سلمى :حمدلله عالسلامة
سارة :الله يسلمك يومى النهاردة في الشغل كان متعب اوى
سلمى :ربنا يقويكي يا حبببتى
سارة :امين تعالي ناكل انا جعانة اوى
سلمى :وانا كمان هموت من الجوع مكلتش حاجة من الصبح
سارة :ليه هو انتي من ساعة ما مشيت وسبتك علشان اروح الشغل وانتى قاعدة القعدة دى علي موبايلك
سلمى :اه كنت بقرء رواية خلصتها بدءت في غيرها ومحستش بنفسي
سارة :سلمى حبيبتي مينفعش كده انتى في اجازة اه ومعندكيش مزاكرة
وحقك يا ستى تقرى زى ما انتى عايزة بس مينفعش يبقي يومك قراية روايات بس ربنا هيسئلك يا حبيبتي عن وقتك ده
سلمى :حياتهم حلوة اوى يا سارة نفسي اعيش قصة حب زيهم
سارة :اه البطلة الجميلة الطيبة المظلومة في الدنيا اللي مفيهاش غلطة تحب البطل الوسيم الغني صاحب الجسم الرياضي القاسي وتلطشه قلم في الاول يقرر انه يتجوزها علشان ينتقم منها راجل بحق وحقيقي الصراحة ويحبها وتحبه ويعيشو في سعادة للابد
سلمى :ايوه بالظبط قصة حبي المثالية
سارة :انتي جميلة ومظلمومة في الدنيا ومفكيش غلطة تعرفي حد غني ووسيم وصاحب جسد رياضي طيب
انتي بجد مفكرة ان مشاكلك في الحياة هتتلخص في حبيب قاسي تحننى قلبه سعادتك ويحبك وتعيشي في سعادة وبس كده
سلمى :اطيب اقرء روايات ذات طابع دينى بقي واستنى فارس الاحلام الملتزم اللي هيبقي رزقي و ربنا هيكافئنى بيه علي التزامى
سارة :لا برضه غلط انتي تلتزمى علشان ربنا يرضي عنك ويحبك ويقبلك مش علشان فارس احلام ملتزم لا علشان نفسك
كمان رزق ربنا واسع واشكاله كتير
ليه بتختصريه انتي في حبيب رومانسي او فارس احلام ملتزم
ماما وبابا وانا فى حياتك رزق
تفوقك في دراستك رزق
زوج يتقي ربنا فيكى رزق
اولاد صالحين بارين بيكى وبوالدهم رزق
رضا ربنا عليكي وحبه وستره ليكى اجمل رزق
سلمى يا حبيبتي دينك تعرفيه من القرءان والسنة مش من رواية
واخلاقك تكونيها انتي بقلبك وعقلك وضميرك مش من رواية
ردود افعالك وتصرفاتك تبقي نتيجة دينك و اخلاقك مش تقليد لبطلة رواية اتحطت في نفس الموقف فتعملي زيها
احلامك تبقي بتاعتك انتي مش قريتيها في رواية متخليش حد يحلملك
انتي شبه نفسك ومش شبه حد واللي ربنا هيرزقك بيه ويجعله نصيبك برضه شبه نفسه ومش شبه حد وقصة حبك المثالية ربنا كاتبهالك وهتبقي بتاعتك انتى وبس مش شبه رواية قريتيها
كمان اللي هيرتبط بيكى ملوش ذنب يرتبط بواحدة بتعرف احلامها من الروايات وبعيدة عن الواقع ومستنيه منه يحققلها احلامها الوردية دى
مبادئك واخلاقك تكونيها بنفسك شخصيتك محدش يحددهالك احلامك محدش يرسمهالك اقرى زى ما انتى عايزة بس خدى من الرواية اللي يناسب دينك واخلاقك واسلوب الحياة اللي انتي عايشاها
مش كل حاجة في الروايات صح
في ناس بتكتب اللي بيجي في خيالها مهما كان
وناس بتكتب اللي المفروض الشخصية تعمله مش لانه صح بس هي المفروض تعمل كده انتي بقي تشغلي مخك وانتي بتقرى وتاخدى من الرواية اللي يناسبك ويناسب دينك مش تاخدى كل حاجة عميانى كده
متندمجيش في الروايات وتنسي ان في حياتك ناس من لحم ودم ليهم حقوق عليكي ومتخليش الروايات كل حياتك لدرجة انك تنسي الواقع ومتبقيش قادرة تتعاملي معاه فاهمانى يا سلمى
سلمى :فاهماكي يا سارة
قصدك انى اخد من الرواية العبرة بس واللي يناسب ديني واخلاقي واسلوب حياتى ومحاولش ابقي شبه بطلات الروايات وانسي نفسي ومخليش حد يحلملي او يحدد شخصيتي واعمل توازن بين الخيال اللي بقراه والواقع اللي بعيشه صح كده
سارة :صح جدااااااااااااااااا💖
#حكايات_منار
فضلا تدعو لابويا بالرحمة والمغفرة وان يسكنه الله فردوسه الاعلى هو وموتى المسلمين جميعا
