عالية :انا مش فاهمة انتى ليه حاصرة نفسك بين انك تكونى مع محمد اللى بيحبك بس انتى مبتحبيهوش ولا عمرو اللى بتحبيه بس هو مبيحبكيش
سمر :وهو فى اختيار تانى ما هو المثل بيقول خد اللى بيحبك مش اللى بتحبه يعنى هى المفروض توافق على محمد وتطلع عمرو ده من دماغها
عالية :فى اختيار تانى وهى انها تاخد اللى بيحبها وبتحبه لا تاخد واحد بيحبها بس هى مبتحبوش فتتعسه ولا تاخد واحد بتحبه بس مبيحبهاش فيتعسها
ليلى :يعنى انسى عمرو
عالية :ايوه طبعا تنسيه
سمر :اكيد تنسيه الحب من طرف واحد ده حاجة مقرفة جدا واسألينى انا انا اوقات ببقى عايزة اخنق كريم بس بفتكر انى كده هيتم لمار بنتى فبغزى الشيطان وخلاص
عالية :بقالكم سنتين متجوزين ومعرفتيش تخليه يحبك
سمر :مش سايبلى فرصة مبيفكرش غير فى شغله وبس اوقات بحس انه معندوش قلب اصلا بس انا العيب عليا طبعه كان باين فى الخطوبة وانا اللى قولت هغيره مفكرة نفسى سوبر ومان معرفش ان محدش بيتغير غصب عنه واللى مش عايز يتغير مبيتغيرش ولو اتشقلبتله وولعتله صوابع ايدى ورجلى كمان شمع
ليلى :يعنى اوافق على محمد
سمر :اه طبعا
عالية :لا طبعا وقتها هتعملى انتى فيه اللى اتعمل فى سمر وهتبقى انتى مكان كريم طلعى نفسك بره الدايرة دى انتى ليه بتفكرى ان يا محمد يا عمرو هى الدنيا مفيهاش غيرهم يا بنتى ما رجالة الدنيا كتير يعنى وبأذن الله تقابلى اللى يحبك وتحبيه اللى لا تظلميه ولا تظلمى نفسك وانتى معاه
سمر صورى المنظف اللى عندك وابعتيلى صورته اللى جايباه ده ملوش اى لازمة ناقص الحس الازاز بلسانى علشان ينضف ويلمع
سمر :حاضر
ليلى :انتى بتلمعى الازاز وانتى بتكلمينا
عالية :اه عادى
سمر :وانا بكوى قمصان كريم اكتر حاجة بعملها فى حياتى مبيلبسش القميص يومين ورا بعض كل يوم بقميص مختلف كل يوم ايه كل خروجة ده لو رجع من الشغل وهيخرج يقابل صحابه بيغير الطقم كله واكوى انا بقى
ليلى :انا مستحيل اعمل زيكم حياتى تبقى كلها شغل البيت وخدمة جوزى ويوم لما اجى اتكلم اسأل عن منظف للازاز انا هبقى زوجة مش خدامة
عالية :اه طبعا لو وقفت فى المطبخ اعمل اكل ولا مسحت الشقة ونضفتها ابقى خدامة انما لما افضل فى الشغل بالاتناشر ساعة ده عادى مش خدمة انا بحقق ذاتى وببنى كيانى ولو جوزى علا صوته عليا يبقى تحكم انما لو مديرى علا صوته عليا يبقى مضغوط من الشغل وعادى مجاش يمة كرامتى ولا حاجة مش ده الكلام اللى بتشيريهولنا فى البوستات الهبلة اللى بيكتبها ستات مخها فاضى
ليلى :انتى بتقرى البوستات دى
عالية :بقراها وبعملك اضحكنى مبتشوفيهوش انتى وسط كمية ريأكتات الاعجبنى والاحببته اللى بيعملوهالك البنات الهبلة اللى عندك
ليلى :ومين قال ان ده هبل
عالية :انتى مفكرة انك لو وهبتى حياتك لشغك مش هتندمى لما تكبرى وتلاقى نفسك من غير زوج وولاد مفكرة انك لو مبنتيش اسرة هتبقى بنيتى كيان فى الشغل وبعد ما تموتى بقى هيجرى ايه هيعملولك تمثال ذهب ويحطوه فى مدخل الشركة ولا هتتنسى ومحدش هيفتكرك هتبقى تعبتى طول عمرك على الفاضى على الاقل لما تتعبى مع جوزك وولادك تعبك مش هيبقى على الفاضى وهتفضلى عايشة حتى بعد ما تموتى بولادك وباللى علمتيهولهم اللى بيخلف مبيموتش ولا بتموت سيرته
ليلى :انا هتجوز واخلف بس عمرى ما هسيب شغلى مهما حصل زى ما سمر عملت
سمر :انا معرفتش اوفق بين الشغل والبيت وبعد ما خلفت لمار الموضوع بقى مستحيل
ليلى :وليه انتى اللى تسيبى شغلك
عالية وهى بتضحك :كان المفروض ان كريم هو اللى يسيب شغله ويقعد بالبنت ويبقى ياخد منها مصروف البيت يا هالهوتا انتى
ليلى :لا كانو جابو للبنت دادة
عالية :واو تجيب دادة تربى بنتها ويا ترى بقى البنت لما تيجى تقول مامى تقولها لسمر اللى بتشوفها كام ساعة فى اليوم ولا تقولها للدادة اللى معاها طول الوقت طيب تفتكرى لما لمار تكبر وتحط سمر فى دار مسنين لانها كبرت وهى مش فاضية تهتم بيها وشغلها اهم طبعا تفتكرى وقتها سمر تقدر تلومها مش ده اللى هى ربتها عليه ان الشغل اهم من العيلة واهى البنت هتطبق عليها اللى اتعلمته منها وتتجوز وتخلف وترمى العيال للدادة وتبنى هى كيانها فى شغلها وتجيب للمجتمع نماذج مشوهه عانت من التفكك الاسرى متعرفش اصلا يعنى ايه عيلة بجد وتبقى بنت كيانها وهدت ولادها
سمر :عارفة انا ماما كانت مضطرة تشتغل علشان ظروفنا مكنتش كويسة خالص واحنا كنا خمس عيال محتاجين ياكلو ويشربو ويتعلمو ويتعالجو يمكن ده سبب من الاسباب اللى خلتنى احب كريم انى عارفة انه ماديا كويس انى مش هخاف على مستقبلى ولا مستقبل ولادى وانا معاه انى عارفة انى مش هتحوج لحد اصل الحوجة مرة اوى بس ربنا رحيم وكريم ابويا وامى علمونا وجوزنا كمان وربنا عوضهم بينا عن التعب اللى تعبوه علشانا ياما حرمو نفسهم علشانا
عالية :انا بقى امى كانت بتشتغل لانها بتحب شغلها ومسئولية البيت مع مسئولية الشغل خلتها دايما مشغولة بالعافية بترجع من الشغل تعمل اكل يوم الجمعة للمسيح والغسيل مكنش عندها وقت تقعد معانا وتسمعنا
مكنش عندها طاقة تعرف مشاكلنا وتحلها طاقتها ووقتها كانو يدوبك على قد البيت والشغل اوقات كانت بتصعب عليا علشان التعب اللى بتتعبه ده كله واوقات كنت ببقى عايزة اقولها وانا ذنبى ايه انا عايزة امى فى حياتى عايزة ام تبقى صاحبة ليا ويبقى سرى معاها عايزة ام تذاكرلى سماح اختى لما اتجوزت بقا سرها مع حماتها حماتها طيبة اوى وسماح بتحبها حماتها تعرف عنها اللى ماما متعرفوش حماتها بقت صاحبتها بس ماما لا علشان كده انا قررت انى مش هعمل زيها مش هحب شغلى اكتر من بيتى وولادى هيبقى بيتى وولادى اولا وشغلى ثانيا انا مبتحملش قعدة البيت بس لو معرفتش اوفق بين شغلى وبيتى هسيبه واشوف شغل ابسط مش محتاج وقت طويل ولا هيشغلنى عنهم مش هخلى ولادى يحسو ان شغلى واخدنى منهم وهبقى صاحبتهم قبل ما اكون امهم
سمر :وانا كمان عايزة اعمل كده مع لمار ومع اخواتها اللى هجيبهم انا عايزة يبقى عندى ولاد كتير يبقى عزوتى فى الدنيا
عالية :فمن اولها كده يا ليلى لو هتجيبى عيال ترميهم للدادات علشان مش فضيالهم يبقى بلاش تجيبيهم احسن لانهم من حقهم ان اللى تربيهم وتهتم بيهم امهم مش الدادة
ولو شايفة ان اللى هتتجوزيه هيكون مجرد دكتاتور عايز يقمع حريتك ويستعبدك ديكتاتور هتوقفيله على الواحدة وهترديله كلمة بكلمة وعمرك ما هتتعبى علشانه فى حاجة لانك هتعتبرى دى تضحية هو ميستحقهاش زى ما البنات العبط اللى انتى بتشاركى كلامهم بيقولو يبقى متتجوزيش هو هيبقى عايز زوجة ملوش ذنب يلبس فى واحدة عايزة تكون زوج زيها زيه مش زوجة واحدة بتشوه فطرتها اللى ربنا فطرها عليها وهى انها ست بتحتاج راجل يحميها ويكون مسئول عنها راجل حياتها متنفعش من غيره مش راجل تعتبره مجرد ديكور فى حياتها
ليلى :محسسانى ان الرجالة ملايكة مبتغلطش
عالية :مش ملايكة وفى رجالة فيها العبر ربنا يبعدهم عننا ويكفينا الشر وكده كده انتى هتتعبى مع اللى هتتجوزيه وهو كمان هيتعب معاكى اختارى اللى يستاهل التعب ده
مبقولكيش متشتغليش اشتغلى بس ميبقاش شغلك اهم من بيتك مبقولكيش متبنيش كيانك ابنيه بس متهديش ولادك البيت والزوج والولاد نعمة لو مش هتقدرى النعمة دى يبقى بلاها جواز بقى واتفرغى لشغلك
على فكرة يا ليلى انتى مش احسن من سمر انتى بتشغلى كام ساعة فى اليوم عشرة هى بتشغل ستاشر ساعة فى اليوم واكتر كمان لأن لمار مش هتسيبها تنام تمن ساعات على بعض انتى بتاخدى فلوس مقابل شغلك هى بقى المقابل بتاعها هيكون حب ولادها ليها وانها تحسن تربيتهم علشان يكونو سبب دخولها الجنة انا كمان مش احسن منها علشان بشتغل ولو جه عليا يوم واتخيرت بين بيتى وشغلى من غير تردد هختار بيتى لانى لو نجحت فى شغلى وفشلت فى بيتى ابقى انسانة فاشلة جدا وضيعت عمرى على الفاضى كمان
ليلى :يا ستى ما انجح فى الاتنين ليه لازم اختار بينهم
عالية :انجحى فى الاتنين بس خلى دايما بيتك اولا وشغلك ثانيا مش العكس لو اضطرتك الظروف تيجى على حاجة فيهم يبقى تيجى على شغلك علشان بيتك مش العكس وبطلى تشيرى البوستات اللى بتضحكنى دى ماشى اقرى عن المرأة فى الاسلام اقرى فقه المرأة اقرى واعرفى دورك الحقيقى فى اسرتك الصغيرة اللى هى اهلك وبيتك واسرتك الكبيرة اللى هى المجتمع كله
ليلى :تمام هعمل كده بصراحة من كلامك خوفت ولادى يشوفونى كده او يحطونى فى دار مسنين لما اكبر ويستكترو عليا يفضلو جمبى ويستكترو عليا وقتهم
عالية :لو استكرتى عليهم وقتك وهما صغيرين هيستكترو عليكى وقتهم لما يكبرو وهتبقى انتى اللى ربتيهم على كده
سمر وهى بتضحك :دى كده تبقى مربتهمش اصلا
عالية :افعالها معاهم هتربيهم هيتعلمو منها وزى ما هتعمل هيعملو
ليلى :تمام يبقى انا هرفض محمد وهطلع عمرو من دماغى
عالية وهى بتضحك :ده انا نسيت ان الموضوع على بروتة والله نسيت ان محمد وعمرو هما سبب المكالمة الجماعية اللى احنا عاملينها دى
ليلى :رصيدى يا ستى بس مش خسارة فيكم انا فعلا كنت محتارة وكلامى معاكم رتبلى افكارى
سمر وهى بتضحك :كان نفسى ارتبلك افكارك شوية كمان بس كريم رجع ولازم احط الغدا والصراحة انا كمان جعانة اوى فهبيعكم عادى
ليلى وهى بتضحك :وانتى زياد مرجعش يا عالية وهتبيعينى علشانه
عالية وهى بتضحك :وهو لو رجع كان زمانى لسه برغى معاكم يا بنتى بقى انا عمالة اسمعك عريضة فى تقدير الزوج والبيت واعمل كده فى جوزى هيبقى باب النجار مخلع يعنى
سمر وهى بتضحك :ده كده مش هيبقى فى باب اصلا هقفل انا ماشى
ليلى :ماشى يا ستى بالهنا والشفا مقدما
سمر :الله يهنيكى يا قلبى مع السلامة يا بنات
عالية :واهو مفضلش غيرى انا وانتى
ليلى وهى بتضحك :رضا مش احسن من مفيش المهم انا زى ما قولتلك هرفض محمد علشان مظلموش وهبطل تفكير فى عمرو علشان مظلمش نفسى وهقرء الحاجات اللى انتى قولتيلى عليها بس مش هبطل اقرء للبنات اللى بحب كلامهم وبشيره الا لو حسيت بنفسى ان كلامهم غلط
ليلى :ماشى يا حبيبتى وعموما انا متأكدة انك لو قريتى اللى قولتلك تقريه وفهمتيه كويس هتشوفى ان كلام البنات دى اى هبل فى الجبل
ليلى وهى بتضحك :وهعمل عليه اضحكنى لو شوفته
عالية وهى بتضحك :وهتعملى عليه اضحكنى لو شوفتيه
افكار كتير اوى مشوهة بقت حوالينا عن الاصدقاء والاهل والازواج والولاد وعلاقتنا بيهم وللاسف الافكار المشوهة دى منتشرة وليها مؤيدينها اللى بيدافعو عنها بكل قوتهم كل هدفهم يشوهو افكار عدد كبير من الناس علشان يبقو زيهم علشان الافكار المشوهة دى تبقى هى الاساس تبقى قواعد راسخة ومعتقدات ثابتة ويتنسى الافكار السليمة تندفن ويحل محلها الافكار المشوهة العقيمة دى اللى بتهدم المجتمع كله
متسمحوش لحد يشوه افكاركم متسمحوش لحد يسمم عقولكم اقرو فى دينكم اقرو القرءان والاحاديث وتفسيرهم اقرو عن النبى عليه الصلاة والسلام وعن زوجاته وابنائه وعن الصحابة دينكم تعرفو من القرءان والسنة مش من الافلام ولا المسلسلات ولا بوستات الفيس ولا حتى من الناس اللى حواليكم كل الحاجات دى مليانة افكار مشوهة وكلها نقص انما دينا دين كامل لا فيه اى نقص حاشالله ولا تناقض
الافكار المشوهة حواليكم فى كل مكان حاربوها بالمعرفة اعرفو ربنا واعرفو دينكم وقتها هتحمو نفسكم وعقولكم وحياتكم كلها من الافكار المشوهة💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يزره زائر ولم يذكره ذاكر
