عمار :شوفتى صحيت من النوم لقيتها بعتالى ايه
رودينا :انه مش هينفع النهاردة وهتشوف ظروفها وتخليها يوم تانى بعد كل رغيها امبارح ده
عمار :شفتى الهنا اللى انا فيه وده اسمه ايه بقى
ريهام :اسمه انها مركباك المرجيحة حضرتك ..اه سورى ادخلت فى حواركم من غير احم ولا دستور انا ريهام صاحبة رودينا
رودينا :ده عمار اخويا يا ريهام
ريهام :اه انا عارفاه
عمار :وانتى تعرفينى منين بقى
ريهام :رودينا بتحكى كتير عنك فتوقعت انك عمار يعنى من غير اخوها هيدخل اوضتها كده الا لو كنت اخوها يعنى
كمان انا بقرالك
عمار :بتقرى اللى بنزله على صفحتى
ريهام :اينعم عاملالك سى فرست اصلا وبشارك اغلب اللى بتنزله انا من متابعينك مبيفوتنيش حرف انت بتكتبه
عمار :طب انا اتكلمت امبارح عن ايه
ريهام :عن ان مفيش حد بيحارب علشان حاجة بيكرهها
بمعني انك علشان تحارب علشان حاجة لازم تكون بتحبها فتتعب علشانها وتقاوم كل حاجة بجد علشان توصلها تحارب ظروفك واللي حواليك وحتي نفسك
انما اللي بيحارب علشان حاجة مبيحبهاش بيخسر من اول جولة ومن غير ميتعب اصلا بيستسلم علي طول
قبل متحارب علشان علاقتك بربنا او اهلك او حتي واحد صاحبك تبقي احلي واحسن حبهم بجد واكره بعدك عنهم
علشان تحارب اهمالك في الدراسة او في شغلك
اكره اهمالك وحب نفسك حب فكرة انك تبقي شخص ناجح علشان تكسب حربك
غير كده هتخسر مع اول عقبة هتقابلك هتستسلم وتخسر بمتتهي السهولة
وفى الاخر طبعا كاتب
#خواطر_الساعة_اتناشر
شفت بقي انى متابعة
عمار بانبهار :متابعة ايه ده انتى حافظة كلامى بالحرف
ريهام :ملكة الحفظ عندى عالية بحفظ بسرعة اي حاجة بقراها خصوصا لما اقراها بتركيز
عمار :طيب الخاطرة اللى نزلتها من تلت ايام كانت بتقول ايه
ريهام :كانت بتقول
متبقاش مفعول بيه في حياتك
دي حياتك
حياتك انت
مفكر هتعيشها كام مرة
عيشها زي ما انت عايز بافكارك وتجاربك ومميزاتك وعيوبك
ونجاحاتك وغلطاتك
متبقاش كومبارس في قصة انت المفروض بطلها
وطبعا فى الاخر كاتب
#خواطر_الساعة_اتناشر
رودينا :متحاولش تتحداها يا عمار هتبقي حفظاهم اكتر منك انت شخصيا مدام قريتهم ولو حتى مرة واحدة
عمار :الخاطرة دى كانت صغيرة ومش طويلة وسهل تفتكرها
انا مش هقولك نزلتها امتى بس هقولك كنت بتكلم فيها عن ايه ونشوف هتبقي حافظاها ولا لأ
ريهام :وانا قبلت التحدى
عمار :كنت كاتب خاطرة بتكلم فيها عن اننا قبل منقرب من الحاجة بنبقي شايفين ضلها بس
ريهام :
رودينا :طب سهلها شوية
عمار :لا وشكلها هتخسر اهيه
ريهام :انا كنت بفتكرها بس وخلاص افتكرتها
كنت بتقول فيها
قبل ما نقرب من الحاجة ونعرفها بجد
بنبقي عاملين زي اللي شايف ضل الحاجة
وضل الحاجة دايما كبير مع ان الحاجة ممكن تكون صغيرة جدااااااا الا ان ضلها بيكون كبير
علشان كده قرب من الحاجة او الشخص وشوفهم صح
مش يمكن يطلعو ميستاهلوش الخوف منهم او الانبهار بيهم او ميستاهلوش اننا نكرههم
قرب علشان تشوفهم وتعرفهم صح
رودينا وهى بتضحك :وطبعا فى الاخر كاتب
#خواطر_الساعة_اتناشر
انا مش حافظة غيرها
ريهام :ها كسبت التحدى
عمار :كسبتيه طبعا انتى جبارة دماغك دى ولا كمبيوتر ايه يا بنتى ده ربنا يحفظك بجد
ريهام :شكرا
عمار :كان قصدك ايه بانها مركبانى المرجيحة
ريهام بحرج :اسفة علي التعبير بس انا قصدى انها مش مرسياك على بر يوم تطلعك فوق ويوم تنزلك تحت مش ثابتة على رأى ولا على حال
عمار :لا حلو التعبير بتاعك ومعبر فعلا انا كده راكب المرجيحة طب ودى يتعمل معاها ايه من وجهة نظرك
ريهام :هى لازماك اوى يعنى ويهمك امرها
رودينا :لا هى مش..
عمار قاطعها :اه لازمانى ويهمنى امرها
ريهام :يبقي تسقعلها تتقل عليها لما تقولك مش هينفع نتقابل النهاردة علشان انشغلت فجأة انت بمنتهى البرود اللى فى الدنيا تقولها انها مش محتاجة تتأسف وانك اصلا كنت عايز تخرج مع اصحابك وتخرج فعلا ولما ترجع ابعتلها صور من الخروجة
عمار :وبعدين
ريهام :ولا قبلين هتشوف النتيجة وتدعيلي هتلاقيها هى اللى عايزة تقابلك وبتجرى وراك بالمشوار بس انت نفضلها
عمار :كل البنات كده
ريهام :انت هتضايقنى ليه وانا بحترم كلامك وبقتنع بيه
لا طبعا مش كل البنات كده ولا حاجة
بس فعلا فى بنات كده تجرى وراها تسيبك تسيبها تجرى وراك تحسهم مرضى نفسيين مبيعرفوش ياخدو قرار وكل يوم بحال بس مش بس فى بنات كده في كمان رجالة كده
ودول بيبقو اسوء لان الراجل المفروض تكون كلمته واحدة مبيرجعش فيها مهما حصل كلمة الراجل وعد بابا دايما بيقول كده..بابا..ينهار ابيض ده انا نسيت ده كلمنى يقولى ارجع البيت علشان خالتى وولادها جم عندنا وسألو عليا
رودينا :انتى مش قولتى هتقضى معايا اليوم
ريهام :هعوضهالك مرة تانية
رودينا :لا مرة تانية ايه انتى تجيلى بكرة
ريهام :خلاص هحاول
رودينا :لا هتيجى مش هتحاولى
ريهام :هتحايل على بابا وهو هيوافق سبينى امشى بقا اتاخرت
رودينا :خلاص ماشي خلى بالك من نفسك
ريهام :هكلمك بالليل..فرصة سعيدة انى قابلتك واتكلمت معاك
يا عمار بعد اذنكم
عمار :انا اسعد
