أرويني بدماء جحيمك [Quench me with the blood of your hell]

𝑃𝐴𝑅𝑇❀62

🩸أࢪوينـــــــي بدمــــ♡ـــاءِ جحيـــــــمكَ🩸     

🗡الفصــــــــل الثـــــــاني:ثــــــــأر قاســـــــي🗡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀62

زياد(كمل كلامو و نطق بصوت شجي مصحوب بحزن):كانبغيك من اول مرة شفتك(بندم نطق بترجي)سمحي ليا اسارة..

ساجد ما شعرش بديك الضحكة امتى خرجات من ثغرو من بعد ما سمع كلامو، كانت ضحكة مُتهكمة، ساخرة،شاف فزين لي كان مخنزر فزياد ما مصدقش هادشي لي سمع، حتى كي سمع ساجد قاليه بإستهزاء...

ساجد: كي بغيها...

زين(بنبرة غاضبة):قتـ ـل عدو ربو، هادا باغي يضحك عليها...

ساجد(جمع ضحكتو و زير على شعر زياد بقوة قبل ما يشوف فسارة لي كانت مصدومة و ينطق بحدة و صرامة):لا قدر يلعب عليها بهاد الكلمة غا تمشي تمو ت حسن ليها

سارة شافت فيه و عيونها عامرين بالدموع،من ملامحها ظاهر بلي الكلمة لي نطق بيها زياد اصابتها بحيرة شديدة، لكن كانت حيرة من نوع اخر، كانت كاتساؤل كيفاش كي بغيها و فنفس الوقت سبب ليها ألم كبير باقي لحد الساعة ما براش...

ساجد(عاقد حواجبو):اش تما ا سارة؟ دوك الشوفات شنو نعتابروهم؟صافي لعب عليك بهدرتو؟

سارة(رجعات شافت فزياد و قالت ببرود مخاطبة خوها):لا...(رجعو نزلو دموعها ناطقة بألم)هو آذاني ا خويا

ساجد(بتاسم برضى): و دابا شنو نديرو فيه؟

سارة كشرات ملامحها ملي حسات بالدوخة بسبب راسها لي ضرها،هادشي لي عاشت فهاد الدقائق القليلة هلكو ليها نفسيتها و استنزفو طاقتها، حطات يديها على راسها مغمضة عيونها، فقدات توازنها و كون ما زكية لي شاداها كانت طاحت للأرض..

زكية(شافت فساجد و قالت بترجي): باراكا عليها ا ولدي عافاك...نخاف تدخل فشي صدمة صعب من اللولة...باراكا عليها هاد النهار...

زين(قرب لساجد و قال):عندها الصح...خليها حتى ترتاح و ديك الساعة تفكر مزيان...

ساجد(بقا مدة كي حقق فيها شوية شاف فزين و نطق بأمر): لوحو لتحت...(طلق من زياد بالنترة)

زين حرك راسو و قرب لزياد شدو بنفس طريقة ساجد،بدا كي جر فيه مع الارض في حين هو مدور وجهو عند سارة كي نطق اسمها بنبرة عالية....

زياد: سارة..

سارة حطات يديها على وذنيها ما باغاش تسمع اسمها من فمو، حتى كاتحس براسها تهزات و هي تحل عينيها و شاف فخوها لي هزها غادي بيها للجناح ديالها، وصل و داها للناموسية حطها فوقها، تكا حداها و عنقها عندو كي مسح على شعرها و هي مخشية فيه و كاتشهق بسبب البكاء لي بكاتو...