على الماسينجر
منى :رجعت من بره نمت من غير ما اتغدا
وصحيت الساعة واحدة بالليل هموت من الجوع
لقيت الغدا النهاردة كان مكرونة بالبشاميل وفاضل اقل من نص صينية سخنته وكلته
اتمنى ماما متكونش عاملة حسابها ان ده غدا بكرة ولا حاجة
رحمة :كلتى نص صينية مكرونة بالبشاميل بعد الساعة واحدة بالليل
انتى يا بت مش قولتيلى انك هتبدئى ريجيم😂
منى :الكلام ده كان الأسبوع اللى فات كنت مليانة حماس وشغف
رحمة :وراح فين شغفك وحماسك
منى :انطفو بعيد عنك
رحمة :ليه حصل ايه
منى :فاكرة الشاب اللى معايا فى الكورس اللى كنت بحكيلك عنه
رحمة :فاكراه طبعا ده انتى فالقانى بسيرته بقالك شهر
وانتى مبتقوليلوش صباح الخير حتى لما بتشوفيه
منى :قولتله النهاردة ويا ريتنى ما قولتله
رحمة :ليه حصل ايه
منى :طلع بيشوى
رحمة :عنده محل مشويات يعنى طيب كويس انتى بتحبى السمك المشوى والفراخ المشوية
منى :سمك ايه وفراخ ايه اللى بحبهم
طلع اسمه بيشوى يا رحمة
رحمة :ده بجد😳
منى :اومال يعنى بهزر
انا برضه غلطانة مينفعش اكراش على واحد من غير ما اعرف اسمه💔😭
رحمة :خلاص متزعليش نفسك كراش راح يجى غيره
بس بعد كده احتياطى ابقى اعرفى اسمه قبل ما تكراشى عليه
منى :لا خلاص بطلناها الشغلانة دى
لحد امتى هكراش انا امتى بقى يجى اللى يكراش هو عليا
انا من هنا ورايح مش هكراش على حد مش هكون فعل
هبقى تقيلة وكاريزما وهستنا اللى يكراش هو عليا ويبقى الفعل وابقى انا رد فعل
من النهاردة هبقى منى جديدة خالص
رحمة :سترونج اندبندنت ومان على حق
بس كده الفيمنيست هيزعلو منك
ازاى تقولى مش عايزة اكون فعل وعايزة ابقى رد فعلا
ايه يا منى هو مش المرأة تستطيع ولا ايه😂
منى :المرأة فرهدت خلاص ومبقتش قادرة تستحمل
احنا هنعاند الطبيعة ولا ايه
ربنا خلقنا كده الراجل لازم هو اللى ياخد الفعل الأول فى موضوع الحب ده
واى محاولة للبنت انها تغير ده مش هتطلع منها غير بأن كرامتها تنجرح لو كان الشاب محترم يعنى ووضحلها انه مش هينفع
او ان كرامتها وحاجات تانية تنجرح لو كان واطى وقالها انا عينيا ليكى يا ست البنات وحتى لو مرتبط ايه يعنى معقول اقول للنعمة لا
وساعتها تتعرض المرأة التى تستطيع للإستغلال هينفعوها بإيه الفيمنيست ان شاء الله
هيمسحو دموعها ولا هيصلحو اللى اتكسر جواها
بلا فيمنيست بلا قرف بقى يا شيخة
رحمة :بس مش كل كلام الفيمنيست غلط يا منى
فى حاجات من كلامهم صح
منى :ما هو علشان ده مش كلامهم اصلا
ده كلام ربنا دى حقوقنا فى دينا دى الحقوق اللى ربنا كرمنا بيها
المشكلة ان الرجالة بعيد عنك استقوت علينا وبقت واكلة حقوقنا
فطلع شوية ستات يطالبو باللى ربنا ودينا مديهولنا اصلا وفاكرين انهم جابو الديب من ديلة
وساقو فيها وبقو بيطالبو بحاجات لا هى حقنا ولا حتى هنفرح ونرتاح لما تحصلنا بالعكس
احنا هنبقى بنطالب بتعبنا وحزننا بنفسنا بمنتهى الغباء
خيبة عليهم وعلى الرجالة وعلى بيشوى
رحمة :وبيشوى ماله بس😂
منى :هو كده😂😂
المهم انى خلاص من هنا ورايح مش هكراش على حد تانى
لو جيت قولتلك انى بكراش على حد عايزاكى تهزقينى وتمرمطى بكرامتى الأرض
رحمة :من عينيا انتى تؤمرى يا غالية😂😂
