أرويني بدماء جحيمك [Quench me with the blood of your hell]

𝑃𝐴𝑅𝑇❀23

🩸أࢪوينـــــــي بدمــــ♡ـــاءِ جحيـــــــمكَ🩸     

🗡الفصــــــــل الثـــــــاني:ثــــــــأر قاســـــــي🗡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀23

ساجد(بصراخ):ناجد...

ناجد شافيه و هو يوسع عينيه بصدمة،لمياء دارت لعندو و غير شافتو بلعات ريقها مدهوشة،ساجد كان يالاه قاد السلاح فيديه و حط صبعو على الزناد،ضغط عليه و بخفة من ناجد حدر راسو و هبط معاه حتى لمياء...

هاد الاخيرة لي دفعات ناجد جهة الهيليكوبتر و مشات كاتجري عن ساجد لي كان على الاستعداد باش يتيري فيهم للمرة الثانية لكن حبس ملي بانت ليه جايا لعندو و غير وصلات ضـ ربات ليه اليد باش هاز الفردي و طاح للأرض،ما جا فين يستوعب شنو وقع حتى كاتلاح ليه معنقاه و جامعة ليه يديه بكامل قواها...

لمياء(بصراخ مخاطبة ناجد):سير من هنا...سير دغيا

ساجد(كي شوف فناجد مخنزر،حاول يتنتر منها و قال من تحت سنانو معصب):طلقي ا بنت القحـ ـبة

لمياء ملي شافت ردة فعلو مشا بالها لبعيد و حساب ليها بلي ناجد صيفط التسجيل لساجد حتى هو،بقات مزيرة عليه و الدموع من عيونها سيالة،كانت مرعوبة و الخوف متملكها للآخر،كانت خايفة لا يتسرع ساجد و يسيل د.م خوه...

لمياء:لا ما نطلقكش...خليه يمشي دابا...نتا معصب غادي تتسرع(بصراخ) ناجد عافاك سير...

ناجد كان وقف و عيونو موجهم لساجد،من ردة فعلو فهم بلي عرفو هو القا تل لكن اكيد فاهم الموضوع غلط،تمنى لو عرف فوقت اخر مناسب ربما كان يشرح ليه كلشي..

رجع خطوات للوراء بلا ما يفصل انظارو عليه،حتى وصل للهيليكوبتر و طلع،بانت ليه وجدان جالسة و مراقبة المشهد بهدوء،تنهد و عطا أمر للپيلوط باش يتحرك،لحظات و كانت الهيليكوبتر محلقة في السماء،مخلية وراها رياح شديدة و صوت عالي....

لمياء غير شافتهم مشاو طلقات من ساجد لي كان واقف بلا ما يدير شي حركة،كان كي شوف فالهيليكوبتر بعيون غاضبة،حاقدة،ممزوجة بالخذلان، و بقلب كي حس بخنجر الخيانة كي طعن فيه،كانت خيانة من طرف جوج ديال الأشخاص، واحد عمرو توقعها منو، و الثانية لي حاول جاهدا يطفي نار الحقد من جيهتها، ها هي رجعات شعلات فيه نارها من جديد...

غبرات الهيليكوبتر أخيرا،و صوت بكاء لمياء عاد قدر يسمعو،هبط عيونو ليها كي ناظرها و هي كلها كاترعد مخلوعة،كانت كاتشوفيه باغا تهدر لكن عاجزة،غمض عينيه و خدا نفس طويل، رجع حلهم و هبط هز الفردي لي كان طايح...