أحبني مراهق A TEENAGER LOVED ME

|123|

#الـفـصـل الثـالث#
💕أحبني_مراهق💕
#أنثى_تعشق_الإختلاف#
للكاتبة #رباب نجمة# 🌟
          
الجزء 123:

دخلات لينا مقربة أكثر وكتشوف فصديقتها لي كتعزها بزاف كيف مصدومة ودموعها نازلين بوحدهم..

شمس: إلا مادرتيش عقلك أنا غادي نرجعك لفرنسا وعمرك مزال تزوري هاد البلاد...

واقفة متصمرة فبلاصتها وكلام ماماها وقع على مسامعها كيف الزلزال.... خسرات ملامح وجها بغضب وردات عليها بنبرة مرتفعة...

آية: شنو أماما وليتي كتهدديني.. ياك نتي لي بغيتيني نجي لهاد البلاد إوا هانا جيت شنو تغير..
شمس: شنو تغير !! (ضحكات بسخرية) لي تغير هو أنك فقدتي عقلك او وليتي كتفكري بطريقة غير ناضجة..راجعي نفسك وماديريش شي غلط تندمي عليه..(بتهديد) وإلا......
آية: وإلا شنو غادي تعاودي ضربيني !!
شمس: إذا اقتضى الحال غادي نديرها...(رجعات خفضات صوتها) هادشي كامل لمصلاحتك أبنتي...

خرجات وخلاتها محطمة ودموعها ماحبسوش.. هي مادارت حتى شي ذنب لي يخليها تصفعها وتتكلم معها بهاد القسوة.. واش كاين شي واحد في هاد العالم يقدر يتحكم فقلبو ومشاعرو...كون كانت تقدر لكانت قتلات هاد الحب لي كتحس بيه...

جرات عندها لينا فاش شافتها طاحت فالأرض على ركابيها.. رجليها مابقاوش هازينها وعينيها تنفخوا بقوة البكا.....
لينا: صافي أحبيبتي ماتبكيش طيبتي هاد العوينات..
آية: كفاش بغيتيني مانبكيش.. شفتيها كفاش كدافع على ضحى..فين الغلط لي درت ؟ نتي قوليلي.. ياك كنبغيه بيني وبين نفسي عمرو جا فبالي نصارحو أو ندخل حياتو من قبل.. كنبغيه فصمت كنكتفي غير بصورو والڤيديوهات ديالو... والله شاهد عليا أنه مافنيتي حتى إساءة أو مضرة ليها هئ هئ (حنات راسها واضعة يديها على وجها) أنا غير بغيتو..(رجعات شافت فيها) يكون كبير ولا صغير مكيهمنيش..
لينا: فاهماك أحبيبتي ولكن تانتي عذريها ماماك بغاتليك غير الخير... بغات تشوفك مرتاحة فحياتك..مابغاتكش تعيشي حياة معقدة وعامرة مشاكل.. ايييه متافقة معاك السن والجمال والمال مكيهموش مدام حبك صادق.. كيبقاو غير تفاصيل بسيطة... ولكن المشكل لي كاين أنه رجل متزوج واش تبغي نتي تكوني فمكان ضحى ها !! أكيد لا....حتى مرا ماترضا على نفسها تكون زوجة أولى... هكا كتحس بلي فقدات قيمتها.. أنا عارفاك شكاتسواي وميقنة بلي نتي مادرتي حتى غلط... اذا كان عينو فيك وبصح باغيك هو بنفسو غايتقدم ليك واذا كان العكس فماعليك أحبيبتي غير تبعدي وتعيشي حياتك بعيد عليه وأكيد الله غاينسيك فيه وعوضك بلي يستاهلك...مطلوب منك غير شوية دالصبر... فهمتيني ياك !!

شافت فيها آية بتركيز وحركات راسها بالإيجاب...تاركة زمام الأمور لله تعالى هو أفضل مدبر لحياتها...
آية: أنا غادي نصلي...
لينا: كيف ؟
آية: سمعت بلي اذا كان القلب موجوع وضايعة وتالفة بين جوج أمور وماعارفاش كيف تسيري أمورك... كتصلي صلاة الإستخارة وربي كيوضحليك الطريق لي من المفروض تسلكيها..

لمعوا عيون لينا وتكلمات بحماس...
لينا: حتا أنا بغيت نجرب وريني كفاش ؟؟؟

في هاد الأثناء كانت ضحى كتمشي وتجي في غرفتها بعصبية المشاهد كلها حضراتليها... كفاش ديك البنت الصغيرة باغا تاخذ منها راجلها... مستحيل تخلي هادشي يوقع... الحاجة الوحيدة لي كتملك مستحيل تخسرها... ماشي هي لي ديما تكون الضحية...

#يتبع..