أين أنت (يتيمة وسط الميراث) ميلي/بسام /قصة حقيقية جزائرية

حلقة 80

#بقلم_هاندا ريفالدا ✍️✔️

بعد هذاك النهار جازت عشر ايام ولا أكثر معادش ولا قلت بلاك فهم روحو ولا حس ب الذنب لكن كنت غالطة ، بعتلي وليد جاني للجامعة يحاول يقنع فيا بصح محبيتش حتى وحد النهار جاهم الخبر من المحكمة وسمعو بقصة خويا تهولت الحالة عمومي في زوج تشوكاو درت روحي حتى انا منعرفش جدي شبع فرحة جامي شفتو فرحان كما داك النهار حضني وقالي الحمد لله الحمد لله لي خلالك كتف تتكي عليه وسط الذيابة هادو  ، دارو سوق كبير  لدرجة محبوش يعترفو جانا المحامي هذاك عيطلي وقالي بلي ديك المدام هي لي بعتتو لعند عمومي شه فيهم ع الاقل وقيل هي يخافو منها مش كما انا كلاوني وصلت وين عيطلها عمي فيصل وبهدلها  عمي سالم شوي تفهم الأمر مش كما لوخر  شغل مكانش يستنى فيها  جا قالي وش رايك ف هذا الخو لي ضهر مناش متأكدين بلي راه ولد خونا قالو جدي انت بغيت تجهل ولا كيفاش هذا مشي بنو حبيت تنكرو ولا قالو انا يسموني ندي حقي وميهمنيش عندو بنو ولا عشرة  تعبي منيش سامح فيه كيفاش هذا عشرين سنة وانا تاعب معاه يجي واحد ولد ...استغفر الله يمسحلنا فامنا هاذي والله متصرا  ف الاول قلنا الطفلة وحقها بصح هذا منين خرج وعلاه مبانش بكري  قرقرقرقرقرقرقر  مخلا مهدر راسي وجعني انسحبت وخليتهم ابتسامة على وجهي ادو الشعر دك آآآآآآه ينعل بو سوارد هادو اي بغاو يجهلو الناس ...
بعد يومين عيطلي بسام قالي دك يجيك المحامي روحي جيبو دوك الأوراق من عند صاحبتك ومديهملو  درت كما قالي جاني داك محامي للجامعة حكا شوي معايا وفهمني كيفاش ندير عطيتو الورق  وحت تع خويا ديك  وراح خبرت بسام قالي خلاص تقدري تقولي بلي فرات دك  لي يجي يهدر معاك متجاوبيهش خلي كلشي ع محامي هو يدبر راسو  كملت قرايتي وروحت الأجواء مقلبة كي سمعو بخويا لقيت ديك اللفعة مرت عمي فيصل ف الدار جيت رايحة نتلاح عليها حكمت ف روحي بالسيف مننساش وش هدرت فيا الرخيسة شفت فيها بنص عين وعڤبت عليها عيطتلي مرت عمي سالم رحت توالها قاتلي ارواحي تشربي حليب قعدت مقابلة ديك المسمامة هدرة جيب هدرة حت وصلو لسيجي تع خويا -حقا نتي خوك هذا لي ضهر جاك نورمال خزرت فيها وعلاش مش نورمال خويا ولد بابا من دمي ننكرو تاني -مشي تنكريه بصح يماه باينة رايحة تمسحلك فمك قتلها- فمي مسحوهلي قبل متوصل ليها وزيد رزق بابا كما يحقلي كما يحقلو انا منيش أنانية  -بووووه ع الطفلة لي يسمع يقول حنا كلينالها رزقها اكي تشوفي عمومك تعبو  طاحو وناضو معاه وف الآخر قعدو يتفرجو هذا خو ولا خلي قتلها ع الاقل اترحمي عليه بابا مولا حق عمرو مكلا حق واحد ولي يتعب راح يدي حقو  كلشي راه باين  عوجو فامهم نضت وخليتهم موتو بالقنطة  ،جيت خارجة من الصالو قابلتني خديجة طالعة ف الدروج تبسمتلي رحت جريت ليها سلمت عليها عندها وقت مجاتش تسكن بعيدة شوي -اهلا وين راه راجلك -مدخلش وصلني وراح وكي عندي مفتاح حبيت نديرها سيربريز ههه ،  دخلتها للصالو قعدت معاها مبعد قاتلي نوض نبدل قشي كانت شوي مصفارة شكيت فيها تكون اونسانت  طلعتها لعندي لفوق بقينا نشايخو حت دخلت إكرام توالنا جات سلمت عليها  وراحت هبطت قاتلي وشبيها إكرام حطيت راسي قتلها والله منعرف تعرفينا انا وياها منتفاهموش يعني منيش قريبة ليها بش نعرف حالتها -ايه بعدي عليها تعرفيها مزاجية كنت هنا انا وياها قط وفار كبيرة عليها جامي احترمتني  نقولك هازة طبع خويا بسام هكذا جاي مشنف وميحلبش هي جابت سيرتو وانا تبسمت لا إراديا....