مريم :يا بنتى مضايقة ليه بس قوليلى الكراش ارتبط عادى نشوفلك غيره حليتى وحش فى الميد مش مهم تعوضى فى الفاينال خلصتى مصروفك هسلفك ومش عايزاكى ترجعيهملى غلطتى فى ايه ونصلح غلطك سوا قوليلى بس
ليلى :
مريم :يعنى مصحيانى وقولتيلى مخنوقة وطلعتلك علشان تسمعينى سكوتك لا انا هنزل
ليلى :لا خليكى معايا بصى هو انا مش فاهمة فى ايه بس انا زهقانة وتعبانة بس مش عارفة من ايه
مريم :خلاص نجرب حاجات كتير لحد ما تبقي احسن
ليلى :حاجات ايه دى اللى نجربها..استنى هسجل فيديو علشان منساش منهم حاجة
مريم :بصى يا ستى نتكلم سوا نهزر نخرج سوا نجيب هدوم او نتفسح نقرء رواية سوا انتى بتحبى تسمعيهم بصوتى
ليلى :معلش علشان منساش عيدى كلمتينك اللى فى الاول دول تانى
مريم :لو الكراش ارتبط عادى نشوفلك غيره مش حوار يعنى يروح كراش يجى مية غيره
ليلى وهى بتضحك :لا وانتى الشهادة لله استرونج اوى وعملتيها
مريم وهى بتضحك :لا مانا بحب مش بكراش بقى
ليلى :وهو ولا حاسس وانتى مش مبينة
مريم :ما هو مينفعش المفروض يحس لوحده اوقات ببقى هدعى عليه يا يحس بيا يا ربنا ياخده بس قلبى مبيطاوعنيش
ليلى وهى بتضحك :الحب بهدلة
مريم :جدااااا يا بنتى المهم لو حليتى وحش فى الميد تعوضى فى الفاينال
ليلى :تفتكرى هقدر
مريم :تقدرى طبعا وانا هشجعك
ليلى :كده شلت السنة كان القرد نفع نفسه يا حاجة
مريم وهى بتضحك :مانا مبعرفش اشجعنى على المذاكرة لكن فى تشجيع غيرى معنديش ياما ارحمينى المهم يا ستى لو مصروفك خلص هسلفك عادى
ليلى بضحك :طب والله انتى حبيبتى وكفاءة كملى كملى
مريم :قوليلى بس غلطى فى ايه وهنصلح غلطك سوا انا دايما معاكى انتى مش لوحدك انا ههون عليكى هتكلم معاكى هضحكك هغنيلك حتى
ليلى :طب غنى
مريم وهى بتمسك المشط وبتطلع تقف على السرير وتغنى :يا حلاوتك يا استفندى يا ابن عم البرتقان
ليلى :يا حلاوتك وانت طارح فى الجنينة فى الاوان
مريم وهى بتتحرك وبتلف حوالين نفسها :والبت فى بيت ابوها واربعة بيزوقوها وعريسها يقول هاتوها دى وحشانى من زمان
ليلى وهى بتضحك :ايه يا بنتى اللى بتعمليه ده انتى ملبوسة
مريم وهى بتحرك ايديها فى الهوا :ايش فهمك يا جاهلة انا بشكل
ليلى :بتشكلى
مريم :ايوه عارفة الرقص اللى بيرقصوه الشباب ده اسمه تشكيل بس ايه رايك فيا مش تحفة
ياسين :طيب عاجبك التشكيل تعاليلى اعلمك انما انتى كده عندك مغص مش بتشكلى يا ماما
مريم وهى بتقعد على السرير :يا نهار ابيض انتى يا مهزقة انتى مش قولتيلى مفيش غيرك هنا
ياسين وهو بيضحك :حظك بقى اجى واشوف العرض اللى هذلك بيه بقية حياتك ده
مريم :انتى بتصورى ايه اقفلى يا ماما اقفلى بأذن الله هقتلك وهيكون ده اخر فيديو تصوريه فى حياتك
ليلى :الله وانا مالى انا يا لمبى هو انا اللى قولتله يرجع بدرى كده اعمليلى باى طيب علشان اقفل الفيديو
مريم بغيظ :اعملك باى يا باردة ده انا هقوم اعملك فى وشك عاهة مستديمة
ياسين وهو بيضحك :انا هعملك يا لولة ولا تزعلى نفسك احلى باى عليكى يا قلبى
ليلى وهى بتقفل الفيديو :تسلملى يا ياسو..رايحة فين يا مريم
مريم :نازلة شقتنا يا اختى واعملى حسابك مش طلعالك تانى بعد كده تتهبى تنزليلى انتى
ياسين :ليه كده بس يا مارو جرا ايه لكل ده انا شوفتكو صدفة والله
مريم :صدفة انت ايه اللى مدخلك اوضة اختك انا مش فاهمة الناس تيجى من بره تدخل اوضتها تدخل المطبخ تاكل انما انت تدخل اوضة اختك ليه
ياسين :حظى حلو علشان اشوفك وانتى مسخرة كده فصلتينى ضحك
مريم :اسكت يا ياسين انا لا طيقاك ولا طايقة اختك
ليلى وهى بتخرجها لباب الشقة :مريم بالله عليكى ما تزعلى منى والله ما كنت اعرف انه هيرجع دلوقتى كان المفروض خارج مع اصحابه حقك عليا متزعليش منى
مريم :مش زعلانة يا حبيبتى انا محروجة بس اخوكى هيمسكهالى ذلة بقية حياتى انا عارفة انا هنزل وانتى لو زهقتى انزليلى قشطا هعمل فشار ونشغل فيلم كوميدى
ليلى :قشطا عليكى يا قلبى
ياسين :ليلى اعمليلى نسكافية
ليلى :مش كنت خارج مع اصحابك يا ابنى
ياسين :نسيت اخد معايا فلوس كفاية رجعت اخدهم هشرب النسكافية وانزل اعمليه بسرعة بس
ليلى :حاضر
