بقات معايا وأنا نقولها كيفاش قالهم راني حاب نخطبها وهيّا تعاودلي قاتلي قالهم من جات لهنا وانتم علابالكم بيا باغي نتزوجها نطول ولا نقصر وزيد عمتي فطيمة ربي يرحمها وصاتني عليها مكان لاه نبقاو نطولو في الحكاية نخطبها شهر الجاي ادا قدرت نجي ونكمل ثلاث شهر تاع الصحراء وندير العرس قتلها قولي والله قال هكا قاتلي والله بصح خالي قالو مزالها صغيرة كان زدت صبرت شوي قالو معندي ما نزيد نصبر جوليا حياتها راهي ضايعة لازم شكون لي يوقف معاها وأنا كل ما نخليها هنا هكا تصراً مشكلة وطفلة تزيد ضيع اكثر مذابيا تكون تحت عيني أنا نعرف كيفاش نكبرهاً ومنخلي حتى واحد يقيسها قاتلي خالي قالو عندك الحق في هاديً. متوقعتش أصيل راح يهدر عليا هكا كنت علابالي بلي نهمو ويخمم عليا بصح باه يخطبني متوقعتهاش وزيد بعد ثلاث شهر نكون مرتو هاذي في الحلم ومكنتش نحلم بيها ًًً... بصح تفكرت عليلو طفات فرحتي حكاية لادروق دراهمو لي جبدت منهم بزاف حكايه الخطيفة ملقيتش لشكون نحكي يلقالي حل ولا يعاوني يعني أنا صح كيما قال حياتي ضايعة كان مراهش معايا اصيل كنت نزيد نضيع اكثر وليت ندعي في ربي نلقى حل ويسترني صح كنت نخمم نحكيلو بصح مزلت نخاف منو بالاك يتقلق ويدور في رايو ميوليش باغي يتزوجني ولا يصدق هدرة عليلىو ولا يرميني في سبيطار نداوي على الادمان . بقيت نخمم حتى طبطب الباب وتفتح دخل منو هو فقت من تخمامي لقيت روحي وحدي ريمة خرجت عندها شحال ومفقتش بيها من تخمام. شاف معايا وأنا تايهة فبه قالي في واش راكي تخممي جولي وقفت مشيت عندو وقفت مقابلاتو قتلوا علابالك اصيل راني حاسة روحي ضايعة وكون تخليني إنت أنا. محال نقدر نكمل حياتي بالاك نموت ولا كشما يصرا فيا علابالي تعبتك بمشكلي وحكاياتي بصح تحملني وابقا معايا مهما يصرا متسمحش فيا معندي حتى واحد من غيرك نقدر نستند عليه في حياتي انت وليت كلشي عندي ً. حط يدو على خدي مسح دمعتي قالي علاه تقولي هكا جولي علابالي راكي في فترة صعيبة وراكي تحاربي في نفسك وفي الناس بصح أنا محال نسمح فيك وأنا ديما معاك وواقف معاك انت برك تبعيني وحاولي ما ديري والوا بلا ما تقوليلي . علابالك من اول مرة شفتك فيها غضتيني قلت لوكان جات بنتي محال نسمح فيا ولا نخليها تعيش وش راهي تعيش دوك .. شفت معاه بحيرة قتلوا صح دارلي براسو إيه ويدو في يدي قالي بالاك معلابالكش بلي من اول مرة شفتك وحكالي مسلم عليك عرفتك ً قتلوا بصح انت كي اول مرة شفتني باك رفضت تمدلي دراهم ً. حط يدو على فمي قالي يجي وقتها هاد الهدرة ونقولك علاش ً المهم أنتي دوك هنيلي روحك خليك عاقلة ياك القطة تاعي خليني هاد المرة نروح لخدمتي وأنا متهني عليك ووعد الشهر الجاي نجي ندير حل يعجبك ً وزيد تهلاي قي روحك شوي صحتك مراهيش عجبتني وعينيك ساغني راكي مريضة ولا عند شي يوجع فيك ومراكيش حابة تقولي درتلو براسي لألا ً تنهد وقالي دوك لازمني نروح ً قتلوا دوك بعد رايح قالي وي عيطولي الله غالب وهاد المرة حتى بالتلفون ومنقدرش نعيطلك راني معاقب خرجت من ميسيون بلا ما نقولهم ً قتلوا كل مرة نديرلك مشكلة بسبتي ً قالي حاجة ما تغلا عليك جوليا ديريها مليح في بالك عندي انت لولة و الباقي كل بعدك ً تبسمت معاه بقا يشوف مع وجهي مدة حتى توسوست . من بعد قالي جوليا راكي تشربي في كاش دوا ً نقولكم قلبي قريب حبس الهدرة ومقدرتش نهدر راح نطيح من طولي جات ديراكت في بالي بلي فاق بيا بعدت عليه شوي مع كان حاكم يدي مقدرتش نبعد اكثر نطقت تاع بسيف قتلوا كيفاش دوا وش قصدك مفهمتش؟؟؟ وش من دوا علاه نشرب أنا دوا قالي علاش بعدتي قدمي شبيك خفتي راني نسقسي برك فيك عينيك وخزرتك بانتلي بيزار راكي تشربي في كاش دوا ولا ريان عطاتك دوا وراكي تشربي فيه ومقلتيليش درتلوا ب راسي لألا. وقتلوا لألا منيش نشرب في حتى دوا وعينا وشبيهم عينيا وبقيت نمسح فيهم ويدي عادت تترعد وحدها ً قالي ششش شبيك راكي خايفة جوليا راني نسقسي فيك برك علاه خفتي كالمي روحك وقدم عنقني طرطقت بالبكا من الخوف كان يفيق بيا وش بصرالي وش يصرالي يا ربي استرني يا ربي ًً هو بقا يقولي غير وشبيك تبكي متخافيش ويهدي فيا وأنا تلفتلي من كلش قتلوا اصيل حاسة روحي منيش مليحة تعيش قول لريان تعطيني كاش دوا يرقدني منيش نرقد مليح ونخمم بزاف وساعات نلقا روحي حابة نقطع شعري ولا....... حاسة روحي راح نهبل اصيل أنا ... منيش عارفة وش راه صاريلي ، ياك حتى انت شفت وجهي كيفاش عاد راني منيش عارفة علاه راني غير نخمم ومنقدرش نرقد ليل . ملقيت حتى كذبة أخرى نسيه بيها غير هادي المهم ما يفيقش ً قالي علاه مهدرتيش من قبل جوليا ياك ديما نسقسيك وانت تقولي لباس علاه مقلتليش ، ولا حتى قلتي لريان هيا تعرف . قتلوا خفت تتحير وأنت بعيد أصلا بسباب مشاكلي راك كل مرة يعاقبوك في الخدمة وريان علابالي بلي توصلك الهدرة . تقلق وشنف بالخف وجهو حمار قالي جوليا شحال أنا نوصيك اي حاجة عليك لازم تقوليلي واش يهمك فيا أنا إذا تحيرت قتلك حاجة ما تخبيها عليا هادي هدرة حطيها مليح في رأسك ، أنا الحاجة الوحيدة لي تخليني بيها نكرها انك تخبي عليا اي حاجة فهمتي أنا راني بعيد و مخي هنا عندك ، أنتي بالنسبة ليا أمانة ممكن نسمح في كلشي علجالك . كنت واقفة قعدت على حافة سرير وحطيت يديا على وجهي نبكي هدرتو دمرتني بعد ما كنت فرحانة كان يعرف واش راني مخبية عليه راح تكون لخرة تاعي . بقا يشوف معايا حاير قالي علاه راكي تبكي وش كاين متوسوسينش جوليا إذا عندك حاجة اهدري. طلعت. راسي ليه قتلوا والوا اصيل برك يا ريت انت كنت في حياتي من أولها مكنتش راح نكون بهاد الحالة ، مكنتش راح نغلط هاد الغلطات قاع في حياتي ، كون راني عايشة فرحانة كيما قاع البنات ً طبس عندي حكملي يدي قالي معليش مزال مفاتش الحال ، مكانش لي ميغلطش . قدمت عنقاتو قتلوا نحبك . حسيت بيه كي تبسم و بعد قالي تهللايلي في روحك ومتزيديش تخرجي من دار حتى نرجع . درتلو براسي إيه حط ظهر يدو على خدي مسح عليه بحنانة شاف معايا شوي وخرج .
