أين أنت (يتيمة وسط الميراث) ميلي/بسام /قصة حقيقية جزائرية

حلقة 34

#بقلم_هاندا ريفالدا✍️✔️
كي شفتو مخرجو درت بافات وجال هبطت شافني تبسم وانا اكثر جيت نتحضنو- قالي يا بنتي اجبدي عليا راني نعديك-معليش بابا في خاطرك نتعدا ،ركب هو من لاريار وانا مع عمي ف القدام  كانو يشايخو حتى وصلنا هبطت انا فتحت الباب اووووف هذا وين استرحت كما يقولو داري مستورة عاري دخل قلت لعمي اقعد تتعشا معانا دك ندير عشا محبش قالي اتهلاي فيه وكشما يكون عيطيلي واعطيه دواه ف الوقت ومتعطيهش السكر ....راح وانا عاونتو طلع لشمبرتو بدلتلو قشو وهو كي عوايدو يحاول ميبينش بلي راه مريض شعتلو لا تيلي يتفرج تفكرت معاناة تع ماما مع مرضها جاز عليا داك.شريط يا ربي وميتكررش سيناريو نهبل نهبل وليت نشغل روحي بأي حاجة بش منبقاش نخمم ونتفكر بسام اليوم نسيتو خلاص معيط معيطتلو قلت نوجد العشا ونعيطلو درت لحم ف كوكوت زدت سلاطة مشكلة من الخضر وروز وزدت بيري والمطلوع لي بعتتلي مرت عمي موسى يكثر خيرها  ، كي وجد العشا حطيتلو في بلاطو وديتلو وكتلو سيف عليه عطيتو دواه وهبطت تعشيت وحدي ف الكوزينة  ......
فات شهر وبابا تحسن شوي ولا يروح للوزين بيسك سكرو مدة قصيرة وعاودو حلو لازم كل مايروح نبقا نوصي فيه ع تعقيم ووو حتى وحد النهار جاني يعطس ملي دخل وهو يعطس توسوست وخفت عليه يومين الأولين كان مليح يعطس نمدلو تيزانة قارس زنجبيل مبعد ولا يقولي راسي يوجع وحكمتو سخانة وجهو عاد احمر تم عرفت بلي تقاس يااااربي واسترو عيطت لعمي قالي دك نبعتلك طبيب للدار مكان لاه يروح لسبيطار ، جا داك.طبيب شافو قالو غدوة يلزم دير تاست تع كورونا زاد علينا  ، غدوة راح مع عمي موسى للابو دار تاست ولي زاناليز  وجا في حالة كثر ملي راح فيها قلت لعمي موسى ادخل معاه دك نعيط لعمي يجي  عيطتلو جا كي شافو هكداك قالو نديك لسبيطار بابا محبش محبش قالو منروحش يزيدو عليا  وانا  وليت نقطع في لحمي  ياااربي كيفاش نديرو دك رحت عيطت لبسام حكيتلو قالي جوزيهلي ديتلو يهدر معاه بالسيف بش قنعوه راح على اساس يجوزولو برك طلبولو سكانار دارو وجا ديك الليلة مننساهاش العشا متعشيتش بقيت معاه فوق راسو وهو يقولي متقدميش توالي نعديك وانا منيش سامعة لواش يقول خلاص شفتو تسطح قلت رايح يرقد مبعد ولات صدرو تطلع وتهبط شغل ميقدرش يتنفس -بابا وشبيك مكش تتنفس دارلي بيدو جيبيلي نشرب عطيتو  وهو غي هكداك هزيت تلفون عيطت لعمي هز عليا كانت 23:30 تع ليل قتلو عمي بابا مهوش يقدر يتنفس مهوش مليح قالي جوزيهلي نهدر معاه قتلو مهوش قادر  راني خايفة عليه قالي وجديه اني جاي  ...كي جا داوه هو وعمي فيصل تان مهبطينو رايح يطيح بيناتهم نبكي نبكي وراهم رحت عنقتو ونمسحلو على وجهو شغل حسيت بلي هاذي آخر مرة نشوفو حي توالي  خرجت معاهم حتى لبرا حت قالي عمي ادخلي وسكري الباب وليت دخلت طلعت نجري لفوق الدروج درت فيهم زوج خطوات هزيت تلفون وعيطت لبسام مهزش عليا حت بعد ساعة ولا اكثر بش عاودلي قتلو حيرتو هو تاني ملقا وش يقول غير يهدن فيا قالي نكوبي يعيط لواحد يخدم تم يطمن عليه بقيت نستنا وقتاش يعاود كي عاودلي قالي راهم دخلوه ودارولو أكسجين كورونا عندو 93% - كيفاش وش معناها قالي ميليسا ادعيلو يخرج منها على خير -قتلو هدا وش بقالي من الدنيا كش  ميسرالو انا نهبل  -ميليسا علاه الهدرة هاذي نتي علاه تفولي اااا روحي صلي وادعيلو اسمعي سكرتي البيبان مليح-ايه -شعلي الضوء لتحت وخلي لابال شاعلة مطفيش تلفون اوكي وغدوة هزي قشك وروحي لعند بابا للدار -قتلو منروحش منرتاح حتى في دار بخلاف دارنا -متخشنيش راسك ديري وش نقولك ... بايتة وحدي ف الدار لا رقاد لا والو عينيا تنفخو من البكا لاعمي سالم ولا عمي فيصل عيطولي وطمنوني  بقيت فاطنة حتى طلت الشمس نضت فطرت راسي يوجع من قلة النوم والبكا حتى دار قلبي.....