أحبني مراهق A TEENAGER LOVED ME

|106|

#الـفـصـل الثـالث#
💕أحبني_مراهق💕
#أنثى_تعشق_الإختلاف#
للكاتبة #رباب نجمة# 🌟
          
الجزء 106:

اتاجهات لبيتها وجلسات على حافة السرير جلستها المعتدلة.. مدات يديها للمجر ديال الكوافوز لي بجنبها وجبدات ألبوم الصور.. قلبات جوج صفحات وهي متذكرة مزيان مكان الصورة لي بغات جبداتها كتشوف فيها وعلى شفتيها ابتسامة ساحرة..تأملات فالصورة للحظات وميلات راسها للجنب ناطقة بهمس..
آية: صكر.. (صقر)..(سكتات مطولة ورجعات كملات كلامها) المنقذ ديالي..

ليلة هادية وسماء سوداء مزينة بالنجوم،
رفعات رموشها كتشوف فالسقف، الليل بالنسبة للأغلبية نوم وراحة  من بعد مشقة النهار.. لكن بالنسبة لفئة أخرى الليل فترة تفكير فالهموم والاحداث المتراكمة في ذاكرة كل واحد فينا.. تنهدات تنهيدة طويلة ورجعات ناعسة على جانبها الايمن كتشوف فالقمر المضوي.. ساهية وعندها فضول تتعرف على بلدها الاصلي..باغا ترضي فضولها.. •عندها دافع قوي علاش تمشي لكن خوفها من لي جاي مصعب عليها كلشي..

سمعات صوت الباب تحل رجعات غمضات عينيها مزيرة عليهم..
جلسات بجنبها شمس كدوز يديها على شعرها بحنان..
شمس: كلشي لمصلاحتك أبنتي..
آية تملكها فضول قوي..كانت غادي تنطق وتجاوبها لكن منعات راسها فأخر لحظة..باستها فجبهتها وتمشات خارجة مخلياها شاردة فتفكيرها وعينيها ساهيين فالنافذة.. كتفكر فحياتها من هنا لقدام.. فالأخير غمضات عينيها مستقبلة أحلام جديدة•..

~في مكان أخر•
~المغرب•

غرفة متوسطة، متواجدة فالطابق العلوي كان كيسودها الضجيج وصوت الغوات واصل تا للطابق السفلي فين متواجدين الخدم..

تكلمات إحدى الخادمات مخاطبة زميلتها فالعمل لي عاد لتاحقات..
1~ياختي من نهار عقلنا عليهم وهما فهاد الحالة..
2~(بفضول) وعلاش ياك لاباس..
1~كل مرة كاينوضو يتغاوتو على قبل الولاد(رجعات خفضات صوتها) كايقولو والله علم بلي هي لي مكتولدش..
2~حلفي مسكينة بقات فيا..
1~واتي نوضي شمن مسكينة.. يبقى فيك هاد الساعة غي راسك.. هو صابر معاها ومتقي فيها الله ودايرليها فوق الخاطر وماباغيش يخسر معاها ولكن هي على نقشة غي يفيض بيها الكاس وتجيها ديك الحالة..(سكتات شوية كتفكر) قوليها نتي..
2~(بذكاء) زعما الحنين للأمومة..
1~اييه هاديك.. غير تجيها ديك الحالة وتنوض تقلب على الصداع..ماكاتخلي فيه مسكين غير لي نسات وتكملها وتجملها تقولو نت السباب..
2~هاء وعلاش بالسلامة هو لي كتبليها ماتولدش..
1~أستغفر الله العظيم.. حيت هو فالأول ماكانش باغي الولاد وهي كانت مشتاقة وماذا بها غير امتى تولد اوا الزغبية نهار تقبل الفكرة وحاولو يولدو.. لقات راسها عاگرة.. تما بدات تويل وتقولو نت سبابي فلي راه يجرالي..
2~مسكينة والله تاعزات عليا ولكن ماكانش خصها تردليه اللومة حيت مادارها لابيديه لابرجليه.. مكتاب الله كيتصرف..
•ماقاطع كلامهم غير صوت التهراس جاي من بيت مالين الدار، طلبوا السلامة ورجعوا يكملوا خدمتهم•

أما فالبيت الفوق كان هو كيتوجع من يدو لي كتنزف بالدم.. وهي حداه عينيها شلال بالدموع متحسرة على حالتو وفين كانوا وفين ولاو..
تكلمات بحسرة نادمة على فعلتها..
ضحى: هئ هئ سمحليا أ صقر والله مادرتها بلعاني كنت فحالة غضب ماقصدتش نضربك بالكاس..عينيا كانوا معميين بنار الغضب..
شاف فيها بعيون كيف الجمر وهو صابر..ماهاموش ألم هاد الجرحة البسيطة لي على يدو قدما مألم ومقصح فقلبو..

رجع خرج مغير الغرفة.. خلاها كتبكي ومقهورة..
دارت يديها على وجها وكتشكي لله لي خلقها..تحرمات من بزاف دالحوايج فهاد الحياة مابغاتش تحرم منو حتى هو..

#يتبع..