مصعب :انتى مش فهمانى يا ابتهال مش حسا بيا ومش ممكن تحسى بيا لانك معندكيش قلب
ابتهال :اومال شايلة قلبى وحطا مكانه طبق كبدة بالسلطة كده برضه يا ميمو تقول لبيتو حبيبتك كده
مصعب :مش انتى اللى بتقوليلى مينفعش اقولها انى بحبها
ابتهال :ما هو مينفعش يا مصعب عايز تروح تقول للمدرسة بتاعتك انك بتحبها دى اكبر منك بست سبع سنين يا حبيبى
مصعب :مش مهم مدام بحبها يبقى لازم اقولها اخبى حبى ليه انا مش جبان
ابتهال :مش جبن بس مينفعش دى مجرد مشاعر مراهقة صدقنى تجاه مدرستك الجميلة اللطيفة اللى بتعامل الكل حلو مشاعر مراهقة وهتروح لحالها صدقنى ومينفعش تروح تقولها هتحطها وتحط نفسك فى موقف غريب بص يا حبيبى احنا نحولك من الفصل بحيث متبقاش هى بتدرسلك
مصعب :لا مش موافق واوعى تحكى لبابا او لماما هزعل منك طول العمر يا ابتهال
ابتهال :مش هقولهم انا من امتى وانا بطلع اسرارك لحد بس علشان خاطرى اسمع كلامى ومتقولهاش طيب
مصعب :حاضر مش هقول خلينى كاتم حبى فى قلبى كده لحد ما يجرالى حاجة
ابتهال :كلامك ورومانسيته لا تتناسب خالص مع كونك لسه ستاشر سنة
مصعب :انتى مستقلية بمشاعرى
ابتهال :لا والله انا بس شايفاها صح انما انت شايف ان ده حبك الحقيقى ولو مش هقدر اقنعك ان مشاعرك دى مش حقيقة على الاقل اسمع كلامى ومتتصرفش على اساسها متقولهاش يا مصعب ارجوك
مصعب :حاضر مش هقولها
ابتهال :وعد
مصعب :وعد
فى العربية
مصطفى :الواد مصعب ده بيفكرنى بواحد كان زميلى فى الجامعة بس هو بقى كان بيحب بنت اصغر منه بست سنين هو كان فى تانية جامعة وهى فى تانية اعدادى
ابتهال :ايه الهبل ده
مصطفى :مش هبل ست سنين فرق مش كبير اوى
ابتهال :الفكرة مش فى الست سنين
يبقو فرق مناسب لما تكون هى فى اولى جامعة وهو خلص من سنتين ولا لما تبقى فى رابعة جامعة يعنى تكون كبرت ونضجت
انما هو بيحب طفلة مجرد طفلة شكلها هيتغير وتكوينها وافكارها كمان بيحب فيها ايه شاف فيها ايه يحبه دى حتى لو قولنا راهقت عليه وحبته مع الوقت ممكن تكبر وتنضج ومتبقاش متقبلاه فى حياتها وتحس ان حبها ليه كان غلط ده بيشترى سمك فى مياه يا مصطفى
ست سنين فرق لما تكبر ماشى تمام انما ست سنين فرق وهى عيلة كده يبقى جنان مش حب دى طفلة بيحب طفلة
مصطفى :معاكى حق
ابتهال :وحصل ايه مع صاحبك ده بعد كده استناها تكبر واتجوزها
مصطفى :لا لما كبرت هو نفسه مبقاش يحبها مبقتش عجباه لا تصرفاتها ولا شخصيتها هى اتغيرت
ابتهال :متغيرتش هى كبرت قولتلك كان بيشترى سمك فى مياه حد عاقل يحب طفلة لما تكبر كل حاجة فيها هتتغير من اول شكلها لحد افكارها وشخصيتها
مصطفى :لا
اهو دلوقتى اتجوز وعنده عمرو
ابتهال :عقبالك يا صاصا لما تفرحنا بيك
مصطفى :يا بتاعة انتى مش كفاية مبتقوليش يا عمى وساكت كمان هتقوليلى صاصا دى مش ابن اختك انا احترمى نفسك
ابتهال وهى بتضحك :عمى مين والناس نايمين ده الفرق بنا تمن سنين ده انت تنفع اخويا الكبير ولا حتى خطيبى يا شيخ اجرى
مصطفى :هتخلصى امتى النهاردة محاضرات
ابتهال :لا متأخر روح انت وانا هرجع مواصلات اساسا مجيى معاك فى العربية كل يوم شابهنى
مصطفى :ومبتقوليش ليه انى عمك
ابتهال :هو انا بقول بس مش كلهم بيصدقو كمان فى ناس ميعرفونيش وبيحكمو من بعيد وخلاص
مصطفى :هما احرار فى روحهم يشيلو بقى ذنب ظنهم السوء المهم احنا عارفين اننا مبنعملش حاجة تغضب ربنا وانا اكيد مش هسيبك تروحى وتيجى الجامعة لوحدك لان الناس متعرفش انى عمك
ابتهال :حبيبى يا صاصا تسلملى يا رب
مصطفى وهو بيضحك :تصدقى بالله انا هوصى صحابى المعيدين اللى بيدوكى يشيلوكى المواد بتاعتهم علشان اربيكى وتبطلى صاصا دى
ابتهال وهى بتضحك :لما اللى منك يجرحك مستنى مين يفرحك دى اخرتها يا صاصا بدل ما تقولهم يدونى امتياز من غير ما احضر اصلا عموما شكرا يا عمومة
مصطفى وهو بيضحك :هى مش كانت شكرا يا امومة يا بت
ابتهال وهى بتضحك :لا ما انت عمى بقى المهم وصلنا انا هنزل اشوفك فى البيت
مصطفى :خلى بالك من نفسك يا بيتو
ابتهال وهى بطلعله لسانها :وانت كمان يا صاصا
مصطفى وهو بيضحك :تصدقى بالله انتى عيلة باردة وتلمة غورى من عربيتى انا غلطان انى بوصلك
