أين أنت (يتيمة وسط الميراث) ميلي/بسام /قصة حقيقية جزائرية

حلقة 36

#بقلم_هاندا ريفالدا✍️✔️

للمغرب رحت طليت على مرت عمي لقيتها في شمبرة إكرام كانت تشكيلها  خرجت شافت فيا ب  تشناف قتلها في قلبي اتشنفي حقك راكي في دارك انا لي جاية هنا في نصكم  ،بسام معيطش خلاص وكي عيطتلو مهزش كامل النهار تحيرت عليه ...ف الليل جا عمي -ها كش خبر على بابا -مزال بنتي مزال ، راح طل على بنتو لقاها مشنفة وتزيد فيها  زاد لحقتو مرتو منعرف وش كانو يهدرو سمعتو يهدر ويعيط ناض خرج جات ليا إكرام-اسمعي نتي الكف هذا والله تسلكيه غالي مهدرتش معاها  سمعها جدي قالها تسكتي ولا نجي ليك يا لفعة يا لي لسانك فيه مطرا احشمي بنت عمك أكثر منك وراهي ضيفة خلاتو يهدر وراحت ناقسة تربية رحت توال مرت عمي قتلها الا مكيش قادرة انا ندير العشا قاتلي متمسيش دك انا لي ندير  خليتها وجيت ندخل لشمبرة على اساس نرتاح شوي لقيتها مسكرتها عليا قتلها حلي قاتلي هاذي شمبرتي وانتي شوفي وين ترقدي يااااااا ربي وصبرني عليها هاد البزة منين خرجتلي وليت شفت شفت رحت للصالو وقعدت ينعل بو اليتم لي خلاني نطايش من دار لدار وش هذا يا ربي غير نهار برك محملونيش راني مالقيت وين نروح برك لوكان يسمع بابا وش راه يصرالي يحرقهم كامل تفكرت تلفون تع بابا جبتو معايا طفيتو من قبل وحطيتو في صاكي تفكرت بلي راهي مسكرتلي عليه زدت طبطبت عليها قتلها هاتيلي ساكي برك منيش رايحة نبقا معاك فتحت الباب وطيشتولي في وجهي معليش معليش رحت قعدت ف الصالو فتحتو لي زابال الدنيا فيه عاودت غلقتو جات طلت عليا مرت عمي قاتلي ارواحي عاونيني نضت هي دارت شربة وانا قاتلي ديري الكسرة عمك يشتي يوكلها قتلها منعرفش شافت فيا -بووووه عليا راكي شارفة حطيت راسي قتلها لوكان جيت نعرف دك نديرها قاتلي مالا هاكي كملي عليا وزيدي ديري سوفلي إكرام تشتيه وتشهاتو وانا ندير الكسرة  درت وش قاتلي وندعي في قلبي توكل الرهج اليوم وين تشهات سوفلي  وش حاطيني خدامتكم وقيل جيت ندير الخير وحلت روحي انا من اليوم منزيدش هنا غدوة نروح لدارنا الوحدة ولا الذل هذا  عمري لا تهنت كما اليوم مامبا مقدروش ضروفي النفسية مالا عندي الحق كي منيش مخالطتهم وانا كنت نقول على روحي معقدة وترن هادو ميتعاشروش والله لوكان م الحشمة من عمي وجدي لا مسحت بيها لرض اليوم انا كي يحضرو جنوني نتحول لڤريندايزر .....