أين أنت (يتيمة وسط الميراث) ميلي/بسام /قصة حقيقية جزائرية

حلقة 44

#بقلم_هاندا ريفالدا✍️✔️

ديتلو كأس ماء يشرب  تكسل تم ،رحت نوصي طاطا بش توجدلو ماكلتو هو عندو كوليستيرول  قاتلي راهي واجدة  حطيتها ف بلاطو وديتلو محبش ياكل غي مغرفة برك قشرتلو حبة بنان وزدتلو دواه  ،شفتهم يستفو ف الطابلة  رايحين يحطو العشا عيطت لنسمة تهبط ، تلمينا ع الطاولة كامل كما رانا غي الاولاد مكانش  كليت اليوم جعت بزااااف
نطق عمي قال بسام راه مريض عيطلي خالو وقالي عندو 3ايام ملي حكماتو كورونا -كنت حاكمة مغرفة حسيت بيدي فشل وثقال مقدرت نهدر مقدرت نحكمها شافت فيا نسمة فهمتني بلي تخلعت  مبعد قالو عمي وكيفاش راه دك قالو شوية  بصح مزال معندوش خبر بلي توفا عمو  حسيت قلبي دار عليا وحكمني خباط ف كرشي  يا عمري  وانا نقول كيفاش معيطليش راه وحدو تم يارب وكون معاه واشفيه ديك مرت عمي متحيرتش خلاص  ماهوش وليدها حاجة باينة،  حسيت بيه والله متغرب وزيد المرض بغيت نبكي من خوفي عليه بصح مقدرتش اكل حاطين روسهم مع الماكلة نستنى فيهم وقتاش يكملون ونوض نفرغ قلبي لفوق توحشتو توحشتو بزااف ....كي كملو نضت أنا الأولى وتبعتني نسمة  ديجا بديت نبكي ف الدروج وهي علابالها بحالتي طلعنا وخليناهم لتحت طلقت روحي على السرير خفت عليه بزاااف  ...
فاتت سمانة كاملة  وانا مقلقة عليه ولا واحد قدر يمدلي عليه خبر  كل ساعة نعيط والو ميهزش  ومبعد وليت نلقاه طافي  وتالفون بابا يعيط غي نومرو وسمو طاهر برك  وتاعي  من طاحلي مزدتش شفتو وليت نهدر بتع بابا جا يحوس عليه عمي فيصل -قالي تلفون تع باباك وين راه قتلو راه عندي ونهدر بيه -قالي وتاعك وين راح قتلو فسد طاح ف الماء  شغل جا يهدر مبعد سكت قالي وانتي تقعدي هنا وجدك مريض وعمك ميخليهش يزيد يبقى هنا قتلو عمي لوين نروح انا اك تشوف مبقالي حد غير هاد الدار خلوني نقعد فيها وجدي مخصو والو معايا راهي طاطا معايا وانا تاني قالي نتي تحسبي فيها ساهلة  انتم نسا وهو كبير   وانا منكدبش عليك معندناش بنات يقعدو وحدهم ف الدار تروحي معايا ولا تروحي مع عمك  الدم طلعلي من هدرتو دمعو عينيا قالي انا دك رايح للوزين ف الليل نولي انا وعمك ونزيدو نهدرو  راح خرج داك نهار كنت وحدي انا وطاطا برك وجدي ،نسمة راحت  سمعت تلفون يصوني كي شفتو لقيتو بساام من الفرحة بقيت نتأكد هو ولا طلعت نجري فتحت عليه غي قالي الو بصوت يبان هاذي وحازن -ااا الو -ميليسا هاذي انتي -ايه انا -عظم الله اجركم هذا وين سمعت هذا وين راني مشوكي -سكت -ميليسا خلاص متبكيش اهدري معايا عمري -مقدرتش قلتهالو بالبكاء-حسيتو هو تان يبكي -قالي راني مزلت فاشل منيش قادر نهدر مليح -قتلو ريحت شوي -شوية خير من كنت -خفت عليك بزااااف -يا عمري علابالي وتلفونك علاه طافي-فسد بسام راك تبان عيان معليش ريح روحك وانا راني مليحة متتحيرش عليا -تنهد وقالي ان شاء الله اتهلاي في روحك بزاااف ...كوبيت استرحت كي سمعت صوتو..