سارة :دى مراجعة الكيمياء اللى طلبتها منى
احمد :شكرا يا سارة تاعبك معايا دايما
سارة :متقولش كده تعبك راحة
احمد :احلى سارة فى الدنيا
سارة بابتسامة :ودى مراجعة الفيزياء المستر بتاعنا عملها حلوة اوى قولت اجيبهالك تذاكرها مع مراجعة المستر بتاعك
احمد :ولو انى مبحبش اذاكر من كذا مذكرة بس برينسس سارة تؤمر هذاكر من الاتنين
سارة :وده جدول المذاكرة بتاعى صورتهولك شوف كده لو هتمشى عليه زيى ولا هتعدل فيه حاجة
احمد :وانا اقدر برضه اعدل وراكى حاجة
انتى بتعملى عظمة مينفعش اغير فيها حاجة
والله ما عارف هعمل ايه من غيرك يا سارة بجد هتسوح
ربنا يخليكى ليا
سارة :شكرا
احمد وهو بيضحك :ايه ده انتى اتكسفتى ووشك احمر
انا مقولتش حاجة لده كله
سارة :لا انا حرانة بس وشى بيحمر فى الشمس
احمد :ماشى هعمل نفسى مصدقك
سارة :احمد كنت عايزة اسألك على حاجة
احمد :حاجة ايه
سارة :هو انت فعلا ارتبطت بمنة هشام
احمد :لا مين اللى قالك كده
سارة :هى اللى بتقول للدفعة كلها انك بتحبها
احمد :سيبك منها دى بنت هبلة
هو علشان اتكلمنا شوية على الانستجرام ابقى بحبها
سارة :بس هى بتقول انكم خرجتو سوا اتغديتو ودخلتو السينما
دى حتى نزلت صور ليكم على الانستا
احمد :وانا اى واحدة اخرج معاها ابقى بحبها
كبرى دماغك يا سارة دى بت لاسعة
ومادام بتفهم غلط كده انا هبعد عنها خالص
سلمى :وانتى صدقتى الهبل اللى بيقولو ده
سارة :وهو هيكدب عليا ليه
سلمى :ومنة هتكدب على كل الناس ليه
ما هو لو مقلهاش انه بيحبها او على الأقل حسسها بكده مكنتش هتقدر تقول كده للدفعة كلها
هو بيكدب عليكى علشان ميخسركيش
واحدة بتصورله مراجعات ومذكرات وبتعمله جدول مذاكرة مش ناقص بس غير انك تمتحنى مكانه
وبتسمعى مشاكله وتحليهاله
وبتصدقى اى حاجة يقولها علشان بتحبيه وهو عارف وبيستغل حبك ليه
سارة :لا هو ميعرفش انى بحبه
سلمى :لا عارف يا سارة
عارف وعامل نفسه مش عارف علشان احمد كده بيحب يحس ان كل البنات بتحبه ونفسهم يعبرهم
واللى متركزش معاه يبقى هيموت ويكلمها
انا عايزة اوريكى حاجة...استنى افك البلوك...بصى كده
سارة وهى بتاخد منها موبايلها :ايه ده
احمد باعتلك على الواتس ايه اللى هو بيقولهولك ده
ده بيقولك انك احلى بنت فى المدرسة وانه معجب بشخصيتك وانه بيحبك
سلمى :وبعتلى على الانستا وعلى الفيس كمان وعملتله بلوك
سارة :علشان عارفة انى بحبه
سلمى :ايوه وعلشان عارفة ان احمد انانى زيه زى بابا
يعنى ميستحقش احبه ولا حتى ابصله
سارة انتى مصدقانى صح
انا بقالى فترة عايزة اوريكى كلامه ده بس كنت خايفة تكدبينى
انتى مصدقانى صح
سارة :مصدقاكى طبعا يا سلمى ده انتى صاحبة عمرى
سلمى :كنت هزعل منك اوى لو مكنتيش صدقتينى
سارة وهى بتعيط :بس هو ليه يعمل فيا كده ده انا بحبه ومعملتش فيه اى حاجة وحشة
سلمى :متعيطيش صدقينى يا سارة احمد انانى ومبيحبش غير نفسه ميستاهلكيش
زى ما بابا مكنش يستاهل ماما
مع انها كانت بتحبه واستحملت حاجات كتير وحشة منه وسامحته على خيانته ليها فى الأخر طلقها وراح اتجوز واحدة تانية
من يوم ما وعيت على الدنيا وماما بتعيط بسبب بابا زمان كانت بتعيط علشان بيخونها ودلوقتى بتعيط علشان سابها
انا مقدرش ابطل احبه علشان هو بابا بس نفسى هى تكرهه وتبطل تحبه وتبطل تعيط بسببه
ومش عايزاكى تعملى زيها يا سارة علشان متعيطيش زيها
سارة :ربنا يخليكى ليا يا سلمى
انتى اكتر من اختى والله
قوليلى اعمل ايه وانا هعمله
سلمى :هتعمليه بلوك من كل حاجة
وهنغير مواعيد الدروس اللى بنروحها معاه هنروح مجاميع تانية فى مواعيد تانية
سارة :ماشى بس انتى هتغيرى مواعيدك معايا صح
سلمى :طبعا صح
