💕أحبني_مراهق💕
للكاتبة #رباب نجمة#
الجزء 4:
صبح الحال على غير العادة السما صافية والأرض ضاوية وتغريدة العصافير مالية الدنيا .. حلات شمس عويناتها وتجبدات كتكسل حكات عينيها وشافت فالساعة لقاتها يلاه 7h وهي ماقاريا تالعشية.. شمس عاجبها التخصص لي دايرة فالكلية ألا وهو الاقتصاد حيت من ديما باغا تكون مديرة على شي شركة ولكن الكلية لي معاجباهاش لسبب واحد على داكشي ولات كتهمل قرايتها بزاف فالفترة الأخيرة .. سمعات تليفونها كيصوني واستغربات .. شمس: أمنية شكاين على الصباح.. أمنية: أهيا ياكما نزغرت.. لالة شمس الضحى مبكرة ليوما دغيا جاوبتيني .. شمس: ومالك ياختي حكرتيني.. أمنية: إوا ماعلينا نوضي تهزي دروك تجي عندي راحنا مجمعين فالكافي كيف العادة.. شمس: وخا أزين واحد نص ساعة تلقايني عندك .. أمنية: تعطلي نوري لحسك.. ناضت على سعدها ووعدها غيرات حوايجها لي ديما لاقيا فيهم مشكيل كيف جميع البنات .. (تقابلات مع المراية) شمس: ألالة شمس يا زينة البنات ماماك علاش توحمات (ديديكاس لختي سليمة 😍) أش هاد الجمال ( سافطات بوسة فالهوى ودردبات مع الدروج كيف ديما بمشيتها الموزونة).. الأم(أمينة):صباح الخير شموسة فين غادا على الصباح.. شمس: غانفطر مع صحابي.. الأم(أمينة): بلاما نحتاج نوصيك ردي البال لراسك.. شمس: ماتخافيش أزين ديالي.. الأم(أمينة): آوا سير ألحبيبة دوز دي معاك ضحى تا هي تبدل الجو مسكينة.. شمس: على ضحى مساليالي ههه راه عندها لي يغيرليها الجو.. الأم(أمينة): أهيا شداكشي تما.. شمس: أودي دبا تعرفي مهم تعطلت غانلقى أمنية كشاكشها خارجين راك كتعرفيها ههه.. الأم(أمينة): سيري الله يرضي عليك.. خرجات شمس من الڤيلا ركبات اللوطو ديالها وزادت.. مع الدخلة دالكافي دخلات فواحد الحيط.. لا لا هذا راه صدر من الحديد .. هزات عويناتها فيه وهاد الأخير لي شاف فيها مقوس عينيه ومخنزر واقف بتخنزيرتو المعهودة وكيرمقها بعينيه الزورق بنظراتو القاتلة لي أول مرة كتشوفهم.. لي يشوفو من برا بملامحو الحادة وشخصيتو القاصحة لي ديما فارضة راسها يقول هذا شخص صعيب ومكيتناقش وعصبي.. ولكن من الداخل!! وهي بين أحضانو كيتبادلوا نفس النظرات تقدمات عندو كثر تامابقا كيفصل بيناتهم حتى نملة كتشوف فيه بنظرة غريبة العين فالعين ونطقات: شمس: واش عور مكتشوفش .."كملات بابتسامة ساخرة"..لا والزوينة قليل الحيا.."حاولات تبعد من أحضانو لكن زاد زيرها كثر...صدماتو ردة فعلها وعجباتو شخصيتها المتمردة جاتو على الكانة.. غمزها وقال".. """": قلة الحيا هي ترمي راسك عليا وتجيبي سبتك عليا آه ولا هادي طريقة جديدة كتصيدو بيها الكليان.. "دفعها بالجهد حتى تلوا الطالون فرجلها تمالكات نفسها بزز كتحاول تستوعب كلام هاد المتعجرف لي بان قدامها على غفلة.. واش بصح نقص منها لا والزوينة هانها فشرفها وكرامتها رجعات حافظات على وقفتها المتوازنة وابتسامتها وردات عليه بغل وحقد".. شمس: ماشي أنا لي نترمى على بحالك سيادك هما لي كيترماو عليا.. "رمقها بنظرة مستفزة وكمل طريقو بلاما يعير كلامها اهتمام... بقات متبعالو العين حتى غبر...وخلاها بركان غادي ينفاجر".. شمس: أنا شمس العمراني يجي برهوش تاع الخلا يهيني.. لا ماعاش لي يقلل من قيمتي آااععع ماكيسواش.. "هدنات نفسها وقادات كسوتها وتصرفات كأن شيئاً لم يكن حمدات الله حيت ماشافهوم حد أما كون تشوهات مع البشر".."فهاد الأثناء جات عندها أمنية لي كانت متبعة الفيلم من الأول ولكن مارداتش البال للدفعة لي دفعها".. أمنية: بوكوص ياك.. شمس(بغل): بزاف كاع ماتخيليش قداش حمقني.. أمنية: ياكما نخطبوليك.. شمس: ماكراااهتش.. أمنية: معلوم خويا بوكوص.. شمس: كيفاش كيفاش دبا هاد الكلب المسعور خوك نتي.. أمنية: إوا حشاك الكلبة المسعورة هي نتي.. شمس: واش داوية بصح هذا خوك.. أمنية: ياك أودي لاباس علاه شدارلك.. شمس: مادارليشاي دارلي يانا.. أمنية: إوا زيد قدامي طابلي قاعي بالكلاس وأنا كنتسنى فيك.. شمس: الدراري صافا.. مراد: البوكوصة تعطلتي.. أمير: على نت مكتعرفهاش راه هادو عمايلها.. شمس: هههه.. أمنية صديقة شمس من الثانوي كانت بنت غزالة طاي عامرة والخير فايض عينين زورق والشعر مايل للبرتقالي فم صغير وسنان بيضين.. ولايني عندها نيشان نيشان لي جبدها تخلطو وحتا لي ماجبدهاش تخلطو ههه.. #يتبع..
أنت تقرأ
أحبني مراهق A TEENAGER LOVED ME
Roman d'amourبعنوان: أحبني_مراهق 🥀🔥 (كاملة) بقلمي: رباب نجمة☆ 💮محللة من النشر بعد طلب إذني💮 #حـــــصـــــريــــــا على #أســـطـــورات_الـــجُـــمـــان_الأسْـــوَد🖤 #للقصص_بالدارجة🔥 كـــــوكـــــو البنات.. نتمنى تكونوا بخير.. جيت هاد...
