أين أنت (يتيمة وسط الميراث) ميلي/بسام /قصة حقيقية جزائرية

حلقة 88

#بقلم_هاندا ريفالدا✍️✔️

ليل كامل وانا نخمم شكون لي صورني وعلاه يصوروني جات ف بالي بلي يكون حاط عليا عساس بصح مستحيل مش لهاد الدرجة رحيت مخي ف اللخر رقدت رقدة مكسرة منامات مزعجة نوض نتخطف ونعاود نغفى حتى للصباح جيت نشوف ساعة لقيتو طافي شعلتو كانت التسعة ونص  مكان لا أبال لا ميساج يكون زعف سير نضت مورالي يتكركر هذا وش كان خاصني الوحيد لي يحتويني وزدت زعفتو مني كان عندو حق بصح وش ندير دك  البارح من الخوف معرفتش نبرر خرجت فيه زعافي جاني كلشي مور بعضاه كثرو عليا الضغوطات والإتهامات عييت وصلت لنقطة الانهيار هبطت لتحت طافية خلاص مشية تلفتلي منهارة ولا واحد ف الدار هاذي يعطيني طاقية إيجابية بالعكس توحشت نحس بالأمان والحنان شربت حليبي ب الواقفة تفكرت والديا غرغرو عينيا ب الدموع صح صح تعريت بعدكم يا العزاز ، خرجت من الكوزينة نشوف في إكرام معنقة ماماها حسدتهم على ديك اللقطة ...
فاتت سمانة بسام معيط مسقسى وانا تاني عندي عرق ف راسي تع العناد  كان العيد الكبير زادت طلعت الإصابات ف هذاك العيد عڤبناه كارثة  ف الدار عمي ومرض مرضة تع الموت حت جبنالو لاباراي تع أكسجين سمانة وهو راقد تزيرت الحالة حت ديك لي تخدم هنا مجاتش ولينا درنا الحجر ف الدار كل وحدة دايرة بافات انا بحكم قاعدة الفوق وحدي مساعدتني نهبط غي وقت نوكل ولا،  الضياف واحد مايجي غير ولاد عمي ساعات يجيبو قضيان وهذاك الفارماسيان صاحب بسام يبعتو كل يوم يجي يطل عليه ويريقلو لاباراي ويروح  انا منخلطش عليه غي مرت عمي تستقبلو ،عڤبنا شدة  بزااف الجيران لي ماتو حتى  عمي موسى مرض ودخل كومة تحيرت عليه حتى بكيت  حبيت نروح نشوفو ومقدرتش حت سمعت بلي توفى مستوعبتش كليت روحي عليه بكيت البكا لي بكيتو على بابا ولا أكثر وليت نندب هذا الإنسان يعنيلي بزاااف نحسو بابا الثاني جبت يومين وانا طايحة لفوق حازنة غاضني تفكرت كل صغري كي كان يشريلي ويديني يخرجني ذكرياتي معاه طويلة الله يرحمك خلا عايلتو  وراح عيطت لطاطا سجية قاتلي بلي هي تان سمعت بيه واساتني شوي  ..فاتت سمانة وحدة أخرى  عمي تحسن شوي نحا لاباراي وسلك منها حبيت نروح نطل على عايلة عمي موسى قلت لعمي قالي معندك مديريلهم المرض داير حالة بالسيف قنعتو ورحت ليهم للدار استقبلوني جبت ساعتين وانا معاهم غاضوني وليت جبدت شوي سوارد من لي كانو عندي ومديتهم لمرتو محبتش تحكم عليا حت حلفت عليها رتحت شوي كي شفتهم هادو أمانة تاعو بربي انشاء الله تتسقم حوالي ومننساهمش .