أين أنت (يتيمة وسط الميراث) ميلي/بسام /قصة حقيقية جزائرية

حلقة 30

#بقلم_هاندا ريفالدا handa rivalda ✍️✔️

فات شهر كنا في مارس في هاذ الشهر جا الكوفيد الناس تهولت انا مع الأول مكنتش فاهمة قصة هاد الفيروس نتفرج بصح حسبتو حاجة زي انفلونزا عندها فاكسا يامات ويروح ,ايييه بداو يهولو فينا عشنا رعب حقيقي نشفى كنا في عطلة الربيع كي بداو يحكيو عليه سقسيت بسام عليه قالي راهم يقولو فيروس قاوي وصعيب بزاف هذا  ....بعد أيام تأزمت الحالة تع الصح  كما دارو اول مرة الحجر الصحي تما تسكرت كامل المؤسسات والمدارس حت الجامعات  بديت نخاف صح   طاطا سجية قالها بابا متزيديش جي احكمي دارك وسلاك يوصلك، نسمة جا ليها باباها داها لعندو بقينا غي انا وبابا ف الدار كنت خايفة عليه بزااااف من هذا فيروس خاصة كي قالو بلي يصيب الكبار وهما اكثر ضرر كنت نعس فيه من كلشي عمي موسى يقضيلنا يحطهم توال الباب ويروح بابا يروح ساعة ف النهار يتفقد الوزين ويجي كاين عماال بزاااف سرحهم ميجوش وبقاو لي شاف تع مواشن  كل ميروح يبقى قلبي محير عليه حت يجي وكي يجي نبقى نعقم في كلشي عييييت بزاااف كلشي ليا انا، الدار كبيرة منجي نقيها ونعقمها نولي نعرق  ساعات نعيط لطاطا تنعتلي كيفاش نطيب تعلمت شوي انا ونسمة نكونتاكتيو غير ف الفايس  قتلتنا الضيقة زاد جا رمضان زدت وحلت تع الصح  اول مرة تتحط عليا مسؤولية الدار  بابا غلق الوزين حتى تبان الحالة وحكم الدار سترحت شوي  بسام معادش يعيطلي بزاااف على حسب قولو راه ف السبيطار يخدم تطوعو اكل لي ف مجال الطب والصيدلة ،قليل وين يعيط يسقي علينا  اصلا العالم كامل تسكر كل واحد حاكم دارو فات رمضان وزاد العيد والحالة مزالت الاصابات كل مرة تزيد سمعت بجدي مرض  بصح ميش كورونا حكم الفراش سمانة   كي قرب العيد الكبير بدأت تنقص شوي بابا قالي نروح نطل على جدك لازم  محبيتش نخليه وقفتلو كي مسمار بصح راح  دارلي الخلعة راح طل عليه ساعة وجا قتلو بابا ادوش وهات نغسلك قشك درتلو بافات حتى ف الدار بسام كان يقولي كيفاش نعقم ويسميلي  الدوا ولي جال تع تعقيم هو فارماسي حت لي بافات كان يقولي ويناهم لي نشريو منهم فادني بزاااف ف الأمور هاذي .....