تعرف تعاكسنى
وبانى اميرتك تحسسنى
وتكمل فيا اللي ناقصنى
تعرف تلاغينى
وتبقي شريك سنينى
وتكون راجلى ومالى عينى
تعرف تخطفنى
واكتر منى تعرفنى
وتجبلى حقى منك وتنصفنى
تعرف تحبنى
وتسكنى وترحمنى وتودنى
وتبقي بحبى ليك ملكتنى
تعرف تأمنلى
وفى فرحك وحزنك تشاركنى
وتبقالى الحياة وادمنك وتدمنى
ضغطت رؤي نشر علي حسابها علي الفيسبوك وهي بتقول وده هتلاقى فين ده يا ست رؤى يخربيت الفراغ العاطفى اللي انا فيه ايه عايشة فى صحرا سبعة ونص مليار نسمة في الدنيا ومش لاقية انسان واحدة احبه ويحبنى وينتشر في الفراغ اللي عندى ده ويملاه
عشر مشاركات وتلاتين احببته وخمسين لايك طبعا شركاتى في الفراغ اللي انا فيه وناس بتعمل منشن لبعض اهيه دى باينها حالة عامة ومش انا لوحدى ايه ده اضحكني بتسخر من مشاعرى دى ولا بتضحك من همها
اياد بعتلها رسالة عالماسينجر
اياد:ده اعلان جواز ده يا رؤى
رؤى :لا ما شاء الله دمك خفيف اوى
اياد مش عاجبك اللي بكتبه اعملي ان فريند انت الراجل الوحيد اللي عندى فى الاصدقاء وسط التجمع البناتى اللي انا عملاه ده فبناقص يعنى
ده انا حتي اخواتى مش عندى ولا ابويا وجنابك منور الاصدقاء عندى بالغصب
اياد :انا اللي كسبت في العبة وده كان حكمي
رؤى :وانا نفذته متندمنيش بقي اكتر من كده مكنش دور شايب كسبتنا فيه وشلته انا ده
اياد :خلاص خلاص متقفشيش كده
بس انا هتجنن منك يا رؤى منين نفسك تحبي وتتحبي كده ومنين مبتتعامليش مع حد خالص في الولاد
دفعتك ميعرفوكيش تقريبا وفي العيلة بتتعاملي مع ولاد عماتك وخالاتك بس وبحدود كمان
رؤى :انا مبؤمنش بالصداقة بين الولد والبنت طبعا غير انها اصلا حرام كمان انا عايزة حد يتعب علشانى كده انا ابنى اسوار وهو يهدها انا ابعد وهو بالعافية يقرب يقتحمنى كده ويخش حياتى بلوى الدراع
اياد :مش عايزاه يعملك عاهة مستديمة في وشك بالمرة
ايه يا رؤى هتحبي بلطجي
رؤى :مش حكاية بلطجي بس انا عايزة واحد قوى في حبه يشوفني حقه اللي مش هيتنازل عنه يبقي عايزنى انا وبس مش انا او نيرمين او سارة ويختار مين الاحسن فينا وكانه عامل قرعة علي قلبه
اياد :وعلشان كده بترفضي اللي ببتقدمولك
رؤى :اه علشان محستش ان اي واحد فيهم انا فارقة معاه كلهم ممكن انا او غيرى عادى مش مناسبين خالص بالنسبالي
وفي الي عايز يتجوز وانا بدرس وانا بكره الدراسة وبكره شغل البيت ومش هعمل حاجتين بكرههم مع بعض لا كتير عليا
اياد :عايزة تفهمينى انك مش عايز تتجوزى علشان كده طيب اديكى اتخرجتى هتتحجي بايه
رؤى :بصراحة انا خايفة وملقتش حد في الى اتقدمو يطمن خوفي ده علشان كده موافقتش ولسه رفضا واحد من يومين وعمك اتضايق ومرات عمك مش طيقانى
اياد :خايفة من ايه
رؤى :خايفة من المسئولية خايفة افشل خايفة يكون ميستاهلش كل الانتظار اللي استنيته ده خايفة ميقدرش مشاعرى خايفة ميبقاش قد الاحلام اللي رسمتها
خايفة افضل خايفة حتي بعد ما يدخل حياتى
خايفة ميفهمش خوفي ده
اياد :يعنى ولا حد في الي اتقدمولك او اللي تعرفيهم قدر يطمن خوفك ده
رؤى :وهو لو حد قدر يا اذكى اخواتك كان زمانى بقولك انى خايفة
اياد :ايوه بقي ليه
رؤى :ليه ايه
اياد:ليه بتقوليلي انك خايفة
ليه انا الراجل الوحيد علي صفحتك
ليه بتتكلمى معايا مع انك حطا حدود في تعاملك مع الكل
ليه يا رؤى ليه ردى عليا
عملتله بلوك لما عرفت الاجابة مكتبتهاش وعملتله بلوك
اياد ابن عمى متربين سوا عايشين في نفس العمارة عمى وبابا خدو شقتين قصاد بعض انا وعمر وليلي اخواتى متربين مع اياد وحسناء واحمد وعلياء ولاد عمى انا اصغر اخواتى عمر اتجوز حسناء بنت عمى وليلي اتجوزت ابن صاحب بابا
واحمد خطب واحدة زميلته في الكلية وعلياء لسه ثانوية عامة احمد قدى واياد اكبر منى بتلت سنين
علاقتى باحمد اقل من العادية لانى حطا حدود او المفروض انى حطا حدود في تعاملي مع الرجالة الوحيد الي استثنيته من الحدود دى اياد هو مسبليش فرصة احطها كان بيتكلم معايا كتير ويسال ويتكلم بتفاصيل وانا كنت بستعبط وبقول لنفسي انه ابن عمى ومتربين سوا وزى عمر اخويا ونسيت او تناسيت انه مفيش حد زى عمر اخويا واياد زيه زى اي حد يحللي لازم تكون في حدود في التعامل وادى النتيجة ادينى حبيته
انا بحب اياد ده اللي اكتشفته لما فكرت في اجابة اسئلته
استغفرت ربنا لانى محافظتش علي قلبى ولانى علقت نفسي بحد يحللي ولانى افتكرت نفسي كبيرة عالفتنة وكبيرة علي الذنب وادينى اذنبت ومغضتش قلبى لحد ما يجى اللي يسرقه بالحلال استغفرت كتير وقررت انى مش هرجع للذنب ده تانى واياد زيه زى احمد زى اي حد بس قلبى كان بيوجعني اوى اياد وحشنى فضلت اسبوع مبتكلمش معاه بعد ما عملت بلوك مبشفوش لانى مبخرجش من البيت علشان مشفوش
مكنش بيوحشنى قبل كده بصراحة هو مكنش بيدينى فرصة يوحشنى دايما بيكلمنى بس مجرد ما اعترفت لنفسي انه بحبه وانا حسا انه واحشني كأننا متكلمناش من سنة مش من اسبوع وكل ما يوحشنى اكتر ابكي واستغفر ربنا اكتر واجدد توبتي
بعدين لقيت بابا بيقولى ان عمى طلب ايدى لاياد وهيجو النهاردة
انا اتفاجات فرحت وخوفت انا مش هقدر اشوف اياد واتكلم معاه صوتى مش هيطلع
اليوم خلص بسرعة وجه ميعادهم
وخرجت اقعد معاهم وانا ببص في اي حتة ما عدا المكان اللي اياد قاعد فيه
اياد طلب من بابا يتكلم معايا علي انفراد وبابا وافق وسابونى لوحدى معاه
اياد :بلوك يا رؤى انا تعمليلي بلوك وكمان اسبوع مبتخرجيش من البيت يعني لا اتكلم معاكى ولا اشوفك هنت عليكي تعملي فيا كده بتحرمينى منك ليه يا رؤى
رؤى :
اياد بعصبية :لما اكون بكلمك تبصيلي وتردى عليا
رؤى :انت بتزعق ليه
كنت عايزنى اعمل ايه ها رد عليا عايزنى ارد اقولك ايه
اياد :تجاوبينى على اسئلتى مش تهربي بالبلوك وتحبسي نفسك فى البيت
رؤى :انا مكنتش بهرب انا كنت بصلح وضع غلط انت مش زيك زى عمر علشان ابقى بتعامل معاك كده
اياد :وانت مين قالك انى عايزك تعامليني زى عمر ولا انى هسمحلك تشوفينى زى عمر اصلا انا اياد يا رؤى ومش زى زى اي حد في حياتك انا اياد وبس
رؤى :
اياد :يبنتى انتى القطة كلت لسانك ساكتة ليه
رؤى :مش عارفة اقول ايه
اياد :متقوليش حاجة انا اللي هقول
كتب كتابنا الاسبوع الجاى والفرح كمان شهرين
جدعة قولي لا يا رؤى ولا حاولي مجرد محاولة تهربى منى تانى
رؤى :انت بتتكلم بثقة كده ليه طب على فكرة انا هع
اياد :ولا هتقدرى تعملي اي حاجة عارفة ليه
رؤى :ليه بقي ان شاء الله
اياد :لانك مبقتيش خايفة يا رؤى
رؤى :
اياد :انا هتكلم مع عمى في التفاصيل وانتي اعملي حسابك بكرة هننزل نجيب فستان كتب الكتاب وبعد بكرة هنكتبه كتير اوى اخر الاسبوع والبلوك يتشال النهاردة انتى سامعانى
الي القاء يا زوجة المستقبل القريب
ومشى سابنى وخرج لبابا وانا مش عارفة استوعب اللي عمله واللي قاله بس مسكت موبايلي فتحت الفيس وشلت البلوك
بعتلي طلب صداقة قبلته طبعا وبعتلي عالماسينجر
اياد :ايوه كده رؤى شاطرة بكرة بعد العصر هننزل نشترى الفستان اعزمى اللي انتى عايزاه من صحابك علي كتب كتابنا اللى هيبقي بعد بكرة ده اخيرا
رؤى :حاضر
وقفلت الفيس علي طول مكنتش حاسة انى هقدر اقوله حاجة تانية ولا هقدر اسمع منه حاجة تانية
ونزلنا جبنا الفستان وجه يوم كتب الكتاب وكتبناه وطلب اياد من بابا نخرج انا وهو وبابا وافق
وخرجنا نتعشي فى مطعم حلو اوى اول مرة اروحه
اياد :عارفة انا جيت المكان ده مرة واحدة وحبيته واتمنيت اجي تانى وانتى معايا واهو الحمد لله حصل ايه رايك في المكان
رؤى :حلو
اياد هو ايه اللي حصل وازاي وليه
اياد :اللي حصل انى الحمد لله كتبت كتابي عليكى اخيرا واذاى علي يد ماذون واتنين شهود
وليه بقي لانى بحبك يا رؤى بحبك من زمان وكنت بقرب منك بحذر بتكلم معاكى وانا بفكر فى الكلام مية مرة قبل مقوله خايف اقول حاجة تبعدك عنى وتهد كل الي بنيته
عارفة لما قريت اخر حاجة كتبتيها كنت عايز اقولك انى هعرف اعملك كل ده واني اصلا معتبرك كل ده بالنسبالي وانى عايز منك فرصة بس اثبتلك فيها انى اقدر اكون الشخص ده في حياتك وانى اصلا مش هسيب حد غيرى يعملك كل ده
بس طبعا مكنش ينفع اقول كل ده فكالعادة هزرت وحفلت علي اللي انتى كتباه مع انى حبيته بس بعد ما قلتيلي انك خايفة وانك مستنية حد يقتحمك قلت لنفسي كفاية خوف انتى كده كده بترتاحيلي وبتتعاملي معايا غير اي حد وانا هخليكى تحبيني سالتك الاسئلة اللي سالتهالك علشان كنت عايزك تعرفي انا ايه بالنسبالك علشان مترفضنيش لما اتقدم
وكمان انا كنت عايز اسمع منك كلام يشجعني اكمل اللي بدءته لما عملتى بلوك مبقتش فاهم دى حاجة لصالحي ولا لا بس لما متكلمناش اسبوع قلت لا كفاية كده انا هتقدملك ولو رفضتى هتقدم تالت وعاشر لحد ما توافقى
كنت خايف قبل ما اجى بس لما شفتك وحسيت اد ايه كنتى وحشانى لقيت نفسي بجد عايز اقوم اكسرلك دماغك واقولك اوعي تعملي كده تانى وقررت انى مش هسمحلك تعملي كده تانى وانك هتبقي بتاعتي وعلي اسمى النهاردة قبل بكرة
والحمد لله بقيتي
رؤى :
اياد:رؤى انا مش مستعجل وهستناكى العمر كله لحد ما تيجى تقوليلي انك بتحبينى زى ما بحبك خدى كل الوقت اللي انتي محتاجاه بس وانتي جنبي ومعايا
المهم بقالنا ساعة ومطلبناش الاكل تحبي تاكلي ايه
رؤى :زى ما انت هتاكل
وروحنا البيت وقبل ما انام مسكت موبايلي وغيرت الحالة الاجتماعية لمتزوجة وكتبت حاجة وعملت لاياد اشارة فيها
اتيت كنسمة برد عند الفجر 💖
كجنون شغف بعد عمر من الملل 💖💖
كاستجابة لدعوة قيلت تحت المطر 💖💖💖
فكيف لي الا احبك؟!!!
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
