أرويني بدماء جحيمك [Quench me with the blood of your hell]

𝑃𝐴𝑅𝑇❀55

🩸أࢪوينـــــــي بدمــــ♡ـــاءِ جحيـــــــمكَ🩸     

🗡الفصــــــــل الثـــــــاني:ثــــــــأر قاســـــــي🗡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀55

من بعد مسافة من الطريق لي كانت مُتعبة و مرهقة، بدا كي بان ليها الشانطي قريب، كانت غادا كاتجر فيه و هي كاتنهج مع كل خطوة كاتخطيها، حتى عقدات حواجبها ملي بانو ليها أربعة حراس بملابس سوداء واقفين كي تسناو فيهم، وقفات كاتنفس بالجهد و هي كاتشوفيهم من بعيد، كان عند بالها بلي هما من طرف المهاجمين و ماشي من طرفهم...

حتى كي لمحها واحد منهم واقفة كاتشوفيه و هي شادا داريو لي كان فاقد وعيو، صغر عينيه كي حقق فيه مزيان و غير عرفو علم البقية و مشاو لعندهم بالخف...

لمياء لحد اللحظة كانت مازال فاهمة غلط و خاصة فاش شافتهم جايين كي جريو ناحيتها، خدات نفس طويل و غمضات عيونها كاتسنى مو تها لي ولا قريب بالنسبة ليها، ما عندها لا سلاح و لا طاقة باش تواجهم اذا الاستسلام هو الحل الوحيد لي عندها...

حتى كاتحس بالثقل أُزيح عنها، حلات عيونها و هما يبانو ليها هزوه كي غوتو بإسمو باش يفيق، عاد رتاحت و قالت بنبرة هادئة طاغي عليها الارهاق...

لمياء:خاصو ضروري السبيطار...حالتو خطيرة...

ديك الساعة 3 منهم هزوه غاديين بيه للأوطو لي كانت تما، فالاصل كانو جوج طوموبيلات و لي جابوهم تحت أمر ساجد لي كان عيط ليهم فاش يالاه توجه للغابة مع لمياء و داريو...

في حين واحد منهم بقا مع لمياء، حادر راسو ما كي شوفش فيها، و بنبرة فيها نوع من الاحترام نطق بتساؤل...

الگارد: موسيو ساجد فيناهو؟

لمياء سكتات كاتشوفيه بملامح ذابلة، في حين هو رافض يهز فيها عينيه و كي تسنا فجوابها لي تعطل...تعطل بسبب ترددها في الإجابة، ها هي فرصة جاتها لا تعوض، تتخلى عليها و لا تستغلها؟ سؤال كي تردد فعقها و جوابو كان صعب ما تكذبش، رغم الكره و الحقد لي متملكين قلبها عليه هو بالضبط، الا أنها فهاد اللحظة جاها صعيب تقرر مو تو و لا حياتو...

لكن ربما جا الوقت باش ترتاح أخيراً، ترتاح جسديا و معنويا، ترجع لحياتها و نشاطها المعتاد،ترجع لمياء القديمة و تعيش في هناء، توحشات و بشدة حياتها فالسابق و لي مستحيل ترجع ليها و هو عايش...

مدة و هي كاتصارع ضميرها باش تخليه يقتانع بفعلتها، قبل ما يخرجها من افكارها صوت الگارد لي نطق بإستفسار...