أرويني بدماء جحيمك [Quench me with the blood of your hell]

𝑃𝐴𝑅𝑇❀96

🩸أࢪوينـــــــي بدمــــ♡ـــاءِ جحيـــــــمكَ🩸     

🫀الفصـل الثالــث و الأخيـࢪ:دَع القَلْـــبَ يَهْـــوَى🫀

     ♡لَـوْ ذقـت يا غزالـي،ما ذُقْــتُ في ♡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀96

تسمعات شهقة عميقة من طرف ليسا لي حلات عيونها موسعاهم على الاخر، قفزات معاها الممرضة لي كانت واقفة حدا القرعة ديال البنت و مركزة مع الحقنة لي فيها الجرعة  الأولى من التطعيم ضد التهاب الكبد B، كانت يالاه بغات تحقنها فالسيروم حتى كاتسمع ليسا كاتغوت و تبكي، دارت لعندها بانت ليها كاتدور فراسها يمين و شمال كاتقلب على بنتها و هي كاترعد، و غير شافتها هازة الحقنة غوتات على حر جهدها و نترات السيروم من يديها...

{الحوار بالايطالية}

ليسا(برجفة صوت): لا....لا بعدي منها...

الممرضة(عقدات حواجبها): الالة تهدني ما واقع والو...

ليسا بغات توقف و هي تصدر صرخة عالية ملي حسات بألم شديد فأسفل بطنها، حطات عليه يديها و رجعات تكات و هي كاتنين و تبكي فنفس، و فوسط بكاءها قالت بنبرة منكسرة...

ليسا: عافاكم بعدو من بنتي...تفرقو ليا من بنتي...

الممرضة(حطات الحقنة و قربات ليها كاتحاول تهدنها): ما غاديش نآذيو ليك بنتك الالة...غير بغيت نعطيها التطعيم ضد التهاب الكبد...

ليسا(قالت و هي كاتشهق و دموعها سيالة): لا بغيتو تضرو ليا بنتي حيت هي ماشي عادية...بعدو منها عافاكم...

الممرضة(حنحنات كاتحاول تحافظ على هدوءها و تهدنها حتى هي):راه لمصلحة بنتك الالة ندير ليها هاد الحقنة...

ليسا(عيونها المُحمَرَّة على بنتها): لا لا...بنتي مسكينة باقا غير لحيمة اش غادي تدگو ليها...

الممرضة(بهدوء):لا ماغاديش ندگها ليك بالابرة،بالسيروم الالة

ليسا(مدات يديها ناحية الحاضِنة لي فيها البنت):بغيتها...بغيت نشوفها...

الممرضة:واخا بلاتي غير نسالي...رجعي رتاحي(شافت فيديها)غادي نعيط على فرملية اخرى تقاد ليك السيروم...

سكتات ليسا و صوت شهقاتها مازال كي تردد مسمعه فالمكان، عيونها ما حيداتهمش من على بنتها لي رجعات عندها الممرضة تكمل ما بداتو من بعد ما نادات على الممرضة باش تقاد ليها السيروم لي نتراتو...