هلومك واخانقك لما تجيلي
واقطمك واطلع عينيك
واقولك انى مش عايزة اشوفك
وانى ولا كنت هسال فيك
والحقيقة انك لو اتاخرت ساعة
كنت انا اللي هجرى عليك
رخامتى دي بستخبي وراها
وادارى حبى وشوقى ليك
قفلت كشكولها واتنهدت في نفس اللحظة اللي تليفونها فيها رن
اية :ايه يا اخرة صبرى اخبارك ايه
اسر :انا تمام الحمد لله انتي اخبارك ايه
اية :انا تمام
اسر :معلش مكلمتكيش امبارح رجعت من الشغل نمت زي الحمار
اية :وليه زى الحمار ايه لزمتها زى
اسر :اية لمى نفسك
اية :خلاص حقك عليا يا اسور
اسر :انتي كده بتراضيني يعني قلت مليون مرة متقوليليش اسور دى بتنرفزنى مش ابن اختك انا
اية :ما عاش ولا كان اللي يقول كده ده انت بشمهندس اسر علي سن ورمح ولا تزعل نفسك
اسر :تقبلناه
اية :متتغرش بس وتخليني اسحب كلامي
اسر :لا خلاص انا هقفل بقي خلي بالك من نفسك
اية :تمام وانت كمان مع السلامة
رجعت اية لكشكولها اسر ابن خالتي اكبر منى بسنتين اعز اصحابي من واحنا صغيرين ناقر ونقير بس في الاخر ملناش غير بعض وكبرنا علي كده اسر اعز اصحابي او كان اعز اصحابي وبس لحد من سنة معرفش ازاي وليه بس فجاة لقتني بحبه بيوحشني اوى عايزه اكلمه دايما وبغير واشم ريحة شياط لو شفته بيتكلم مع بنت تانية اول ما اكتشفت اني بحبه زودت رخامتي عليه طبعا علي راسي بطحا وخايفة اتكشف مش علي راسي لا علي قلبي بطحا وخايفة يعرف وجاسر عمره محس بيا مش عارفة هو انا اللي عارفة اخبي اوى كده ولا هو اللي شايل قلبه وحاطط مكانه طبق كبده بالسلطة انا بحبه هو يستاهل اني احبه بس ليه هو مبيحبنيش ليه مش حاسس بيا وليه مش شايف انى استاهل حبه انا بحبه ومش عارفة اعمل ايه يا رب ارحمني وريح قلبي
بعد يومين في بيت اية
صفية :اية تعالي عايزاكي في موضوع
اية :ايوه يا ماما عارفاها انا الداخلة دى عريس صح
صفية :ايوه عريس واستنى اعرفي مين قبل مترفضى كالعادة
اية :ايه ده هو انا اعرفه
صفية :اه اسر ابن خالتك
اية :قلتي مين
صفية :اسر ابن خالتك
اية :اسر ازاي يعني
صفية :هو ايه اللي اسر ازاي كلم ابوكى وطلب ميعاد يجيب خالتك وجوزها يجو فيه وابوكي اتفق معاهم علي بكرة
اية جريت علي موبايلها اتصلت باسر
اسر :ايوه يا اية اخبارك ايه
اية :والله الاخبار كلها عندك
اسر :خالتي قالتلك صح
اية :صح مقولتليش انت ليه بقي وكمان ازاي يعني اللي قالته ده
اسر :طيب خلينا نكلم بكرة وش لوش احسن ماشى
اية :ماشي سلام
فضلت اية تعد الساعات لحد ما جه ميعاد اسر
وصلو وسلمو علي بعض طلب اسر يكلم اية علي انفراد اهلها وافقو وطلعو البلكونة
اسر :حلو الازرق عليكي
اية :شكرا قلي بقي ايه اللي بيحصل ده بالظبط
اسر :ايه بطلب ايدك
اية :ايوه ليه بتطلب ايدى ليه وفجاة كده
اسر :هو الواحد بيتقدم لواحدة ليه
اية :اسباب كتير بس انا عايزة اعرف اسبابك
اسر :علشان بحبك
اية اتصدمت وبعدين قالتله :بتحبني كبنت خالتك واعز اصحابك بس ده ميخلكش تتقدملي يا اسر
اسر :لا مش كبنت خالتى واعز اصحابي انا بطلت اشوفك كده وبس من زمان
اية :وليه مقولتليش
اسر :علشان مدتنيش فرصة طول عمر تعاملك معايا علي اساس انى ابن خالتك واعز اصحابك وبس وكل مادا تعاملك بينشف معايا اكتر من الاول
اية :وليه دلوقتي
اسر :علشان تعبت اخبي وتعبت استني
انا بقالي كتير مستني منك اشارة واحدة بس انك مش شايفاني ابن خالتك وبس بس عمره محصل فقررت اخد فرصتي بايدى واخليكي تشوفيني اكتر من مجرد ابن خالتك وبس انا كمان خايف تضيعي منى انتي بترفضى اللي بيتقدمو طب افرضي حد اتقدم ووافقتي اعمل ايه انا ساعتها
انا بحبك يا اية ومن زمان عمرك مفكرتي انا ليه مبتكلمش مع اي بنت في العيلة نص مبكلمك ده انا معيش رقم تليفونهم حتي ليه عمرى مجيت قلتلك اني حبيت ليه موافقتش علي عروسة من المية وخمسين عروسة اللي خالتك جابتهملي
انا مش عايز منك غير فرصة بس يا اية اديني فرصة وادى نفسك معايا فرصة
اية :مش محتاجها اصلا
اسر :يعني ايه
اية: تعالي نخرجلهم اتاخرنا عليهم
خرجو وطلب اسر ايد اية واستجمع شجاعته وطلب يكون كتب كتاب مش خطوبة هما متربين سوا ومش محتاجين لسه فترة يتعرفو علي بعض
مكنش هيطمن غير بكتب الكتاب
وفجأته ايه ووافقت بسهولة
نزلو جابو الشبكة وكتبو الكتاب ولبسها الشبكة في حفلة صغيرة حضرها اهلهم واصحابهم القريبين بس وقبل ما يمشي ادتله اية كشكول وقلتله اقراه لما تروح
تليفون اية بيرن
اسر :طبق كبدة بالسلطة مكان قلبي يا ظالمة يا مفترية طبعا ما هو اللي ميعرفش يقول عدس
اية ضحكت جامد
اسر :كمان مش عارفة ازاي حبتيني فجاة انا بقالي سنين بدعي ربنا يقربك ليا ويزرع حبي في قلبك ويجعلنا خير لبعض سنين بدعي والحمد لله استجاب
كمان بترخمي علشان تدارى البطحا اللي قلبك ليه كان مين قالك تداريها
كان زمانى قلتلك وارتحت من الخوف والانتظار اعمل فيكي ايه بس
اية :اسر هو انا عمرى قلتلك اني بحبك
اسر .: لا ولا حتي كصحاب
اية: طب انا بحبك انا بحبك اوي كأعز اصحابي وككل حاجة ليا في الدنيا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
