مروة :يا فريدة خليكى معانا يومين كمان
جيهان :ايوه علشان خاطرى علشان خاطرى يا فيرو
فريدة :يا جماعة المشكلة فى..
مروة قاطعتها :فى عمى هنكلمه نقنعه
فريدة :ماما..
جيهان قاطعتها :مرات عمى القمر هنتصل نتحايل عليها لحد ما توافق
فريدة :ايوه بس..
محمد :ما خلصنا بقى قالولك هيكلمو عمى ومرات عمى ايه هيتحايلو عليكى سنة علشان ترضى تقعدى معانا يومين كمان
فريدة :انت ازاى..اخوكم سابنى ومشى من غير ما اكمل تهزيقى ليه
جيهان وهى بتضحك :تكملى ايه بس هو انتى كنتى بدءتى من اصله
مروة وهى بتضحك :كمان تهزقى مين اصلا انتى عايزاه يقطعنا احنا وانتى ويعمل علينا فتة للغدا ايه يا فيرو العمر مش بعزقة
فريدة :تصدقو بالله انا هقعد يومين كمان مش علشان بس مبسوطة وانا معاكم وانتو ماسكين فيا ومش عايزنى امشى لا كمان علشان اخوكم بيضايق بوجودى فهقعد على قلبه
جيهان وهى بتضحك :تقعدى على قلبه تقعدى على الكنبة فى الصالة مش مهم المهم انك هتقعدى معانا يومين كمان
مروة :يلا بينا بقى نكلم عمى ومرات عمى نتحايل عليهم يسيبوكى معانا يومين كمان
فريدة :يلا بينا
بعد يومين
جيهان :المكان بيبقى احلى بالليل كمان هو احنا فراخ هنام المغرب
مروة :لازم حد فينا يقنع محمد نخرج بالليل
فريدة :وليه اخوكم يعنى مش عمى او مرات عمى
جيهان :ماما مش هتوافق مهما مين كلمها
مروة :فالامل فى بابا لو محمد وافق بابا هيوافق
فريدة :خلاص شوفو مين فيكم هيكلم اخوكم..انتو بتبصولى كده ليه..لا مش انا اللى هكلمه لا متفكروش فى الموضوع حتى
جيهان :يا فيرو انتى جاية هنا تقعدى معانا يومين تتفسحى فيهم وتغيرى جو اكيد هيعملك خاطر
فريدة :اخوكم ممكن يعملى عاهة مستديمة يعملنى شاورما ويكتر التومية انما يعملى خاطر لا مظنش
مروة :لا لو اتحايلتى عليه هيوافق
فريدة :مين تتحايل انا عايزانى اتحايل على اخوكم ابدا كرامتى فوق كل شئ
جيهان :فتحو هناك مطعم جديد انما ايه تحفة
مروة :اه ده الى فيه اماكن ورسومات على الحيطة تحفة سيرين ومنة كانو متصورين عندها
جيهان :اه هو..انتى يا فيرو كنتى عايزة تتصورى صور جديدة حلوة علشان تحدثى صورة الواتس باين
مروة :لا انسى فريدة كرامتها فوق كل شئ اكل ايه وصور ايه اللى هتفكر فيهم
فريدة :هو انا كرامتى فوق كل شئ طبعا..بس انتو بنات عمى وميخلصنيش تبقو عايزين تخرجو بالليل ومتخرجوش
مروة وهى بتضحك :طيبة وحنينة من يومك
جيهان وهى بتضحك :اصيلة وبنت ناس والله
روحى بسرعة بقى اقنعيه قبل ما يخرج مع اصحابه
فريدة :ماشى خليكو قريبين منى علشان لو فكر يتغابى عليا تلحقونى
جيهان :فى ضهرك
مروة :وراكى رجالة
فريدة :مممم..مم
محمد :هتمأمأى كده كتير
فريدة :ايه تمأمأى دى انت بتكلم معزة
محمد :مش انتى اللى واقفة تقولى مممم وخلاص
فريدة :لا هو احنا كنا
محمد :انتو مين
فريدة :انا وجيهان ومروة كنا عايزين نخرج
محمد :دلوقتى
فريدة :اه هما قالو المكان بيقى احلى بالليل كمان انا همشى بكرة ومن ساعة ما جيت مخرجناش غير بالنهار وقبل المغرب بنكون فى البيت فيعنى كنا..
محمد :انتى هتمشى بكرة
فريدة :اه انت مش موافق صح مش مشكلة تتعوض مرة تانية بقى
محمد :لا موافق قدامكم ربع ساعة تغيرو هدومكم وتنزلولى على ما اغير واسخن العربية
فريدة بصدمة :ايه ده هو انت هتيجى معانا
محمد :ايه عندك مانع
فريدة :هو يعنى
محمد :لو مش عاجبك بلاش
جيهان وهى بتدخل من باب الاوضة :لا ازاى عاجبها طبعا
مروة وهى بتدخل :اقل من ربع ساعة وهنبقى جاهزين يا محمد..احنا ما صدقنا وافق كنتى هتطيرى الخروجة حرام عليكى يا شيخة
فريدة :انا مالى مش عايزة اخرج مع اخوكم انا
كمان هو ده اللى احنا فى ضهرك وراكى رجالة وابص ورايا الاقينى لوحدى وموراييش غير الحيطة
جيهان وهى بتضحك :ما هو احنا كان قصدنا هنبقى ورا الحيطة اللى وراكى وبعدين ما احنا دخلنا فى الوقت المناسب قبل ما تخليه يرجع فى كلامه
فريدة :مش عايزة اخرج مع..
مروة :مش عايزة تخرجى مع محمد عارفين يا ستى انتى مش خارجة مع محمد احنا اللى خارجين معاه وانتى خارجة معانا احنا يلا بقى نلبس بسرعة عدى تلت دقايق من الربع ساعة
