أين أنت (يتيمة وسط الميراث) ميلي/بسام /قصة حقيقية جزائرية

حلقة 1

#بقام_هاندا ريفالدا   handa rivalda✍️✔️
حلقة 1
تبدأ حكايتي او نسميها دوامة حياتي بعد فراق ماما لكن بعد فراق بابا تعريت وانصدمت من اقرب الناس تعرفت على وجوه كانت متخبية ورا أقنعة أقنعة الغدر  أقنعة مزيفة تنتضر ف الفريسة بفارغ الصبر طبعا هاذ الفريسة هي أنا ،صدقوني سبب المشاكل هو الورث يخلي الإنسان يتخلى من إنسانيتو  أنا هاد الأقنعة لي دايرة بيا تفاجأت بيها بعد موت بابا ..
قبل خمس سنوت نهار لي توفات فيه ماما كنا اصلا نعرفو بلي خلاص راهي تودع كانت صبورة وقانعة بقضاء الله كنت هذاك عامي الثاني ف الجامعة نقرأ ونروح للدار بابا دايلي شوفور( عمي موسى)  لازم نروح معاه ونجي معاه إنسان مشاء الله كبير ومتواضع ويخاف ربي بابا كان يقادرو  واي حاجة تخصو بابا كان يتكفل بيها
كان نهار شتوي شتا خيط من سما كان عندي projet  لازم نروح محتمة عليا  خلصت خرجت ديراكت ركبت طريق اكل وانا قلبي مزير عليا حسيت بحاجة رح تصرا قتلو عمي موسى تعيش حبس حابة نخرج نحس ب غصة تخلع مسكين عليا- يا بنتي راكي مريضة نديك للطبيب لا عمي جيست تخنقت حبيت نشم هوا معليش بنتي اقعدي لداخل نروح نشريلك قرعة ماء والمطر تصب تشمخي  لالا عمي حابة نشم هوا معليه هبطت زمان وحد عشر دقايق تشمخت مليح (اصلا نحب كي نتشمخ ب المطر ) مبعد عاودت ركبت وصلنا للدار كي العادة سكوون عام البيت غي خالتي سجية وريحة الطياب يجي من الكوزبنة دخلت ديراكت هزيت كأس ماء نشرب وطلعت لعند ماما لقيتها متكسلة وجها اصفر لوحد درجة مش كما مالف همستلها بالعقل ماما فتحت عينيها تبسمتلي اهلا بنتي الغالية عاونتها تقعدت شوي درتلها مخدة من ورا ضهرها وقعدت نحكي معاها وهي تجاوب بكلمة برك كنت عارفة بلي تعبانة لكن حابة نستغل اي دقيقة واي ثانية معاها شغل كنت نوثق كل شيء معاها كنت عارفة رح نفتقد هاد اللحظات ونتوحشهم  شوية وطبطبت خالتي سجية منيرة بنتي وقت الغدا راه وجد وماماك لازم تتغدا وقت الدوا تاعها قتلها حابة نوكل مع ماما هنا ف شمبرة اصلا كرهت  من نهار عادت ماما متقعدش فيها سماطت وساعات بابا ميجيش تخلاص عليا قاعدا وحدي وسط 12 كرسي داير ب الطابلة وحيدة تماما
كملت كليت أنا وماما رن تلفون هزيت لقيتها نسمة صحبتي الوحيدة واختي لي مجبتهاش ماما  هي بنت واحد صاحب بابا تقريبا يخدم نفس الدومان لكن والديها منفصلين وعايشة مع باباها المهم حكيت معاها شوي عاودت دخلت لعند ماما لقيتها تكسلت ورقدت غطيتها بقيت نشوف معاها مبعد خرجت رحت لشمبرتي بدلت قشي حكمت تلفون نكونكتي حت غفيت
نضت على حس وقيل بابا جا نضت خرجت لقيته لتحت يهدر ف تلفون توله شافني طلع لعندي جريت حضنتو -بنتي المدللة وش راهي اصلا هو يعرف كفاش يخليني نضحك دخلنا لعند ماما كانت مزالت راقدة خرجت وخليتهم هبطت لتحت مبعد شي عشر دقايق نسمع ف بابا صوتو عالي شغل يهدر بتلفون ويبان مخلوع طلعت زي البرق قلبي يدق ف 100 بابا.و.وش كاين وجهو كان اصفر ويخض ف ماما زهرة زهرة ( إسم امي) بصح ولا رد انا تم وين فهمت تخطفت من بلاصتي رحت نوض فيها ماما ماما وبابا تان جات خالتي سجية هي تان ماما ماما دموعي بداو ينزلو بابا وشبيها ماما كانت راقده ياك راهي راقدة برك بابا مهوش معايا باقي يمس فيها كانت 6 تع العشية حت نسمع ف لومبيلونس دخل عمي موسى مخلوع زادو جاو تع إسعاف وانا لاصقة فيها ماما ماما بابا جبدني جا دخل طبيب باقي يمس فيها وانا كي مكلوبة نعيط وخالتي سجية حاكمتني بابا ف عالم آخر مركز مع طبيب وش يقول شوية نطق طبيب لبابا الله اكبر البقاء لله شفت ف بابا وشفت ف طبيب وش و.وش يقول باباااااا عيطت عيطة دوات الدار بابا حكم وجهو وطبس عندها باسها من جبهتها هذاك المنظر مننساهش أنا جريت عنقتها بكل قوتي صوتي مخلط ب البكا بابا يد حاكمني بيها ويد حاطها على  يدها يبكي بكل قوتو وانا نشم فيها وفي ريحتها خالتي سجية تبكي ف الكوانة أنا  محبيتش نسكت قد محاولو يبعدوني عليها والوووو بابا حسيت بيه فقد نصو الثاني جبل وتهد قدام عيني .......آآآآآآه يا دنيا