غيرها ملهاش لازمة انا مش عايش من غيرها يا دكتور والله
مازن :طيب اهدى ونكمل الجلسة الجاية بكرة مش بعد اسبوع ولا حاجة في نفس الميعاد اللي جيت فيه النهاردة
احمد هز راسه ومشي مقالش حاجة
تانى يوم فى عيادة دكتور مازن
احمد :بعد ما مشيت فضلت واقف مكانى ساعة مبتحركش وبعدين فضلت صاحى لحد ما روحت الشركة
مقدرتش انام فى البيت وهى مش فيه
ونظرة الوجع والكسرة اللي في عينيها مفارقوش خيالى
مقدرتش ارجع البيت وانا عارف انها مش فيه فكنت ببات في الشركة
عارف يا دكتور برغم كل اللي عملته فيها الا انى عمرى مبت يوم بره البيت بعيد عنها ولا وافقت انها تبات يوم بره حتى لما كان بيجلي صفقات بره كنت باخدها معايا بحبسها في
الاوضة ومبتخرجش منها ولا بفسحها في البلد اللي احنا فيها بس مكنتش بقدر انام وهى مش جنبي
بعد عشر ايام مقدرتش اتحمل
روحتلها بيت اهلها وانا مش عارف هقولها ايه
وهى مقالتلهمش اللي انا عملته محكتش لحد ده الي اكتشفته لما وصلت عندهم من والدها ووالداتها
تعاملهم معايا معناه انهم معرفوش لانهم لو عرفو مكنوش دخلونى من باب البيت اصلا
هما مكانوش يعرفو حاجة من الي بتحصل بنا حنان دايما كانت بتمثل انها عايشة اسعد ايام حياتها معايا قدامهم
طلبت اشوفها ووالداتها ندهتلها وسابونا نتكلم علي انفراد
لما شفتها اتخضيت عليها وحسيت بالذنب اكتر انا اللي عملت فيها كده انا اللي طفيتها كده
كانت خسا وتحت عنيها سواد كانها منامتش من يوم ما سابت البيت وعنيها فيها نظرة الوجع وخيبة الامل والكسرة اللي شفتها في عينيها يوم ما سابت البيت
قعدت بعيد عنى كانها خايفة منى حنان بقت بتخاف منى
قلبى وجعنى اوى لما فكرت فى كده
فضلت ساكت نص ساعة مش عارف اقول ايه وهي ساكتة ومش بصالي حتى
وبعدين قلتلها
حنان انا عارف ان...
حنان قاطعتنى وقامت وقفت وهي بتتمشي في الاوضة :عارف ايه
عارف ايه يا احمد انت متعرفش حاجة
انت تعرف ايه عنى انا اعرف كل حاجة عنك انت تعرف ايه عنى تعرف ان عندى حساسية من المانجا وعلشان كده مبكلهاش بعملهالك كتير عصير واشرب انا عصير تانى
اعملهالك بالكنافة وتاكل الصنية لوحدك عمرك خدت بالك انى مبكلش معاك منها انا اعرف بتحب ايه في الاكل والشرب عندك كام بدلة وكام ساعة اعرف تفاصيلك كلها ومن غير متحكيلي لانك مبتحكليش حاجة
انت بقى تعرف عنى ايه
انا خليتك كل دنيتى وانت استخسرت فيا انك تدخل حياتى
كل مرة كنت بتخير فيها بينك وبين حاجة تانية كنت بختارك من غير تفكير
اخترتك علي شغلى وصحابى علي راحتى
اتحملت قسوتك وجفاك وشكك فيا
دمرت ثقتى فى نفسي نستنى يعنى ايه اضحك
يعنى ايه انام مرتاحة يعنى ايه يعدى عليا يوم من اغير مبكى وبرضه فضلت معاك
خسرت كل حاجة واخترت افضل جنبك ومبعدش
وفي الاخر هنتني ودوست على كرامتى وخلتنى لازم اختار بينك وبين كرامتى ومع انى عارفة انى مينفعش اخسر كرامتى ولو خسرتها يبقي خسرت نفسي ولو خسرت نفسى يبقي مستحيل اكسبك
يبقي هكرهك يا احمد هكرهك وهكره نفسي
وانت خلتنى فى وضع اختيار بينك وبين كرامتى
والاختيار صعب
انهارت حنان في الارض وهي بتبكى
الاختيار صعب عليا اوى لسه بعد اللي عملته فيا صعب اختار كرامتى وابعد عنك صعب عليا اسيبك صعب ومش عارفة اعمل ايه انا تعبت والله العظيم تعبت
احمد نزل جنبها عالارض وباس راسها
احمد:انا اسف
ومشيت سبتها ومشيت مبقتش عارف اقولها ايه ابررلها اللي عملته فيها بايه بقيت حاسس ان مش من حقى اطلب منها تفضل معايا بس انا مقدرش اعيش من غيرها وعلشان كده جتلك اعمل ايه يا دكتور قولى انت اعمل ايه
مازن : سامح اهلك يا احمد علشانك مش علشانهم
ونهال وكريم انساهم
انت مش وحش ومتستاهلش اللي هما عملو
انت تستاهل تتحب وتستاهل ان اللي بيحبوك يفضلو معاك مش هتكون لوحدك ولا حاجة بس انت ادى الناس فرصة تدخل حياتك متقفلش علي نفسك
ومتبعدش نفسك عن مراتك ومتفضلش خايف تسيبك
صدقها وصدق انها بتحبك وانها فضلت جنبك برغم كل اللي عملته علشان بتحبك
مراتك عوض ربنا ليك متضيعش عوضه من ايدك
حب نفسك يا احمد انت تستاهل تحب نفسك وتستاهل تتحب
صالح مراتك اتاسفلها وعوضها عن كل اللي عملته
ابدء معاها من جديد ابدء معاها بجد حياتك
وارحم نفسك ومتعقبهاش على اخطاء غيرها
انسي اللي فات وركز في الحاضر يا احمد وعيشه من قلبك من غير خوف كفاياك خوف بقالك سنين خايف
احمد :تفتكر هقدر ابطل خوف
وتفتكر هي هتقدر تسامحنى
مازن :انت هتقدر وهى هتسامحك لانها بتحبك حافظ على حبها ده واوعى تخسر حبها ليك لأنك مهما عملت مش هتعرف تعوضه
احمد بابتسامة :حاضر انا متشكر اوى يا دكتور
مازن :العفو بس مش عايز اشوفك هنا تانى
احمد:ان شاء الله بعد اذنك
فى بيت اهل حنان
حنان :ايه ده
احمد :ده ربع الشركة والفيلا كتبتهم باسمك
حنان :وتفتكر ده اللي انا عايزاه او ده اللي هيخلينى اسامحك وارجعلك مش بقولك انك متعرفش عنى حاجة امشي يا احمد
احمد:مش همشي وعارف انك مش عايزة كل ده بس انا عايزك شريكتى في كل ده وهتنزلى تشتغلى معايا في الشركة هنبقي مع بعض في الشركة وفى البيت
هشاركك حياتى كلها يا حنان والله هحكيلك كل حاجة عنى هتاسفلك كل يوم علي اللي عملته وهعوضك بس انتى ادينى فرصة انا بحبك يا حنان بحبك ومقدرش اعيش من غيرك الفيلا وحشة من غيرك انا بنام في الشركة من يوم ما مشيتى بروح الفيلا اغير بس وفي الوقت ده بحس انى مخنوق لانى هناك وانتى مش معايا
حياتى كلها وحشة من غيرك حقك عليا انا اسف انا اسف من هنا لحد اخر عمرى اعملي فيا اى حاجة بس متبعديش عنى مش هستحمل والله انا عملت كل اللي عملته لانى كنت خايف تسبينى
حنان :بس انا مكنتش هسيبك يا احمد
احمد: عارف بس مكنتش مصدق مكنتش قادر اصدق
انا قبلك محدش فضل معايا يا حنان ولا حد عمل علشانى نص اللي عملتيه انتى حتى
علشان كده كنت شايفك كتير عليا وكنت خايف تسبينى انتى كمان وساعتها مكنتش هتحمل انا قدرت اعيش واقف علي رجلى بعد كل اللي سابونى بس معاكى مكنتش هقدر لانك غيرهم يا حنان
كنت بدارى ضعفى وخوفي بقسوتى وجفايا
انما انا والله بحبك ومليش غيرك انا اسف سامحينى
حنان :مسامحاك يا احمد خلاص والله مسامحاك
انا كنت مستحملة ومببعدش من غير متقولى كل ده تفتكر بعد متقوله هقدر ابعد من غير ما اديك فرصة
انا حامل
احمد :قلتى ايه
حنان :انا حامل عرفت يوم ما ضربت....ااااا
يوم ما سبت البيت علشان كده كنت جاية فرحانة قلت ان الموضوع ده اكيد هو اللي كان مخلى تعاملك معايا كده ولما تعرف انى خلاص اخيرا حامل الاوضاع بينا هتتحسن
بس انت مدتنيش فرصة اقولك ومبقتش عارفة بعد اللي عملته المفروض اقولك ولا لا وحتى لو قلتلك هكمل معاك ولا لأ
احمد :حنان خلاص والله مهعمل كده تانى ادينى فرصة انسيكي الي عملته فرصة نبدء مع بعض من جديد وانا اوعدك انك مش هتندمى
حنان :مصدقاك وعلشان كده قلتلك
انا كنت خايفة اقولك ومش عارفة اقولك ازاى
بس كلامك خلانى خلاص مبقتش خايفة وحسيت انك تستاهل تعرف تستاهل تفرح يا احمد
احمد :دكتور مازن كان عنده حق انتى عوض ربنا ليا عن كل اللي شفته
حنان :دكتور مازن مين
احمد :لا ده موضوع كبير هحكيهولك بس واحنا فى بيتنا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر
