انا تعبت والله العظيم تعبت انا عايشة ليه بقالي اربع شهور كل يوم بسال نفسي السؤال ده ومش لاقية اجابة انا عايزة اموت انا مستنية ايه ولا مستنية مين خلاص مبقاليش حد
وقفت ابص للعربيات وقررت انا خلاص مش عايزة اعيش اكتر من كده مش عايزة اتعذب اكتر من كده كفاية
عديت ووقفت قدام عربية السواق حاول يفرمل بس ملحقش
في المستشفي
فقت لقيت بنت صغيرة حضنانى وبتملس علي شعرى
فريدة :انا فين وانتى مين
ملك :احنا في المستشفى وانا ملك
فريدة :وبتعملي ايه يا ملك حضنانى كده ليه
ملك :بابي لما بعيط بيحضنى وبيلعب في شعرى علشان ابطل عياط وانتى كنتى نايمة وبتعيطي قلت اعملك زي ما بابي بيعملي علشان متعيطيش هو انتي بتعيطى ليه
فريدة :علشان ...ااه علشان...
الباب بيخبط
فريدة :اتفضل
حمزة : حمدلله علي سلامتك اولا ولو ان واضح ان متهمكيش سلامتك ثانيا حضرتك مش خايفة ومش فارق معاكى انتى حرة انما انا ذنبي ايه يعملو معايا تحقيق لانك سيادتك رميتى نفسك قدام عربيتي
فريدة :انا مرمتش نفسي قدام عربيتك انت خبطتنى
حمزة :حضرتك عديتى الطريق فجاة ومبصتيش علي العرييات اللي جاية وانا ملحقتش اوقف من غير مخبطك يدوب فرملت فخبطك خبطة مش جامدة الدكتور قال ايدك هتفضل اسبوعين في الجبس بس وشوية كدمات مش اكتر لو ملحقتش افرمل كان زمانك ميتة وكان زمانى متهم بسببك وبسبب اهمالك
فريدة :ومحصلش حاجة انا هقول لاي حد يسالنى ان انا اللي عديت فجأة وانك ملكش ذنب تمام كده
حمزة :تمام وحساب المستشفي انا دفعته الدكتور قال يومين وتقدرى تروحى لانك ضعيفة وواضح انك مبتهتميش باكلك
فريدة :انت دفعت الحساب ليه ده كان غلطى انا وانت لسه قايل كده بنفسك يبقى بتدفع الحساب ليه
حمزة :علشان انا اللي خبطك وانا اللي جبتك هنا وانا الراجل ولا انتى مش واخدة بالك ولا ايه عموما انا همشي دلوقتي وبكرة هنيجي نطمن عليكى يلا يا ملك
ملك :حاضر يا بابي اشوفك بكرة يا طنط هو انتى اسمك ايه
فريدة :اسمى فريدة يا حبيبتي
ملك :ماشي اشوفك بكرة يا طنط فريدة
ومشيو وفضلت لوحدى
فريدة :يا رب انا تعبت هفضل بتعذب كده لحد امتي بس
تانى يوم لقيت ملك جايبالي معاها ورد
ملك :اتفضلى يا طنط فريدة ده ليكى
فريدة :ميرسي يا حبيبتي انتى جيتي لوحدك ازاي
ملك :لا بابي جه معايا بس هو قالي هيعمل تليفون مهم ويجي وصلنى لحد الاوضة وواقف بره يتكلم في الموبايل
فريدة :تمام الورد حلو اوى يا ملك
ملك :طنط هو انا ممكن اطلب منك طلب
فريدة :اطلبي يا حبيبتي
ملك :ممكن تعمليلي ضفيرة اصلي طلبتها من بابى بس هو مبيعرفش يعملها بتطلع شكلها وحش اوى
فريدة :حاضر يا حبيبتي تعالي بس جنبي عالسرير
ايه رايك حلوة
ملك :حلوة اوى شبه الضفيرة بتاعت جودى صاحبتي
شكرا يا طنط وباست فريدة من خدها
فريدة :العفو يا قلب طنط
الباب خبط فريدة :ادخل
حمزة:اخبارك النهاردة ايه
فريدة:تمام
ملك :شوف يا بابى طنط فريدة عملتلي الضفيرة اللي انت معرفتش تعملهالي شكلي حلو صح
حمزة :حلو اوى يا حبيبة بابي
معلش تعبناكى معانا
فريدة :مفيش تعب ولا حاجة ملك عسل خالص ربنا يخليهالك
حمزة :تسلمى يلا يا ملك نسيب طنط ترتاح
ملك :بابي خلينا شوية كمان
حمزة :يا حبيبتي مينفعش علشان طنط ترتاح
ملك :هى مرتاحة ومش عايزانا نمشي صح يا طنط
فريدة :اااااه... صح يا حبيبة طنط
حمزة :انا اسف ملك مبتاخدش علي الناس بسهولة مش عارف مالها النهاردة هي مش كده في العادى
فريدة :مفيش مشكلة وجودكم احسن ما اقعد لوحدى
بس انا كنت عايزة اسال حضرتك سؤال هي مامت ملك فين من كلامها فهمت ان مامتها مش موجودة
حمزة :
فريدة :لو سؤالي ضايقك اعتبرنى مسألتوش
حمزة :مامت ملك ماتت وهي بتولدها قلبها كان ضعيف ومكنش حمل حمل وولادة بس هي اصرت انها تحتفظ بملك ومرضيتش تنزلها
فريدة :الله يرحمها واضح انها كانت انسانة جميلة وعظيمة
حمزة بدموع محبوسة في عينيه :جدا وطيبة ومكنش في في حنيتها عارفة ليلي دى مكنتش مراتي وبس لا دى كانت حب عمرى كله وانا والله مكنتش عايز غيرها بس هي قالتلي ان حياتها مش هيبقالها معني لو سابتنا نقتل بنتها ومدافعتش عن حقها في الحياة قالتلي لو بنتي ماتت هموت وانا عايشة انما لو بنتي عاشت انا كمان هبقي عايشة حتي لو مت
واديها ماتت وسابتلي ملك اعيش علشانها لولا ملك كان زمان حياتى وقفت حياتى من غير ليلي مش حياة بس الحمد لله ربنا عوضني بملك نسخة من ليلي في كل حاجة
فريدة :ربنا يخليهالك وميحرمكش منها ولا يحرمها منك
حمزة :انا عايز اسالك سؤال ده بعد اذنك طبعا
فريدة :اتفضل
حمزة :انتي ليه عملتي كده انا حاسس انك كنتي قاصدة مش بس مكنتيش واخدة بالك لا متعمدة تقفي قدام العربية
فريدة :ليه عملت كده لانى خسرت كل حاجة من اربع شهور انا وجوزى وابني عمر كان عنده اربع سنين عملنا حادثة وهما ماتو وانا عشت سابونى لوحدى من غيرهم مفيش سبب اعيش علشانه يبقي اعيش ليه انا حياتى ملهاش قيمة انا لوحدى وبكت كتير انا لوحدى وتعبت من غيرهم عمر وحشني
وحشتنى كلمة مامى منه وبكت اكتر
ملك :خلاص يا طنط متعيطيش انا هقولك يا مامى انا كمان معنديش حد اقوله يا مامى وهي بتمسح دموع فريدة
فريدة حضنتها :انا تعبت انا عشت ليه ممتش معاهم ليه معاشوش هما معايا ليه
حمزة :متقوليش كده ده اعتراض علي قضاء ربنا
ربنا يرحمهم ويصبرك ويربط علي قلبك
صدقينى مع الوقت هتبقي احسن انا كنت زيك ووقفت تانى علي رجلي علشان ملك كانت محتاجانى
فريدة :انا مفيش حد محتاجني مفيش حد اقف علي رجلى علشانه انا لوحدى فاهم يعنى ايه لوحدى
حمزة :العمر لسه قدامك
فريدة :وايه فايدة العمر وانا معنديش حد اعيشه علشانه
حمزة :كل حاجة بتحصل لسبب واكيد ربنا نجاكى لسبب لحكمة هتعرفيها بعدين وتحمدى ربنا
فريدة :ملك نامت
حمزة :طيب انا هسييك ترتاحى وشال ملك ومشي
تانى يوم
الباب بيخبط فريدة: اتفضل
حمزة :ملك اصرت تيجي تشوفك وانا قلت انتى النهاردة هتخرجي من المستشفي ناخدك نرجعك البيت بدل مترجعي لوحدك
فريدة :خير ما عملت انا مكنتش عايزة اروح لوحدى انا مش عايزة اروح علشان هرجع تانى لوحدى
ملك :ليه بس يا مامى انا مش هسيبك لوحدك
حمزة :ايه يا ملك ده انتى
فريدة قاطعته :سيبها تقولها انا فرحت لما قالتها مضايقتش
عند العمارة اللي فيها بيت فريدة
حمزة :حمد لله علي سلامتك خلى بالك من نفسك ومتحمليش علي ايدك لغاية متفكى الجبس
فريدة :الله يسلمك هتوحشينى يا ملك
ملك :انا هخلي بابى يجبنى عندك بكرة انا بقعد في البيت استناه ومش بعمل حاجة اجي اقعد معاكى يا مامى احسن
حمزة :ملك انا قلت ايه في الموضوع ده
فريدة :شكلك رفضت ليه بس خليها تيجى تقعد معايا تونسني انا ليل ونهار لوحدى
حمزة :بس
فريدة :مبسش ولا حاجة قبل متروح شغلك بكرة عديها عليا
هستناكي يا ملوكا
حمزة :خلاص زى ما تحبو بكرة الصبح هجبهالك
وفضلت ملك تجيلي كل يوم وحمزة بعد ما يخلص شغل يجى تحت البيت يرن عليا وانزلهاله بعد اسبوعين خرجنا روحنا النادى سوا
حمزة :انتي ليه مبتشتغليش يا فريدة
فريدة :مش حسا انى هقدر
حمزة :انا ممكن اجبلك شغل كويس
فريدة :ممكن قدام بس دلوقتي بجد مش هقدر
حمزة :كنت عايز اكلمك في حاجة واتمنى متضايقيش منى
فريدة :حاجة ايه
حمزة :ملك قالتلي انك بتعلميها تصلي انتى ازاي بتصلي وانتى بشعرك ومش لابسة الحجاب
فريدة :انا ... بصراحة فكرت كتير البسه بس فضلت مترددة ومخدتش قرار خصوصا انه مش فرض يعنى
حمزة :مين قال انه مش فرض
دورى في الموضوع ده بنفسك وانا مستعد اخدك لشيوخ تساليهم بنفسك
ودورت فعلا لقيت ان الحجاب فرض والميكب اللي كنت بحطه زمان لانى من ساعة اللي حصل محطتش مكياج حرام لقيت نفسي مقصرة في حاجات كتير وبعد بحث وتفكير لبست الحجاب
وبعد تلت شهور
حمزة :فريدة هو انتي فين اهلك
فريدة :اول مرة تسالنى عنهم
حمزة :هو انا .. بصراحة يعني ... من الاخر كده عايز اتقدملك اطلب ايدك من مين
فريدة :انا ماليش اهل او بمعني ادق انا اتخليت عن اهلي
حمزة :اتخليتي عنهم ازاي
فريدة :علشان احمد الله يرحمه
احمد كان جارنا بيحبني وبحبه من واحنا عيال كبرت وانا بحبه بعد ما خلصت جامعة اتقدملي بس بابا رفض
اتقدم تاني وبرضه بابا رفض بابا مكنش يعرف اللي بيني وبينه اتقدم مرة تالته وبرضه بابا رفض ولما سالته ليه بيرفض قالي ان احمد ميستاهلنيش وانه ميامنش عليا معاه ساعتها انا قلتله انى هتجوز احمد ومش هتجوز غيره ساعتها بابا لاول مرة في حياتى ضربني بالقلم فضلت في اوضتي يومين مبخرجش منها احمد بعدها اقنعنى نهرب ونتجوز وانا لانى كنت بحبه وسكينة الحب سرقانى وافقت وهربت من بيت اهلى واتجوزنا وسافرنا استراليا هو اهله سابو العمارة علشان مكانوش عارفين يحطو عنيهم في عين بابا وبعدها ماتو واحنا بره وانا اكتشفت ان بابا كان عنده حق
حمزة :حصل ايه
فريدة :احمد قبل كده كان بيتحكم فيا بحبه بعد جوازنا بقي مش بس حبه لا كمان بانى مليش غيره خيانة ومعاملة زى الزفت مكنش في حاجة حلوة في حياتى معاه غير عمر
حمزة :ومطلقتيش منه ليه
فريدة:علشان هو كان اختيارى انا اللي عملت في نفسي كده لما رخصت نفسي وكسرت كلمة بابا تقدر تقول كنت بعاقب نفسي ويمكن كنت اجبن من انى اعترف بانى خسرت اهلي علشان واحد ميستاهلش
حمزة :ومحاولتيش تتواصلي مع اهلك
فريدة :مقدرتش بعد اللي عملته مبقاليش عين اعمل كده
عارف انا بقالي خمس سنين ونص مشفتش ابويا وامى واخويا عمر وحشونى اوى والله
احنا رجعنا مصر قبل الحادثة بشهر وكل ما كنت افكر اروحلهم احس انه خلاص مبقاش حقي
حمزة :انتى غلطتي في الاول ودلوقتي بتستمرى في غلطك اهلك كانو هيسمحوكى يمكن في الاول يرفضو بس مع الوقت كانو هيسامحوكى لانهم اهلك انتى مش بس حرمتى نفسك منهم انتى كمان حرمتيهم منك ظلمتيهم مرتين مرة بهروبك ومرة لما مرجعتلهمش ارجعلهم يا فريدة بوسي ايديهم ورجليهم بس يسامحوكي كفاياكى هروب
فريدة :حاضر
في بيت اهل فريدة
الجرس بيرن عبدالرحمن بيفتح
عبدالرحمن بتفاجئ :فريدة
عينيه كان فيها شوق لبنته الوحيدة بس برضه افتكر اللي هي عملته مكنش عارف يعمل ايه يحضنها ولا يضربها قلم علي اللي عملته
فريدة ببكاء:بابا ومسكت ايده وانهارت علي الارض ابنى مات يا بابا مات وسابنى لوحدى عمر مات قبل ما اجيبه واجيلك يمكن يحنن قلبك عليا وتسامحني ابني يا بابااااااا
عبدالرحمن قعد جنبها وحضنها :قدر الله وما شاء فعل يبنتي ربنا يعوضك انتى لسه صغيرة والعمر لسه قدامك طويل
فريدة :بابا انا اسفة والله العظيم انا ندمت علي اللي عملته ودفعت تمن غلطي غالي غالي اوى يا بابا
وباست ايده سامحني يابابا وباست ايده تانى انا اسفة ورحمة ابنى انا اسفة سامحني يا بابا وخلي ماما وعمر اخويا يسامحوني انا بموت من غيركم والله
عبدالرحمن :اهدى يا حبيبتي انا مسامحك يا فريدة انتي بنتي مهما عملتي وضفرك عندى بالدنيا
فريدة حضنته وبكت اكتر :انا اسفة يا بابا انا اسفة
وجت والدتها وبكت فريدة في حضنها كتير وسامحتها والدتها قلب الام مبيعرفش غير انه يسامح
عمر اخوها كان زعلان منها ومش قادر يسامحها فريدة بالنسباله مكنتش مجرد اخته الكبيرة دى كانت قدوته في الحياة بس مع انهيارها ده وندمها سامحها خصوصا انها كانت فعلا وحشته وكان اكتر حاجة وجعاه ازاي قدرت تبعد عنهم كل ده عمر اصغر من فريدة بست سنين
بعد شهر حمزة اتقدم لفريدة ووالدها سال عليه ووافق وجه البيت وجاب ابوه بس لان والدته متوفيه واخته الوحيدة مهاجرة كندا وجه طلب ايد فريدة
في بيت اهل فريدة
فريدة :حمزة انا خلاص رجعت لاهلي ومبقتش لوحدى لو كنت اتقدمت قبل كده علشان مبقاش لوحدى ودلوقتي جيت علشان كلمتك اللي قلتها فانا بقولك انت مش مجبر تعمل كده
حمزة :انا عايز اتجوزك علشان انا اللي مبقاش لوحدى يا فريدة انا تعبت ست سنين وانا لوحدى تعبت من الوحدة
بنتي محتاجة ام وبتحبك وفرحت لما قلتلها انك هتعيشي معانا دايما
وانا محتاجلك يا فريدة محتاجك جنبي انا كنت فاكر ان قلبي مات مع ليلي ومفضلش مني غير ابن لابويا واب لبنتي
بس معاكى اكتشفت ان لسه في حمزة وانى لسا ليا نصيب في الحب وفي الحياة وان قلبي لسه قادر يحب ويشتاق الشهر اللي فات من غير ما اشوفك فيه ده رجعني عيل عنده عشرين سنة مش راجل ستة وتلاتين سنة بقيت عايزة اشوفك باي طريقة وكان ناقص اجي اقف تحت بلكونتك اصفر علشان تطلعيلي انا كنت اتعودت عالوحدة بس بعد ما دخلتي حياتى مبقتش متحملها ولا طايقها انا عايز اتجوزك علشانى انا وبنتي قبل ما يكون علشانك انا عارف انك مبقتيش محتاجانا وانك خلاص مبقتيش لوحدك
فريدة :مين قال انى مش محتاجاكم يا حمزة انا محتاجلكم ويمكن اكتر ما انتو محتاجني كمان محتاجة لملك بنتي اللي مخلفتهاش اول ايد تطبطب عليا وتمسح دموعى ومحتاجة للراجل اللي وقف جنبي ورجعني للحياة ورجعني لاهلي ولنفسي اللي مكنتش لقياها الراجل اللي برغم كل اللي عرفه عنى قاعد قدامى دلوقتي في بيت اهلي انا بس كنت خايفة تكون بتعمل كده شفقة منك
حمزة :شفقة ايه بس بقولك بحبك يا فريدة بحبك
فريدة :خلاص خلاص هتفضحنا بابا يقول ايه
حمزة :انتى مقلتيلوش انك تعرفيني
فريدة :لا عارف طبعا وعارف كل حاجة كمان انا خلاص مش هخبي علي اهلي اي حاجة تانى ابدا
حمزة بابتسامة :تمام يبقي خايفة ليه بقي
فريدة :مكسوفة مش خايفة كمان هو ميعرفش ان الموضوع قلب معاك كده
حمزة :وهو قلب معايا لوحدى
فريدة :قلب معانا يا سيدى ارتحت كده
حمزة :ارتحت جدا يلا انا هتفق مع عمى نكتب الكتاب كمان اسبوعين ولا اسبوع كفاية
فريدة :ايه ده هو سلق بيض
حمزة :فريدة احنا هتتخطب ونراهق انا ستة وتلاتية سنة وسيادتك واحد وتلاتين وكمان عارفين بعض هنضيع وقت ليه بس
فريدة :خلاص اقنعتني بس عالاقل تلت اربع شهور
حمزة :كتير جدا بصى اخرك معايا شهر ولو قلتى كلمة كمان هكتب عليكي واخدك في ايدى وانا ماشي انتى حرة
فريدة :خلاص حلو شهر اهو احسن من مفيش
واتجوزنا وبعد ست شهور عرفت انى حامل خلفت من حمزة عمر وعلي سارة ربنا كرمنا بيهم ورا بعض علي طول وبقي عندى بنتين وولدين لان ملك بالنسبالي البكرية
وبقيت كل يوم بحمد ربنا انه ادانى فرصة تانية اعيش
حمزة كان عنده حق انا عشت لسبب يمكن علشان اصلح غلطى الكبيرفي حق اهلي ويمكن علشان ملك يبقالها ام
ويمكن علشان اقرب من ربنا اكتر ويمكن علشان اتجوز حمزة ويمكن علشان كل الاسباب دى المهم انى الحمد لله عايشة
عايشة بجد وفي حياتى ناس محتاجالهم ومحتاجنى وعندى اسباب كتير تخلينى اتمسك بالحياة حياتى الحمد لله بقالها قيمة💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الأعلى هو وموتى المسلمين جميعا خصوصا من زال أثره فلم يزره زائر ولم يذكره ذاكر
