مريم :لا ما انا مش جيباكى تقعدى معايا وجيبالك صحابى علشان تقعدى فى وسطنا ساكتة كده
روضة :ما انا مش عارفة اقول ايه
كاميليا :قولى اى حاجة يا روضة او نقول احنا فهمونا طيب ايه المشكلة لحسن الحلوة اختك قالت تعالولى ضرورى ومقالتش فى ايه
نوال :ايوه ايه بقى الضرورى اللى جايبانا علشانه
مريم :وهو انا محتاجة سبب علشان تجولى
كاميليا :لا طبعا مش محتاجة بس انتى اللى قولتى نجيلك ضرورى فايه بقى الضرورى اللى جيبانا علشانه
مريم :روضة
نوال :مالها روضة مالك يا روضة فيكى ايه
مريم :لا اتكلمى ومتسكتيش انا جبتهم لما لقيت ان كلامى مش بيساعدك قولت يمكن كلامهم هما يساعدك
كاميليا :انتى زى ريهام ومروة اخواتى يا روضة احكى يا حبيبتى فى ايه
روضة :انا بكره كليتى حقيقى بكرهها مش قادرة اروحها واحضر محاضرات مش عارفة افتح كتب واذاكر بعيط بس وبنام كتير ومباكلش تقريبا وبحضر يوم واحد فى الاسبوع حاسة انى غريبة وانا فيها ده مش مكانى انا بعمل ايه هنا حاسة انى فشلت وعقابى على فشلى هو وجودى فيها
نوال :اهدى بس ومتعيطيش عارفة انا مريت بنفس اللى انتى مريتى بيه ده او لا انا اسوء منك كمان عارفة ليه
روضة وهى بتمسح دموعها :ليه
نوال :علشان انتى اهلك ملاموكيش على مجموعك مريم جابتك تقضى معاها يومين علشان تبقى احسن ومامتك وباباكى وافقو انك تجيلها وهى من كتر ما هى بتحبك وخايفة عليكى لما لقت انها مش عارفة تساعدك جابتنا علشانك
يعنى اهلك بيحبوكى وبيدعموكى مهما حصل انا بقى اهلى قالوهالى فى وشى انتى خذلتينا انتى ضيعتى املنا فيكى
يا خسارة فلوسنا اللى صرفناها على دروسك يا خسارة دعانا ليكى
روضة :معقول قالولك كل ده
نوال :وقالو اكتر من كده كمان
روضة :ومفكروش فى احساسك ومراعوش مشاعرك
نوال :لا هما تقريبا كانو مفكرنى من حديد ومعنديش لا مشاعر ولا قلب يتوجع من كلامهم
روضة :وانتى عملتى ايه
نوال :معملتش حاجة كنت بسكت واسمعهم وبس وبالليل بقى اعيط وانا لوحدى عارفة امتى بطلت عياط وحبيت حياتى وحتى كليتى حبيتها
روضة :امتى
نوال :لما عرفت مريم وكاميليا انا كان مستحيل اعرفهم لو كنت دخلت كلية تانية ولما بعد ما عرفتهم بقى عندى نفس للمذاكرة وبقيت اذاكر واجيب تقدير لقيت انى لو كنت دخلت كلية تانية مكنتش همشى فيها لا قدراتى ولا انا نفسى كنت هعرف انجح فى كلية تانية وبعد ما اتخرجت الحمد لله لقيت شغل يمكن لو كنت اتخرجت من الكلية اللى كنت عايزاها لا كنت همشى فيها ولا كنت هلاقى شغل بسهولة ولا كنت هعرف مريم وكاميليا انا ربنا عوضنى بيهم قبلهم انا كنت دايما لوحدى
انتى عارفة محمد جوزى دكتور ومش بس كده دكتور قلب زى ما انا كان نفسى اكون عايزة اقولك لما بيكلمنى عن شغله بتأكد اكتر واكتر انى مكنتش انفع دكتورة وان اختيار ربنا ليا احسن مليون مرة من اختيارى
روضة وهى بتفكر :هو كلامك سليم بس...ما انا ممكن محبش كليتى برضه ولا احب مجال شغلها اعمل ايه ساعتها
كاميليا :اعملى زيى خدى كورسات فى المجال اللى يعجبك واشتغلى الشغل اللى انتى عايزاه
الكلية بداية لمستقبلك مش نهاية ليه وياما ناس دخلت كلية واشتغلت شغل ملوش علاقة بيها وياما ناس ناجحة فى شغلها وهى مدخلتش كلية من اساسه
روضة :انتى محبتيش الكلية رغم وجود مريم ونوال معاكى فيها
كاميليا :لا حبيتهم هما وحبيت السنين اللى قضيناها سوا فى الكلية انما الكلية نفسها واللى كنت بدرسه فيها عمرى ما حبيته ولا كنت هشتغل بيه كان اهونلى افرش بدرة مشوى على الكورنيش ولا اسرح بمناديل فى الاشارات ولا انى اشتغل فى التدريس تدريس ايه بس وانا مبكرهش فى حياتى قد المذاكرة هقنع العيال تذاكر ازاى هشرحلهم ازاى اصلا لا حرام مستقبلهم يضيع على ايدى
مريم وهى بتضحك :اهى كاميليا لو بقت مدرسة كانت هتخلى كل الحصص العاب
نوال وهى بتضحك :لا متظلميهاش العاب ورسم وموسيقى كمان
كاميليا بابتسامة سمجة :ده ايه العسل اللى انتو فيه ده مصاحبة ازايز شربات يا ناس
بصى يا روضة فكك من الهزار البارد بتاعهم ده وركزى معايا الثانوية العامة وحتى الكلية مراحل فى حياتك مراحل صعبة ومهمة بس فى الاول والاخر مجرد مراحل مينفعش توقفى حياتك عليها ولا ينفع توقفى حياتك بسببها
انتى فى المكان اللى ربنا كاتبلك تكونى فيه يعنى الخير ليكى
سواء بقى هتكتشفى انه الانسب ليكى زى نوال او هيبقى مجرد مرحلة وتخلصيها وتبدءى بداية جديدة زيى
هو انتى قصرتى فى مذاكرتك فى الثانوى
روضة :لا والله العظيم لا انا عملت اللى عليا وجبت اخر نفسى واخر طاقتى
كاميليا :يبقى خلاص تحمدى ربنا وتستنى عوضه عن تعبك اللى تعبتيه ده لانه اكيد هيعوضك
عارفة يا روضة انتى حتى لو كنتى قصرتى مش مهم قصرتى فى اللى فات وغلطتى صلحى غلطك بقى ومتقصريش فى اللى جاى بس انتى مقصرتيش ودى حاجة تخليكى تستنى عوض ربنا ليكى بضمير مستريح لانك عارفة انك عملتى اللى عليكى مش تكرهى كليتك من غير ما تدى نفسك فرصة تعرفيها يمكن تحبيها او تحبى ناس هتعرفيهم فيها
روضة :وان حاولت اتقبلها واتقبل وجودى فيها ولقيت انها مش مناسبة ليا
نوال :حاولى تانى ادى نفسك فرصة
كاميليا :ولو حاولتى تانى وتالت وفضلتى حاسة ان ده مش مكانك وحسيتى انك عايزة كلية تانية حولى منها
روضة :احول منها وابقى ضيعت سنة من عمرى
كاميليا :لا كملى فيها علشان بدل ما تبقى ضيعتى سنة من عمرك تبقى ضيعتى اربع سنين
روضة :وافرضى حولت وبرضه مرتاحتش ومحستش انه مكانى
كامليا :ساعتها تنتحرى بقى وخلاص او بلاها تعليم وتتجوزى وتخلفى عيلين تلاتة تربيهم
ايه يا روضة انتى كل افكارك سودا ليه كده
مانعة الافكار الحلوة اللى فيها امل تدخل مخك ليه
روضة :انا بفكر بصوت عالى بس وبفترض معاكم
نوال :ومينفعش تفترضى انك هتحبى كليتك او هتحبى ناس هتعرفيهم فيها او انك حتى لو حولتى منها هترتاحى
مريم :لازم تكون كل افكار سوداوية ومتشائمة كده
روضة :طيب اخر افتراض طيب افرضو حولت وندمت انى حولت
كاميليا :وهتندمى ليه ما انتى تفكرى كويس جدا
نوال :وتاخدى راى اهلك
مريم :وتستخيرى ربنا كمان وتدعيه يرشدك للخير ويختارلك
روضة :وابقى ضيعت سنة من عمرى فى انى بس بجرب
كاميليا :وفين المشكلة لما تضيعى سنة ولا اتنين ولا حتى تلاتة لو عن طريقهم هتعرفى انتى عايزة ايه او هتتغيرى للاحسن انتى مفكرة ان الدنيا سهلة لا الدنيا صعبة واللى مبيتعبش فيها مبيتعلمش فيها حاجة واللى مبيتعملش يبقى معاش عارفة انا ضيعت من عمرى تلت سنين ونص ومش ندمانة علشان بسبب التلت سنين ونص دول اتعلمت اهم درس فى حياتى
روضة :درس واحد علشان تتعلميه تمنه كان تلت سنين ونص من عمرك
كاميليا :ولو كانو خمس سنين حتى مش مهم فداه هو يستاهل
روضة :مين ده اللى يستاهل
كاميليا بابتسامة :على طبعا...ده بيرن قلبه حس انى بتكلم عنه..الو يا علوة
على :علوة فى واحدة تقول لخطيبها علوة اومال فين حبيبى وحياتى وعمرى والحاجات اللى الواحد بيسمع عنها بس مجربهاش دى يا كاميليا قوليهالى حتى لو بالكدب مثلى انك بتحبينى
كاميليا :على متصيعش انت عارف انى بحبك
على وهو بيضحك :عارف بس بحب انكشك علشان تقوليها هيجيلى جفاف عاطفى من قلة كلامك الحلو ليا اومال انا خاطبك ليه يا بنتى
كاميليا :ما انت خاطبنى مش شاقطنى يا على وبعدين انت زى القطط بتسمع وتنكر على فكرة
انا مش قيلالك وحشتنى من خمس ايام
على :لا كتر خيرك تاعبك معايا
كاميليا وهى بتضحك :سيد عيب متقولش كده احنا اهل
على :اقسم بالله انا ما مصبرنى عليكى غير ضحكتك الحلوة دى
كاميليا :لا يا حبيبى مش بس ضحكتى انت بتحبنى كلى على بعضى كده ومتقدرش تستغنى عنى
على :ده حقيقى المهم طمنينى وصلتى بيت صاحبتك بالسلامة
كاميليا :ايه القمر ده انت متصل تتطمن انى وصلت ما انا بعتلك على الواتس اول ما وصلت
على :عارف بس الصراحة حسيت انى عايز اسمع صوتك فقولت استعبط واتصل
كاميليا :استعبط براحتك يا بشمهندس طارق ميهمكش بس انا مضطرة اقفل علشان صحابى اول ما هنزل هكلمك
على :ماشى يا حبيبتى خلى بالك من نفسك
كاميليا :وانت كمان مع السلامة
على :سلام
نوال :هيييييح بقى على ايام الخطوبة الجميلة
مريم :بكرة مش هيكلمك غير علشان يقولك انا فى الطريق الغدا جهز ولا لسه
كاميليا :لا على حبيبى مش كده وهيفضل بيحبنى فى الخطوبة وبعد الجواز كمان
نوال :مفيش حاجة بتفضل على حالها يا كاميليا
كاميليا :عارفة ان اكيد شكل حياتنا هيختلف بعد الجواز وبعد ما نجيب ولاد بس برضه متاكدة ان على هيفضل بيحبنى وانا هفضل بحبه
على ده احلى حاجة فى حياتى احلى حاجة فى الدنيا كلها
روضة :هو شكله حلو اوى كده
كاميليا :اهو ده الدرس اللى دفعت تلت سنين ونص من عمرى تمن علشان اتعلمه
مريم :درس ايه ده يا كاميليا
كاميليا :ان الشكل الحلو مش مهم وان الروح الحلوة اهم مش مهم ان البنات تكون بتحسدك على الراجل اللى معاكى ويكونو بيتمنوه المهم ان انتى تكونى بتتمنيه ومش عايزة غيره المهم انك تبقى متأكده انه مهما شاف مش هيبقى عايز غيرك من الدنيا وقتها شكله سنه كليته مستواه المادى والاجتماعى كل الحاجات دى مش مهمة
روضة :بس انا الحاجات دى مهمة عندى
مريم :وانا كمان انا وافقت على مصطفى علشان لقيت فيه الحاجات دى
نوال :وانا كانت اهم حاجة عندى فى محمد هى اخلاقه وتدينه بس برضه الحاجات اللى بتتكلمى عنها دى مهمة عندى
كاميليا :عارفة وانا مبتكلمش عنكم انا بتكلم عن نفسى عن مقاييسى انا اللى اختلفت وافكارى اللى اتغيرت
روضة :هو انا ممكن اسالك الحاجات دى كلها اختلفت ازاى وليه
كاميليا :ممكن اه بصى يا ستى انا وانا فى اول سنة فى الجامعة اعجب بيا واحد كان فى كلية صيدلة كان اكبر منى بتلت سنين
كان شكلا حلو اوى وبنات كتير هتموت عليه ودكتور وكان بيهتم بلبسه وشكله اوى وكان بتاع بنات وبيعرف يقول كلام حلو من الاخر اى بنت تافهة وسطحية ومعندهاش بتلاتة جنيه عقل كانت هتشوف فيه فتى احلامها وانا وقتها كنت تافهة وسطحية ومعنديش بجنية ونص عقل مش حتى بتلاتة جنيه
فضل يحاول يقرب منى وانا قبلت وسيبته يقرب وكنت فرحانة بقى ما هو ساب كل بنات الجامعة واختارنى ارتبطنا وفضلنا سوا تلت سنين ونص
تلت سنين ونص ضيعتهم على واحد ميملاش عينه غير التراب وخاين
انانى ومبيفكرش غير فى نفسه
مغرور جدا وبيقلل ثقتى فى نفسى وبيتفه من اى انجاز بعمله
ورغم كل ده هو اللى سابنى مش انا اللى سيبته عارفة انا مسيبتوش ليه يا روضة
روضة :علشان كنتى بتحبيه ولسه شايفاه فتى احلامك
كاميليا :لا ما انا كنت كبرت وعقلت بقى وعرفت ان الى زيه مينفعوش فتيان احلام دول بيبقو كوابيس للبنت اللى تقع فى طريقهم ومبقتش احبه اللى عمله فيا خلانى ابطل احبه معرفتى بان كل كلمة حلوة بيقولهالى ده لما بيحن عليا ويقولها يعنى
قالها لبنات كتير قبلى وبنات بيعرفهم عليا وبنات لسه هيعرفهم وهيسمعهم نفس الكلام وهيشغلهم نفس الاسطوانة
روضة :ولما انتى عارفة كل ده مسيبتيهوش ليه لحد ما هو اللى سابك
كاميليا :علشان خوفت وصعب عليا كل السنين اللى قضتها معاه خوفت انهى حكايتى معاه خوفت ابدء مع حد تانى
بس لما سابنى وبعدها اتخطبت لعلى عرفت ان خوفى كان على الفاضى ومقاييسى زمان عن فتى الاحلام كانت غلط كلها
انتى خايفة من كليتك لانها مش هى الكلية اللى انتى كنتى عايزاها يمكن تكون هى الخير ليكى يمكن هى انسب ليكى من اختيارك لنفسك
متوقفيش حياتك لا على حد ولا على حاجة يا روضة خليكى قوية بنفسك وعلشان نفسك متناميش ومتهربيش واجهى وانتى واقفة على رجلك
روضة :بس انتى على اللى خلاكى تقفى على رجلك تانى
كاميليا :لا انا وقفت على رجلى لوحدى وعلشان كده قدرت ادى فرصة لعلى انه يكون فى حياتى بس اللى على عمله انه حبنى وخلانى ارجع احب نفسى وخلانى احبه وخلانى افهم ان الاهم من شكل اللى بتحبيه ومكانته هو انه يكون بيقدرك وبيحبك
نوال :انا اتاخرت ولازم امشى
كاميليا :وانا كمان
روضة بابتسامة :شكرا انكم جيتم واتكلمتم معايا كلامكم بجد فرق معايا
كاميليا :يعنى خلاص هتحبى كليتك
روضة وهى بتضحك :لا مش للدرجة دى بس يعنى هدى نفسى فرصة احبها او على الاقل اتقبلها مش هفضل هربانة منها ومن واقع انها بقت كليتى كده كتير
من الاخر قررت احاول
كاميليا وهى بتحضنها :هو ده عاش يا روضة بالتوفيق يا حبيبتى ربنا معاكى
نوال وهى بتحضنها :دوام الحال من المحال يا روضة ولو النهاردة مضايقة بكرة تفرحى
روضة :يا رب
مريم وهى بتحضن كاميليا :شكرا انكم جيتو واتكلمتو مع روضة علشانى
كاميليا :وهى اختك لوحدك ولا ايه
نوال وهى بتحضن مريم :بطلى هبل اختك يعنى اختنا
مريم بابتسامة :ربنا يباركلى فيكم وميحرمنيش منكم ابدا
كاميليا :اللهم امين
نوال :يا رب
مريم :نورتونى يا بنات طمنونى عليكم لما توصلو
كاميليا :ماشى مع السلامة
نوال :فى حفظ الله
البدايات الجديدة بتخوف
خصوصا لما نكون عاملين حسابنا على بدايات مختلفة عن البدايات اللى بدءناها فعلا
خصوصا لما تكون بدايات مختلفة عن احلامنا اللى حلمنا بيها واتمنناها ورتبنا حياتنا عليها
والنهايات برضه بتخوف
بنخاف نكون لوحدنا بنخاف نبدء من جديد بنخاف منلاقيش حد نبدء معاه من جديد
بس برغم كل الخوف ده لازم نقاوم خوفنا
لازم ننهى اللى مينفعش وميستاهلش نكمل فيه
ولازم نقاوم خوفنا ونبدء من جديد ونحاول من جديد فى بداية جديدة حتى لو خايفين لازم نبدء من جديد ومع الوقت خوفنا هيقل وهنطمن💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا خصوصا من زال اثره فلم يذره زائر ولم يذكره ذاكر
