أين أنت (يتيمة وسط الميراث) ميلي/بسام /قصة حقيقية جزائرية

حلقة 78

#بقلم_هاندا ريفالدا✍️✔️

كثرت الهدرة على الورث والوزين حت وصلو لدار بابا قالك لازم نبيعوها هي تان داخلة ف التركة والمشكل هاذ القرار كان بيناتهم سمعت من جدي انا مخبرونيش  بغيت نهبل غي هاذي موحال نوافق عليها.
كان نهار الجمعة جا عمي فيصل قال  لعمي اعطيني مفاتح الدار قصدو على دارنا مزية سمعتو كنت ف الكوزينة عمي سالم قالو اصبر شوية نشوفو الموضوع هذاك علاه راك مزروب قاطعو قالو انا منريسكيش على جال حاجة مهيش باينة يهدر بالالغاز  شافوني واقفة ف باب الكوزينة درت الكوراج ونطقت قتلو عمي صح الدار رايحين تحطوها للبيع قالي-ايه لازم راهي داخلة ف تركة وكلشي لازم يتصفى شغل موس ودخلو فيا قتلو لالا غي الدار منقبلش هاذيك داري انا وتبقى ليا فيها ريحة بابا وماما قالي علاه راكي مطايشة راكي عايشة ولاباس عليك  معندك متحتاجي فيها قلقت منو يهدر ومعول حكمت دموعي في الشفر رحت توال جدي وطرطقت ب البكا -جدي تعيش قلهم يخلولي دار بابا تعيش جدي تعيش اهدر معاهم -يا بنتي وانا قدرت عليهم ولا  راهم جهلو انا ومدارولي حتى قدر وقيمة خاصة فيصل هذاك جهل شكون يقدرلو ومرتو هاديك لفعة تعمر فيه علابالي بيها طبطبلي على ظهري وقالي متخافيش ربي ميضيع حق على شعرة كنت رايحة نقولو على خويا ونخليها تخلا  حكمت روحي بالسيف  دك انا كيفاش ندير كن يفوت ويبيعوها تطفر فيا وفيه نصفاو هكداك وانا قليلة حيلة منعرفش ف هاد الأمور ومعنديش لي يوقف معايا يا ربي وعاوني سمعت بلي عمي فيصل متفاهمش وحاب يحل وحدو قال قال نضمن حق ولادي وانا شغل حيط حقي وراح ياكلو يخمم في ولادو ، مرت عمي سالم هي تان نضل نسمع فيها تعمر فيه على خوه دير كما هو واضمن حق ولادك  هذا ذيب المهم تخلطت هذا يتالب في هذا  لحق الموس للعظم عيطت لبسام قتلو يا تهبط يا تشوف كيفاش تهبط خويا هذا ويجي راهم هنا خلاص رايحين يمسحو كلشي خاصة عمي فيصل راه معول قالي دك نشوف كيفاش ، بقيت متقلقة قرايتي وسمحت فيها منيش مركزة خلاص  ، وحد النهار عيطلي عمي موسى اييييه شحال مسمعتش صوتو  قالي بنتي راهي جاتك وحد الورقة من البنكة حطوها ف بوسط  تع الدار عندها وقت وهي تم  قتلو تع واش هاذي قالي منعرف ارواحي وشوفي ، لغدوة رحت توالهم للدار عطاهالي فتحتها لقيتها بإسم ماما ربي يرحمها نسيت كامل على هاد الموضوع  تع رصيد تاعها ف البنك وسلاك كانت متهزهمش قريتو لقيتو مبلغ مليح والله مكنت نعرف خبيتها قلت نروح للبنك يفهموني ونشوف كيفاش ندير  ...