أين أنت (يتيمة وسط الميراث) ميلي/بسام /قصة حقيقية جزائرية

حلقة 11

#بقلم_هاندا ريفالدا handa rivalda✍️✔️

حكمت تلفوني عيطت لعمي موسى -ها عيطي علاه راكي تشوفي فيا راه قريب يوصل - عيطتلو مهزش عليها ، شافت فيا  -بلاك مشغول -خلاص خليه مشغول ارواحي تروحي معايا  ومبعد ساهل الحال ..شوية هكذا وصل  ركبنا   عاود صونالها تلفون هزت كان باباها قاتلو رايحة توال ميلي سمعتو كي قالها مكنش مشكل  كي كملت شفت فيها -اني سمعت متقولي والو  علاه تكذبي وتقوليلي محبش يخليني-مش هكذا ميلي منيش حابة نخليه وحدو ف الدار -وعلاه -سكتت مبعد جاوبتني -بابا راه مع وحدة هاد الايام شفتهم مع بعض بزاااف -هيه وانتي وش دخلك فيه  متقوليش برك غرتي على باباك هااا نندب راكي مرا -والله زعما نسيتي روحك انتي كيفاش يصرالك على باباك -مشي كيف كيف نسمة انا بابا هو اصلا منحيى فكرة الزواج من راسو هما لي حبو يلصقوه قاتلي انا حابة بابا وماما يرجعو كرهت هاد الفراق والتشتت -نسمة منكدبوش على بعضانا ماماك تاع راسها برك انتي و  سامحة فيك  اسمحيلي بلاك باباك حاب يعاود حياتو خليه  شوفي حياتك انتي -منعرف منعرف معجبتنيش ديك لي يدور معاها راهي تخدم عندو تبان مسمومة -معليش ربي يجيب الخير برك نسينا رواحنا بالهدرة  حتى لقينا طمبيل حبست -يالله اهبطي ، هبطنا دخلنا للدار شفت طاطا سجية ف كوزينة  طلينا عليها قتلها طاطا مزال داك رشاش
تع الصباح ولات تضحك وسمو صب رشراش يا بنتي اقعدو دك نديرلكم حليب -شافت فيا نسمة وش هذا جامي سمعت بيه -اصبري دك دوقيه بنين داير كما كروكي .....حطتنا بقينا نشربو-والله بنين مع الحليب  كي كملنا طلعتها لشمبرتي  انا دخلت ندوش وهي خليتها تم مطلوقة فوق السرير  كي خرجت قتلها الا تحبي تدوشي روحي -لا راني كاااو خليني نرقد ميلي -أرقدي شكون حكمك -لبست قشي ونشفت الشعر -يااااا ميلي علاه متنشفيهش ف الدوش جاية هنا فوق راسي صدعتيني ب سشوار -أرقدي اني كملت ياخي مصروعة ..حكمت طرف من السرير بسلامتها طالقة روحها وفاتحة رجليها مخلاتليش وين نطيح انا تاني -اي لمي كرعيك شوي-اممممم خليني ميلي علاه تمنكري-هذا لي قالك جبت قط يونسني رقد وخلاني على زهري تكيت توالها نص فوق سرير ونص تاني ف الهواء مكمشة كي المتشرد  وحد ساعة ولا اكثر فطنت ولالة مزالت راقدة وتشخر من فوق وليت ننغز فيها يااااااااي يااااهااااه فطنت ولات تسب فيا ب المقلوب -ينعل بو رقدة معاك وش بيك نتي -راكي صرعتيني ب الشخير تاعك ياااا نسمة وقيل عندك اللحمات -وشنهي لحمات هادو -يجو ف الانف يسكرو على الهواء-ههههه ترتقت ب الضحك شافت فيا ميلي راكي مليحة اليوم سير -والله انتيك علاه -والو شحال الساعة  شفت لقيتها الخمسة ونص سمعت الباب يطبطب كان بابا -نسمة ندخل-ايه بابا خش-دخل -سلام عليكم ناضت نسمة سلمت عليه وانا لازم نحضن - بقا يسقسي في نسمة قالها علاه وليتي مجيش بزااف هنا ميليسا توالفك كي تروحي وتخليها تولي كارهة -والله صح ا بابا اليوم بالسيف بش جبتها قالي جيت نطل عليكم واني خارج مع السيد  راح خرج قتلها هيا نهبطو لتحت ....