فى المقابر
ايمان :ده مش عدل
كل ما توحشونى انت وبابا ده كل اللى بفكر فيه وبحس بيه ان ده مش عدل
يعنى هو يفارقنا وانت تروحله وتسيبونى هنا لوحدى
طيب بابا كان تعبان ومحدش فينا كان عارف يشيل عنه وجعه
يمكن الموت رحمة ليه من وجعه ده
ودى الحاجة اللى كانت مصبرانى على فراقه
انما انت تسيبنى وتروحله ليه هونت عليك يا على تسيبنى لوحدى انت مش عارف انى مليش غيرك
كل يوم من اول ما بصحى لحد ما بنام مفيش فى دماغى غير سؤال واحد
انا هعمل ايه من غيركم هعيش ازاى واعيش لمين وعلشان ايه
طيب كنتو خدونى معاكم
ينفع كده تبقو سوا انتو الاتنين وتسيبونى هنا لوحدى
انا زعلانة منك اوى يا على
عارفة ان فراق بابا وجع قلبك وقطم ضهرك بس متخيلتش انك تسيبنى لوحدى وتروحله
زعلانة منك وانت واحشنى اوى
وكل ما توحشنى اكتر وكل ما احس قد ايه حياتى وحشة من غيرك اكتر وكل ما احس انى لوحدى اكتر كل ما ازعل منك اكتر
وعارفة انك مضايق منى علشان بعيط بس انت مبقتش موجود علشان تقولى متعيطيش شكلك مبيبقاش حلو لما تعيطى
بيبقى حلو لما تضحكى بس
وانا معنديش حاجة اعملها فى فراقكم غير العياط
عياط بيوجع القلب مبيريحوش يا على
انا قلبى بيوجعنى اوى وجسمى كمان انا كل حاجة فيا بتوجعنى اوى
ده مش عدل اللى انا فيه ده مش عدل
انا همشى دلوقتى وهجيلكم تانى
مع السلامة يا حبيب اختك
راندا :يلا بينا يا حبيبتى
ايمان وهى بتركب العربية :يلا
معلش يا راندا تعباكى معايا وجايباكى المقابر
بس انتى عارفة انا هخاف اجى لوحدى
مش فاهمة ازاى بابا وعلى يسيبونى لوحدى وانا جبانة كده
راندا :حبيبتى ربنا يرحمهم
ومفيش تعب ولا حاجة
انتى اختى يا ايمان مش بس صاحبتى
ومينفعش انك تقولى انك لوحدك انا معاكى
وبيت عمك كمان معاكى هما بيحبوكى يا ايمان
ايمان :وانا بحبهم وبحبك يا راندا
بس بابا وعلى حاجة تانية
من سبع شهور انا كان عندى عيلة
عايشة مع احن اب واجمل اخ فى الدنيا عايشين فى بيتنا
دلوقتى انا لا بقالى عيلة ولا بيت
فى بيت عمى انا بتعامل حلو
بس غصب عنى مبحسش انه بيتى انا بيتى اللى كنت عايشة فيه مع اهلى
عند عمى انا ضيفة وزيادة على عيلته مش جزء منها
لحد دلوقتى بحس بالغرابة لما اجى اخرج فاستأذن عمى ومش متخيلة انه يبقى رافض حاجة فاتحايل عليه علشان يرضى او اعيطله زى ما كنت بعيط لعلى اخويا علشان دماغه تلين ويسبنى اعمل حاجة عايزاها لأنه كان بيخاف عليا جدا وبيرفض حاجات اكتر من بابا
وبابا كان بيقلق على قلقه
بابا ربى على علشان يكون راجلى وكبيرى وسندى من بعده
ومرة واحدة الاتنين راحو منى الأصل والبديل مفضليش منهم حد فضلت لوحدى يا راندا
لوحدى ومش عارفة اتقبل اللى حصل ولا عارفة اعمل مع حد غيرهم اللى كنت بعمله معاهم ولا عارفة اعتبر حد غيرهم راجلى وكبيرى وسندى فى الدنيا
انتو موجودين انتى وبيت عمى موجودين ومش مقصرين
بس بابا وعلى محدش يغنينى عنهم مهما عمل
انا مش جاحدة والله ومش ناكرة اللى كلكم بتعملوه علشانى
ربنا ميحرمنيش منكم
بس اللى بتعملوه ده ولو اتعمل اضعاف اضعافه مش هيعوضنى عنهم غصب عنى والله
راندا وهى بتمسك ايديها :عارفة يا حبيبتى وفاهماكى وحاسة بيكى والله
ايمان :يعنى انتى مش زعلانة منى
راندا :لا يا حبيبتى مش زعلانة منك
بزياداكى عياط بقى
ايمان :مش عارفة ابطل عياط يا راندا حاسة انى عايزة اعيط طول الوقت
مش عارفة دموعى مبتخلصش ليه بجيب كل الدموع دى منين
راندا :ربنا يهون عليكى يا حبيبتى ويفرح قلبك ويعوض صبرك خير
ايمان :يا رب يا راندا يا رب
راندا :وبعدين مين دى اللى معندهاش بيت
اومال لو مكنتش العمارة كلها بإسمك بسم الله ماشاء الله احنا مبنقرش
ايمان :البيت مش حيطان جواها عفش يا راندا
البيت مكان بتعيشى فيه مع ناس بتحبيهم وبيحبوكى
مكان تستخبى فيه من الدنيا كلها مع ناس بتبقى قدامهم بكل حالاتك
البيت يعنى عيلة
وانا خسرت عيلتى وخسرت احساسى بأن ليا بيت
وخايفة محسش احساس ان ليا بيت ده تانى
راندا :ربنا هيكرمك ويعوضك وهتعملى احلى عيلة
هتتجوزى وتخلفى ولاد ويبقى جوزك وولادك هما عيلتك
وبعدين انا بهزر معاكى علشان تضحكى وتفكى
ايمان :مليش نفس اضحك
اسفة لو دمى تقيل وكئيبة
راندا :بتتأسفى على ايه بس يا ايمان
ده حقك يا حبيبتى عبرى عن حزنك ومتضحكيش لو مش قادرة تضحكى
يا ريت كان فى طريقة اشيل بيها الحزن ده كله من قلبك
والله ما كنت هتأخر
ايمان :يا ريت كان فى طريقة اشيل انا بيها كل الحزن ده من قلبى
عارفة يا حبيبتى من غير ما تقولى
انا طلعت بيكى من الدنيا يا راندا انتى صاحبة عمرى اللى مجاليش ولا هيجيلى زيها تانى
انتى احلى حاجة فى حياتى انتى احلى حاجة فى الدنيا
انا حزينة حزن كبير دلوقتى حزن اكبر من انى اوصفه بكلام
بس ده مينفيش انى بحبك
انا حزينة وقلبى بيوجعنى وبحبك
عارفة انى بقالى سبع شهور من موت بابا وبعده موت على
وانا مبعملش حاجة غير انى منكدة عليكى بكلامى وعياطى
بس انا مليش غيرك اعيطله واشتكيله
ولو زهقتى منى ومن حزنى عرفينى
راندا :وهتعملى ايه ساعتها هتشوفى صاحبة غيرى تعيطيلها وتشتكيلها علشان اسقى فينو فى دمك وانا بشرب منه
ايمان :انا مليش غيرك يا راندا وقتها هسكت مش هعيط قدام حد ولا هشتكى لحد
راندا :ليه وانا كنت اطرشيت ومش هعرف اسمعك علشان تبطلى تشتكيلى
لأخر عمرى وعمرك حزنك حزنى وفرحك فرحى يا ايمان
واوعى تقولى الكلام الأهبل ده انا مش ممكن ازهق منك ابدا
ايمان :تسلميلى يا حبيبتى
وصلنا مش هتطلعى معايا
راندا :مرة تانية
ورايا مشوار
ايمان :مشوار ايه ده
راندا :هقابل احمد
ايمان :بقينا بنقابل احمد كتير وبنكلمه كتير فى الموبايل
مش عادية الحاجات دى صح يا راندا
راندا :لا مش عادية
وباينى كده والله اعلم على وشك انى احبه او بقيت بالفعل بحبه
ايمان :ربنا يسعدك يا حبيبتى
