أين أنت (يتيمة وسط الميراث) ميلي/بسام /قصة حقيقية جزائرية

حلقة 7

#بقلم_هاندا ربفالدا handa rivalda✍️✔️

....بعد عدة أسابيع  فات لي فات فيهم نقدر نقول تخطيت مرحلة الحزن شوي رجعت للحياة نوعا ما من الدار للجامعة ومن الجامعة للدار عايشة وحت بابا كيفي متعايش مع الوضع ضاهريا اما باطنية يعلم ربي ...
وحد نهار رجعت للدار كي العادة صبت جدي وعمي سالم ومرت عمي جاو لعندنا مريحين مع بابا دخلت سلمت عليهم حكينا شوي  وانا طلعت لبيتي بدلت قشي لبست بيجامة طلعت شعري  عاودت هبطت محبيتش نخلي مرت عمي وحدها  وزيد وليت نكره من جو الغرفة   جيست هبطت جاني صوت مالوف ايييه هو والله هو بسام  هذا صوتو وأصلا ريحة بارفان تاعو نعرفها بقيت حابسة مبعد زاد جاني صوت واحد آخر هذا نعرفو تاني تع ولد عمي صابر  اوووف وش هاد اليوم تفاهموا علينا ولا  توترت وزدت شفت مع روحي بالبيجامة حشمت ندخل بيناتهم هكذا منحبش توال ولاد عمي يشوفوني بهندام مش محترم ( أنا شوي معقدة ف هاد الامور)  عاودت طلعت بدلت لبست روب وعاودت نحيتها نووووو هادي متليقش يا ربي وش نلبس انا دك  ف الأخير جات عيني على سروال عريييض لبست فوقه تريكو صوف خفيف شفت مع روحي معليش خير من بيجامة  هبطت لعندهم صابر عادي موالفاتو بصح هذا بسام كيفاش نسلم عليه -أهلين -مرحبا بنت العم لباس-حمد بخير وانت-في رحمة ،بقيت واقفة مبعد قعدت توال مرت عمي هما كانو يشايخو نقعد نقعد ونهز عيني فيه نلقاه يشوف معايا يااا ربي  بلعت لساني كلمة منطقتها حتى قالي عمي -ها ميليسا علاش ساكتة بنتي -والو عمي  راني نسمعلكم  قالو بابا هي هكذا لوكان متجبدلهاش لسانها متهدرش سيرتو كي تشوف البراني -اوووو شكون هذا البراني قصدك على بسام راهو ولدي -هيه  هي تحشم -وشبيهم هادو تفاهموا عليا اليوم وجهي عاد احمر طوماطيشة هزيت عيني فيه شفتو حاكم الضحكة لداخل  وصابر يتمخزر من هيه  ..... لحق وقت العشا تعشينا اكل مع بعضانا باقيين ناكلو وكل واحد يمد كلمة من ومنهيه نطق جدي -بسام وليدي وقتاش راجع لخدمتك -شفت فيه عيني في عينو هبطت عيني نوكل جاتني الغصة منعرف علاه مالڤري مني مداصراتو مني نحكي معاه من نهار هذاك مزدتش تلاقيت بيه حت لليوم هو كمل ياكل ويهدر على حسب وش فهمت بلي مبقاش بزاففف ويرجع نطق صابر من هيه كي عادتو  هو صح إنسان مأدب ومحترم ف كلامو  ومن صغري موالفة معاه بصح ميجينيش ع القوسطو قالو ولاد لهيه ميقدروش يصبرو هنا بزاااف جدي ديجا منعرف كفاه صبر هاد المدة هنا  تبسملو برك  تولهت بلي بسام وصابر ميتفاهموش المهم هكذا حسيت   نطق صابر  قالي كيفاش راكي مع قرايتك تبسمت معاه الحمد لله راني معاها  وهذاك كلمة منطقهاش ايي وش متكبر  ربي سساهل كملنا العشا نضنا جات خالتي سجية تلم ف الطابلة عاونتها و مرت عمي ديك تقول مكسرة اليدين نشفا على ماما كي كانت بصحتها تعاون نورمال معندهاش دي العقلية تع خدامة وانا مولات الدار  وش منحبش التكبر  كملت رحت معاها -خالتي الا جاوك بزاااف دك نعاونك فيهم -لا يا بنتي والله
متمسي روحي توالهم وشايخي ياخاه -عادي خالتي تعرفيني معنديش دي العقلية وراني دايراتك ف مقام ماما ربي يرحمها -ربي يحفظك بنتي الغالية راحت وخلات الغالية ربي يسترك ويبعد عليك ولاد الشر ، خرجت من الكوزينة جيت طالعة  حبسني صوتو  -درت ورايا لقيتو بسام..