أحبني مراهق A TEENAGER LOVED ME

|116|

#الـفـصـل الثـالث#
💕أحبني_مراهق💕
#أنثى_تعشق_الإختلاف#
للكاتبة #رباب نجمة# 🌟
          
الجزء 116:

كطل من الشرفة، مستقبلة رياح وبرد مدينة طنجة.. اول مدينة غاتزورها فالمغرب..
شعرها مطلوق بحرية، وخصلات شعرها كيراقصها الريح من حين لاخر...سارحة فالبعيد كتفكر فلي وقع ولي غايوقع.. اول ليلة غاتقضيها هنا ولكن مزال مكتحس بالراحة..

أحداث كثيرة مرت عليها اليوم من وصولها لهنا ومقابلتها لديك السيدة لي كتكون مرات صقر.. للقائها مع داك الرجل الوسيم..
ماتسناتش دقيقة اخرى حتى اتاجهات للباب خارجة كتمشى بالحفاا في اتجاه غرفتو..

قربات لجهة باب بيتو لي كان الضو شاعل فيه كيبان من الشقة دالباب الشبه مفتوح..
عضات شنافتها السفلية من الأفكار لي جاو فبالها والمشاهد لي تخيلاتها مع فعقلها.. غايكون مختالي بزوجته فوضع حميمي...
عند هاد الفكرة قلبها دق بسرعة وزيرات على قبضة يديها بقوة...
اكيد راها مراتو كيما هو راجلها فأكيد ديك المشاهد لي فعقلها وقعات ماهي مرة ماهي جوج...

بقات واقفة لفترة، كانت غادي تمشي وترجع منين جات لكن توقفات فور ماسمعات اصواتهم كتعلى...قربات ببطئ عاقدة حجبانها باهتمام وقلبها ضرب فاش سمعات سميتها... مدات يديها مستندة على الحائط كتحاول تشوف شنو واقع لكن مابان ليها والو..
كتسمع صوت صقر لي كان واضح أنه كيحاول يدوي بصوت منخفض لكن هي كانت شاعلة فالسما..

ضحى: واش يسحابليك مارديتش البال كفاش كنتي كتشوف فيها... أنا لي مراتك وماكديرش فيا دوك الشوفات..

ارتبك صقر لولهة كيزير على يديه.. لكن سرعان ما تقمص قناع الجمود وجاوبها بغضب..
صقر: خفضي صوتك ودوي باحترام..
ضحى: ياك أسيدي دبا أنا لي وليت كنقلل عليك الاحترام.. بغيتيني نسكتليك وندير بحال شي باس ماوقع.. عينك فعينها قدامي وبغيتيني نسكت...قد بنتك أعباد الله وكتشوف فيها..
أما هي دايرة فيها الشريفة العفيفة.. وهي من لباسها والحالة لي دايرة فراسها باينة شكاتسوى..
صقر: واش نتي واعية بشنو كتقولي ولالا ....
نتي ماشي ضحى لي كنعرف.. واش عندك شي عقل ولا ماتكسابيهش!!
ضحى: لا العقل مشا من شحال هادي.. أنا مستحيل نخلي شي حاجة توقع بيناتكم فهمتي.. مغانخليكمش ديرو لي بغيتو..

ناض صقر من مكانو بملامح غاضبة.. ماباغيش يمد يدو عليها.. ويفيق داك الوحش لي داخلو..
صقر: مابقاتلي معاك هضرة.. 

واضعة يديها على فمها كاتمة شهقاتها، عينيها مصمرين فالأرض قلبها غادي يسكت.. الرؤية مواضحاش ليها بسباب الدموع لي تجمعو فعينيها.. مصدومة من شنو سمعات.. كلام ضحى جرح قلبها وسمم أذنيها..

رجعات كتجري لغرفتها بعيون مدمعة كتنفس بصعوبة.. وصدرها كيطلع ويهبط.. شدات الباب وراها.. ومرحبا بالدموع.. دموع على حبها لرجل كبير ومزوج.. ودموع على الكلام لي سمم سمعها..

#يتبع..